問到陳凱琳當時如何應對仔仔要養曱甴的要求，她說：「其實我係鼓勵佢嘅，因為我自細就好怕曱甴，如果從小就教仔仔唔使怕，畀佢接觸，佢就唔會驚咗，唔乾淨咪洗手，只要唔係傷害到佢身體就得，我覺得好驕傲，佢好勇。（最後有無養？）無，本身有養一隻甲蟲，驚兩隻昆蟲一齊會打架，我同佢講隻曱甴要野生先可以生存到，佢都明白，佢鍾意見到生命。有時我哋捉到曱甴，佢見到我哋要掉落垃圾桶，都叫我哋要放生。」
陳凱琳又透露有為3個仔仔開立銀行戶口，從小教導他們要懂得理財。她說：「我哋買咗錢罌畀佢哋，話佢哋知要儲錢先可以買嘢，平日佢哋幫手做家務，讀書考試成績好，都會畀錢佢哋儲，等佢哋知道要付出努力先可以得到想要嘅嘢。佢哋識得開個錢罌攞啲錢出嚟，出街有畀佢哋拎錢去用，教佢哋一蚊、二蚊、五蚊係咩樣嘅，等佢哋有呢個認知。」她坦言掌管了家中的財政大權，老公鄭嘉穎在家庭財務上都由她話事。陳凱琳笑言：「因為我係管家婆嚟嘅，yeah。」她又謂家中最大開支就是仔仔的教育使費，亦慢慢感受到養一個孩子要花幾百萬的壓力。
另外，對於日前鄭嘉穎表弟王賢誌在社交網疑暗指鄭嘉穎是雙面人，問到陳凱琳可有留意有關事件，她說：「其實真心想呢件事唔好再講，最重要係好想祝福一對準新人佢哋 (馬國明與湯洛雯) ，唔想再講呢啲是非，想要正能量。」她表示這些負面新聞並沒有影響到他們夫妻倆與一對準新人的友情，只是一些小手插曲，強調遲些會補返與他們食飯賀新婚。
本文作轉載及備份之用 來源 source: http://www.hk01.com
|
鍾意就快D Share啦！
|
|
|