將和湯洛雯（靚湯）於今年拉埋天窗的視帝馬國明出席醫療活動搵老婆本，狀態大勇的他成為近百粉絲的集郵對象，不停被邀影合照，他表示受腰患困擾多年：「拍古裝劇啲盔甲好重，日積月累下條腰骨歪咗，但平時唔覺嘅，踢波有身體碰撞時，就會隱隱作痛，接受咗醫學療程拉番正咗，依家就舒服晒（就嚟結婚，男人腰力好重要喎？）係呀，大陣嚟架嘛。」
他又謂暫時未有新劇拍，可以專心保養準備做靚仔新郎哥：「除Keep Fit外，皮膚，頭髮都好重要，呢排都係半休息，做吓搵錢嘅event賺吓奶粉錢。」又透露準太太靚湯亦在修身中，全力準備影一生人一次的婚紗照，他說：「佢瘦咗，不過唔係得100磅，女仔覺得瘦就係靚，但男人角度鍾意有小小肉，唔係瘦就係靚。」
至於何時出發影婚紗照及拍攝地方，他謂未婚妻要保持神秘：「佢話要畀驚喜我，唔係因為我口疏，佢話我好似食咗誠實豆沙包咁乜都講出嚟，不過可以講係會影啲自然啲嘅相，去外地影係唔想香港太熱，會去10幾日，順便旅行，但8月我都要去外地登台。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|