2022年9月6日星期二

莫少聰細佬原來係主播罕有受訪透露哥哥多年來身兼父職供書教學 #莫少聰

莫少聰細佬原來係主播罕有受訪透露哥哥多年來身兼父職供書教學

入行多年的莫少聰低調處理家事，但事實上多年來努力工作照顧家庭，供養細佬莫少康大學，現時他居於美國洛杉磯，擔任電台DJ和鳳凰衛視香港台主播。日前莫少康接受前港姐林穎嫺YouTube頻道訪問，同樣擁有一雙大眼睛的莫少康，笑起來的樣子與哥哥十足十餅印一樣。

莫少康表示在14、15歲左右離開香港到加拿大生活，之後再到美國生活，與哥哥甚少見面：「好多人都會話『你兩兄弟係咪成日都見面？』好老實講，我同佢係好少見面，甚至乎好少傾電話，但係咪感情唔好呢？又唔係，由細到大，佢都好take care我，佢就好似我爸爸一樣，因為我爸爸好早就離開咗，佢就身兼父職，都係佢供我讀書，所以我好多謝、好感激阿哥。」

兄弟少見面「感情一般」

因為哥哥比他年長10年，再加多上他很早便入行，所以從小已經甚少見到哥哥：「其實我同佢一齊住只係兩年幾嘅時間，跟住我就去咗加拿大讀書，雖然我哋好少傾偈，但當我有問題嘅時候，我先會搵佢，『阿哥，我有啲問題喎，可唔可以幫幫手解決？』佢會幫我，但我平時唔理佢，呢個係我自己衰，而家佢喺北京，我喺洛杉磯，間唔中會因為家庭嘅事會傾吓，但見面真係好耐好耐之前，對上一次見面已經係10幾年。」

正因為這原因，莫少康用「感情一般」來形容兄弟間的感情，不過因兩兄弟實在太相似，所以他一直被標籤為「莫少聰細佬」：「其實我真係多謝哥哥，因為佢嘅名氣，喺我嘅工作上都幫咗我好多，不過我都有啲隱憂，我由細到大係冇『莫少康』呢個名，我係日本人嚟架，叫『莫少聰細佬』。」

做名人細佬有難處

莫少康續說：「好似白姐姐（白韻琹），我訪問過佢幾次，佢永遠喺嗰個咪度都係講『聰仔、聰仔』，我想同佢講『我係康仔』，但又唔好意思，搞到成個節目都係聰仔，呢個係做有名嘅人細佬嘅苦處，不過我都開心，起碼我可以掹到我阿哥嘅車邊，都有啲光彩。我仲好阿Q精神，如果我做錯嘢，啲人都會入晒莫少聰數！」

在80年代出道的莫少聰，出道不久在電視圈已經深得觀眾歡迎，其後更吸引了不少片商的垂青，成為電影圈的紅人，除了代表作《中國最後一個太監》及《黃飛鴻》系列飾演梁寬外，還有《最佳女婿》、《沖天小子》、《龍鳳茶樓》、《帶子洪郎》、《積奇瑪莉》和《馬路英雄》等等。感情生活亦相當多姿多彩，曾與上山詩鈉拍拖，又與洪欣有一段情，但即使為他誕下兒子莫鎬濂，兩人最終分手收場。移居內地生活後，莫少聰與比他年輕28年的內地歌手孫雲玲結婚，可惜仍告離婚收場，女兒莫芷嫣跟隨父親生活。