班捷文施斯高慶祝跳得好高。（Getty Images）
周六（4日）晚英超焦點戰，曼聯將士用命下，憑美臣蒙特及班捷文施斯高各建一功，喺主場以2比0擊敗「黑貓」新特蘭，令備受壓力嘅主帥魯賓艾摩廉，暫時鬆一口氣，起碼捱埋個國際賽期。
曼聯有今夏轉會窗關閉前加盟嘅門將辛尼拉文斯，今仗終於迎來其「地標戰」，而美臣蒙特則取代馬菲奧斯根夏，夥拍麥比奧莫及班捷文施斯高攻堅，佢哋一開波即搶攻，8分鐘麥比奧莫右路妙傳，美臣蒙特冇人看管下一控一射破網，極速打開紀錄。
紅魔得勢不饒人，隊長般奴費南迪斯遠射中楣，阿密特迪亞路立即頭槌執雞卻頂咗出界，非常嘥料，去到31分鐘，達洛治大力掟手榴彈，新特蘭守將頭槌解圍卻跣後，益咗施斯高射成2比0，連續兩仗有士哥，腳風轉順。 「黑貓」之後亦有零星攻擊，格列沙加突然放冷箭，好彩拉文斯橫身撲出，完半場前施斯高疑似侵犯查爾曉美，球證原本直指12碼，但經VAR覆核後證實施斯高冇犯規，令曼聯拎住兩球優勢返入更衣室。
下半場接戰，兩軍主要係拉鋸，直至55分鐘出現驚險場面，新特蘭一個攻勢，曼聯門將辛尼拉文斯與後衞誤會，右禁區邊殺波唔成撞埋一堆，新特蘭嘅貝特蘭查奧爾跌入禁區內，以為會判12碼，但球證指查奧爾插水，仲送咗張黃牌。之後兩軍再冇增添紀錄，「紅魔鬼」維持淨勝新特蘭2粒完場。
至於同時間開波嘅「倫敦打吡」，阿仙奴於上、下半場，分別由迪格蘭賴斯及布卡約沙卡各入1球，主場以2比0擊敗韋斯咸。
本文作轉載及備份之用 來源 source: http://hk.on.cc
|
鍾意就快D Share啦！
|
|
|