2023年2月14日星期二

獨家丨72歲李龍基今年再婚低調唔擺酒跟細36年女友性生活好協調 #李龍基

獨家丨72歲李龍基今年再婚低調唔擺酒跟細36年女友性生活好協調

72歲李龍基搵到第二春，4年前跟細他36年的Chris Wong譜出「爺孫戀」跟妻子分開。近年兩人愈愛愈高調，老當益壯的李龍基同Chris完全冇代溝，包括性生活，他自豪說：「如果唔協調，佢咁後生點忍呀？」採訪：方騫平

於心願樹下，一身年輕打扮嘅基哥孭起Chris展腰力。



懶理被指「爺孫戀」，兩人愛得愈來愈高調。



Chris不時主動向基哥發動冧功。

日前李龍基跟36歲Chris 喺鯉魚門心願樹下影相，期間Chris向「老公」詐嬌：「我咩心願都有喇！」乘機放閃，不過，基哥為顯示自己仲係壯男，點都要孭起約150磅的「老婆」騷吓好腰力，場面搞笑。



有個中女女友，基哥打扮變得年青化。



基哥去到邊女友都黐到實。

女友詐型唔畀講未婚

問到兩人婚姻狀況，基哥竟自爆：「其實未結婚嘅…」Chris即插嘴截停說：「唔好講佢(記者)知啦…」搞到基哥一臉尷尬猛打圓場：「佢話結婚要問准父母先都啱嘅，睇吓佢哋要幾多禮金。之前本想返內地見家長，但疫情去唔到，如無意外今年(結婚)，但會低調唔擺酒，到時搵班老友，好似你(記者)咁簡單食吓飯囉。」語畢，Chris突然說：「睇吓點！」此刻，基哥面有難色裝作聽唔到。



基哥自爆其實兩人仲未結婚嘅。

雖然兩人年紀相差36年，但基哥表示溝通不成問題，有心有力的他更強調兩人性生活好協調：「呢個世界孤陰不生獨陽不長，創造男女一定需要呢樣嘢，呢個係天然定律，點可以推翻呀？講真相愛係藉口，實際就嚟真章…所以拍拖4年來我哋冇分開過，疫情下好多中港夫妻因為分隔兩地導致分開。」作為隱型富豪的他，曾經歷過投資失利，自言對財富看得好淡，更指兒子都長大不需要他的財產，打算將名下資產轉給Chris，但至今還未寫好平安紙：「反正我仲有搵錢能力，啲錢都帶唔到入棺材㗎啦。」