《903 AllStar 籃球賽》今晚（11日）舉行，男團MIRROR自7月底紅館事故後首次齊人合體，12子獲安排壓軸出場，現場由鄭裕玲（嘟嘟）為球賽主持開球禮，姜濤、森美分別代表歌星和DJ隊出跳高搶球，但嘟嘟擺明偏心，搞笑地將籃球直接交畀姜濤，全場爆笑！
歌星隊除了派出姜濤，第一場球賽還有Ian（陳卓賢）、ERROR的193、樂隊Dear Jane的主音Tim和馮允謙率先以正選上場，Ian一落場即發揮水準，好快就入到2球，粉絲報以熱烈掌聲，姜濤都唔執輸入了1球，之後好快又換入了Stanley及Edan，Edan本來好有型搶到波，但中途失手仆低認真失威，貫徹其搞笑形象，而Stanley都打得吓，見他都成功入了一球為歌星隊搶分。在第三節比賽，Anson Lo終於出場，「神徒」（他粉絲暱稱）立即報以歡呼聲，他的隊友及對手可能為了滿足粉絲，已經讓開晒，任他投射，但可惜他射三球都唔入。
姜濤在第籃球賽四節比賽受傷，現場所見他衝前攔截對方時候，不少心與對方球員碰撞，自己碌落地扭傷了右膝蓋，見他狀甚痛苦，在地上「典吓典吓」，由聖約翰救傷隊為他包紮，現場將他用黑布圍住，包紮完才由隊友扶起他，坐上輪椅離場。賽事立即暫停，大會一度圍上黑布，事件擾攘近10分鐘。
最後，「歌星勇士隊」在最後五秒反超前，並以51比50擊敗「九零三人隊」。賽事尾聲，大會向「九零三人隊」的方力申頒發MVP（最傑出選手）獎項，而「歌星勇士隊」則由姜濤奪得，但因姜濤受傷故由MIRROR的其他成員代領。賽後受訪時，姜濤因為腳傷未有現身，其它成員表示：「暫時未知佢情況點，啱岩見佢入去休息室，見佢好痛，要去到醫院詳細ｃｈｅｃｋ下先知嚴唔嚴重，（佢咁渣？）平時佢唔係咁渣，可能頭先個好勝心咇咗出嚟，個力大過頭，加上係舊患。」他們指平日姜濤好少打全場，多數打半場，他們說：「今日佢又跑得多，一個唔小心就跌親，（好似豆腐？）佢又未係豆腐，係硬豆腐、冰豆腐。」其實比賽前他們都有練波：「今次意外，比賽有團火唔小心。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|