零死角前大台視后李佳芯（Ali），近日因為倉底舊作《麻雀樂團》出土而再度成為話題。
日前劇集搞宣傳活動，曾經講過「有需要會幫手」嘅Ali最終玩失蹤，監製即刻出嚟解畫，話佢忙住同黎諾懿喺馬來西亞拍新劇《義和》，仲拍心口保證Ali戲份「有多冇少」，係真唔係？觀眾自然要金睛火眼睇實啦。
講起Ali呢位視后，真係好似大台嘅都市傳說，佢由有線過檔無記，從《學是學非》做「是非精」開始儲人氣，到《BB來了》飾演港女唐恬兒一炮而紅，嗰陣連登仔個個都戥佢高興，話「Ali終於捱出頭」。
事實上，Ali上位嗰幾年真係如日中天、風頭無兩，拎完視后再憑《白色強人》程醫生角色再上一層樓，當時無記擺明當佢係鎮台之寶，劇接劇之餘仲要係重頭劇擔正，廣告代言接不停，個勢直頭似當年佘詩曼翻版。
但係故事去到2020年就開始變調，Ali嘅星途突然被人撳咗慢鏡掣，《殺手》無端被抽起，《智能愛人》宣傳零存在感，連傳聞有份參演嘅《星空下的仁醫》（前名兒童醫院）都最終被Out，當時Ali已經心知不妙，講過「一日未開工都未敢公布」，點知真係一語成讖。
到今年初，Ali終於承認舊年12月已經完約無綫，結束12年賓主關係，最詭異嘅係，無記連基本嘅離巢通告都慳番，完全零Farewell，確係令人𢱑晒頭。
由當紅視后變成「被消失」呢單懸案，當然唔會有方東昇團隊動用《真相猜．情．尋》去查啦，不過近排見HOY TV《一線搜查》連壽司店都查得咁落力，作為老東家，係咪應該還Ali一個公道呢？
本文作轉載及備份之用 來源 source: http://hk.on.cc
|
鍾意就快D Share啦！
|
|
|