歌手林子祥仔仔林德信（Alex)尋晚（16日）迎娶拍拖多年嘅圈外女友Candace，二人結婚照曝光，不過見新娘子全晚肚凸凸，疑似雙喜臨門，難怪新老爺林子祥笑得特別開心，佢都戥阿仔高興！而今次婚禮都採取非公開形式，低調進行。
其實現年38歲嘅林德信一早就講過有計劃結婚，但對婚禮就未有透露半點風聲，曾直言同女友已經拍足拖，有晒「七年之癢」，原來就係心癢癢想結婚。佢就話自己前兩年都未諗婚事，但過咗疫情令佢對好多事嘅想法都有所改變，更表示覺得係時候做爸爸，不過父親林子祥就冇催佢生B，只會工作上畀意見，但Sally（葉蒨文）同其他長輩傾佢啲感情事，爸爸就會企旁邊偷聽，Sally同佢媽媽都冇直接問佢感情事。
而Alex就自爆同Candace係由共同朋友介紹而相識，大讚對方性格樂觀，加上Alex自己好鍾意小朋友，講到明希望婚後有個大家庭。早前喺林家家庭聚會上，都見到Candace已融入家中。有指Candace係專業清酒侍酒師，曾被選為2020年清酒小姐，佢同Alex一樣熱愛運動，成日行山同做瑜伽。因保護Candace圈外人嘅身分，以往兩人都甚少公開Post合照。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
