新一屆香港小姐冠軍陳詠詩、亞軍施宇琪與季軍袁文靜接受專訪，自信爆棚的「人生勝利組」陳詠詩面對網民攻擊EQ爆燈，未有被負評激嬲或因此落淚，曾是藝術體操運動員的她更有興趣拍動作戲做打女，自認捱得。
港姐冠軍陳詠詩出身顯赫家族，曾祖父是慈善家陳瑞祺，「文武雙全」的她13歲時成為藝術體操港隊代表，還贏過公開賽冠軍，今年在名牌學府哥倫比亞大學碩士畢業，隨即再攻讀博士課程，加上奪得港姐后冠，26歲的她絕對是人生大贏家，她說：「由細到大對自己要求好高，無論體操、學業、選港姐，自己都係追求完美嘅人，畀自己壓力係因為想做得好。」外間認為她的人生一帆風順，她坦言背後其實充滿挫折，全靠自己站起來才能夠繼續前行，挫折亦成為本錢，為她練成強大心臟抵抗壓力。
由面試開始就成為傳媒焦點的陳詠詩，面對巨大輿論壓力，被網民評頭品足，她說：「有心理準備面對評論，同自己講嚟選港姐，就唔可以畀呢啲評論打擊到。開頭有睇少少網民評論，但決賽前後就唔睇，最緊要自己嗰份自信心要喺度，只係會理會身邊人點睇，要記住網民唔係深入認識我，咁就唔會打擊到我。」自信爆棚的她EQ同樣爆燈，未有被負評觸怒，自言看電影經常喊的她，面對惡評反而相當硬淨，未有流過半滴眼淚，她笑說：「本身唔覺自己EQ特別高，但經過選港姐，覺得EQ相對幾高。」
陳詠詩得獎後，學霸男友Martin亦告曝光，兩人拍拖旅行的親密照更成為熱話，她說：「反而曝光之後減少咗壓力，個個都知變咗更加光明正大，有正常出街拍拖。」又笑言有計劃與男友再去旅行，好好慶祝。她指入行後對拍劇、主持感興趣，曾是運動員的她被問到會否有興趣拍動作片？她說：「真係有諗過，有興趣，因為以前睇好多武打片，自己都好捱得㗎！」
施宇琪：有啲人用好衰嘅字眼話我！
亞軍施宇琪直言最初看到網民尖酸負評，曾經感到不快：「有啲人會用好衰嘅字眼話我，大山婆、又老、又樣衰，經過心理調整，依家會唔理。覺得有勇氣選港姐，呢份勇氣已經係最靚嘅一樣嘢。」由投行工作到選美，她明白到有些事情是沒法改變：「工作畀人話，做得唔夠好係可以改，父母生我係咁嘅樣係冇得改，冇得改嘅就唔好聽，呢個係成長型思維，之後已經唔睇，唔係就變咗折磨自己。」
為選美在半年內減去40磅的施宇琪，過程足以寫成減肥血淚史，她笑言現時體重已反彈：「太辛苦，唔係為上鏡唔提倡咁樣減肥，因為食一塊朱古力、一塊雞肉都會記低卡路里，決賽嗰日係人生身形巔峰，仲瘦過我初中，覺得好值得，證明到畀自己睇，想爭取一樣嘢係可以做到，呢個先係減肥嘅最大價值。」她對男友身份保密：「佢係好好嘅男人，學歷好高、高薪厚職，其實佢曝光係冇所謂，但唔想佢承受評論。」
至於季軍袁文靜於港姐決賽夜在才藝表演以廣東話Rap狂搶分，原來靈感是來自愛Rap的男朋友，更激發對方的唱歌夢，她笑說：「其實男朋友都想唱歌、Rap，係佢開始學Rap先，我Rap都係請教佢嘅老師。自己攞獎令到佢覺得人生係無限可能，可以去追夢，佢都有可能會參加歌唱比賽㗎，哈哈。」
李尹嫣睇中張振朗讚靚仔有型
「最上鏡小姐」李尹嫣大學修讀音樂，對唱歌有興趣，選港姐前參加過無綫歌唱節目《聲秀》海選，但66強止步，之後轉戰港姐。她自言睇無綫長大，歲半已經電視汁撈飯，故一直對入行感興趣：「由細到大學過鋼琴、豎琴、結他、音樂劇、粵劇、聲樂，《聲秀》同《香港小姐》都好有興趣參加，有幻想兩個比賽同時進行，但選美後就知道冇可能。」
在新一代藝人中，李尹嫣最喜歡劉穎鏇與視帝張振朗，大讚後者在《反黑路人甲》中白髮造型相當有型、靚仔。得獎佳麗中唯一沒有拍拖的她被問到是否要找振朗類型的男朋友？她笑說：「咁又唔係，要睇性格，唔靚仔都冇所謂，希望對方成熟啲，有自己嘅目標，唔好懶散，感覺啱就得。」講到入行後面對網上的評頭品足可有壓力？她說：「好唔好都會睇，但會過濾，有負評都唔會唔開心，唔會放喺心度，睇完當粉筆字抹咗佢，最緊要有屋企人支持，其他人點講唔重要。」
李尹嫣同時也是「友誼小姐」得主，並賣花讚花香指選港姐前也聽聞過選美多是非，但今年的14位佳麗相處既沒有是非，更會互相幫忙，大家相當團結，令她喜出望外：「可能我哋14個都有自己嘅能力，對自己有自信，個個性格都好好，所以唔會受到獎項影響，好有體育精神。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|