無綫《萬千星輝頒獎典禮2025》昨晚於澳門舉行，今年戰況相當激烈，結果黃宗澤及佘詩曼雙雙「一炮雙響」，獲頒「最佳男、女主角」及「大灣區最喜愛男、女主角」。《新聞女王2》成為「最佳劇集」，全晚包攬共9個大獎，成為大贏家。頒獎禮尾聲宣布曾志偉獲頒「萬千光輝榮譽傳奇大獎」，之後他指自己「江郎才盡退下來」，宣布卸任TVB總經理之職。
昨晚頒獎禮吸引近百藝人包括陳豪、馬國明、羅子溢、佘詩曼（阿佘）、王敏奕及李施嬅等悉心打扮亮相，大批粉絲則於會場門外追星吶喊，場面墟冚。紅地氈上，身為視帝大熱的羅子溢展示一對子女送給他的自繪打氣卡作「護身符」，可惜仍敗給《新聞女王2》的黃宗澤（Bosco）。Bosco得知得獎一刻淚流滿臉：「因為攞咗大灣區獎，我以為自己冇得再上嚟，頭先講嘢講到亂晒。多謝主席許濤喺依家拍戲咁困難嘅時候，都畀咁多資源去支持製作。我覺得自己係個好幸運嘅人，遇到好多好好嘅前輩，多謝大家一路以嚟咁錫我，原來真係會喊㗎！」
阿佘擊敗勁敵宣萱勇奪「最佳女主角」，創紀錄4度封后，公布賽果一刻全場歡呼聲不絕。阿佘上台忍不住眼濕濕：「今晚將會係我人生最記得嘅夜晚，多謝大家出現喺呢個咁靚嘅畫面。上次攞獎我覺得係自己攞嘅，但今次係Man姐攞，我成為咗呢個角色，帶住精彩嘅劇情同觀眾產生共鳴，我好鍾意你，文慧心！好多謝我媽咪咁堅強同樂觀咁去面對佢依家嘅情況，亦好多謝我細佬照顧得媽咪好好，令我可以放心追夢。歷史係人類創造出嚟嘅，今日我做到，台下每位唔放棄，都可以成為下一個歷史。」其後鍾澍佳率領《新聞女王2》製作團隊上台領取「最佳劇集」。
《新聞女王2》擸9獎成大贏家
另外，頒獎禮開始不久，大會頒發「大灣區」系列獎項，同樣由主演《新聞女王2》的Bosco與阿佘稱帝封后，兩人不約而同再次奪得「大灣區最喜愛TVB男、女主角」。Bosco領獎後上台開心表示：「原來個腦真係會一片空白！多謝無綫，呢個係我長大嘅地方，係TVB培育我出嚟，冇無綫就冇黃宗澤！當然我要多謝《新聞女王2》台前幕後嘅兄弟姊妹，多謝你哋畀我鬧！當然我都要多謝我阿媽，唔係佢使我錢、我要繼續拍劇，就唔會遇到咁好嘅劇本。」最後拋下一句「留番畀阿佘講」似神預言，嘉賓周柏豪及黃浩然隨即宣布阿佘獲得「大灣區視后」。
阿佘致謝詞時不禁謂：「冇諗過咁快有機會企番上呢個頒獎台，多謝支持《新聞女王》嘅每一個你，唔係你哋唔會有《新聞女王2》誕生，亦冇機會重遇Man姐呢個咁可愛嘅角色。總之好開心啦，希望港劇可以喺唔同地域繼續發揚光大，繼續發揮港劇精神，為香港爭光。」博得全場掌聲，「大灣區最喜愛TVB劇集」由《新聞女王2》奪得，而該劇全晚奪9個大獎，成為大贏家。
節目尾聲，無綫行政主席許濤現身台上，先恭喜所有得獎者，又指今年特別增設「萬千光輝榮譽傳奇大獎」，由總經理曾志偉獲得，以表揚他過去數十載為無綫、甚至全港演藝界出心出力，且為觀眾帶來無數歡樂及培育無數人才，形容他是「永遠係無綫最重要嘅成員」。此時譚詠麟突現身負責頒獎，曾志偉領獎後說：「多謝公司今次頒呢個獎畀我，成個獎最特別係個『奇』字，奇在5年前我答應入嚟坐呢個位，身邊好多朋友形容電視係夕陽行業，唔做唔輸，但我覺得想將自己50幾年嘅經驗同同業分享，呢個就係我返嚟嘅目的，到今日我真係江郎才盡，覺得需要卸任嘞，交由年輕嘅一輩再行落去，將無綫發揚光大！」而無綫同時發出通告，指曾志偉由1月21日起轉任新成立的諮詢委員會召集人。
王敏奕攞「女配」發台瘟 何廣沛摘「男配」飲泣
今年台慶頒獎禮之爭非常激烈，「最佳男配角」由何廣沛憑《新聞女王2》奪得，他知道奪獎一刻，即伏在枱上飲泣，抬頭時仍非常激動，上台後，一度未能道出得獎感言，要平復心情才能續說：「我記得上一次上嚟攞獎，經已係2018年嘅飛躍進步獎，我同自己講過，再上嚟應該要用好長嘅時間，要花更大嘅努力先可以攞到，非常唔容易。」之後他多謝一眾TVB高層及監製鍾澍佳，當然還有劇中好拍檔佘詩曼，最後多謝家人及另一半，並謂：「我會繼續努力，2026年係幸福年，多謝大家。」
「最佳女配角」由王敏奕憑《新聞女王2》撼贏龔慈恩及高海寧等奪得，王敏奕獲獎一刻大感愕然，上台後，心情仍未平復，待了一會才能說話：「Sorry！好緊張，Live嚟，我要鎮定啲，多謝每一位投票畀我嘅觀眾，多謝TVB、許生（許濤）、珍姐（曾勵珍）、老爺（曾志偉）……原來真係會一片空白。」之後她在後台受訪，問到是否仍一片空白？她謂：「係！原來真係準備唔到，會發台瘟。（冇多謝老公曾國祥喎？）我望到邊個就多謝邊個，多謝曾導（老公曾國祥），佢有睇電視，一陣會過嚟。」
吳業坤爭氣攞「男飛躍」爆喊
「飛躍進步男、女藝員」分別由吳業坤和葉蒨文獲得，宣布賽果一刻，吳業坤激動在座位爆喊，喊住上台攞獎，吳業坤在2015年獲《勁歌金曲》最佳新人獎時，爆喊至眼鏡霧化成經典，今次就沒有霧化。他激動表示由《超級巨聲2》開始，演藝這程車16年兜兜轉轉：「有啲人贏在起跑線，有人做棋、做嘍囉，人生冇終點，只要爭氣行下去就會見到風景，15年前吳業坤畀人感覺好低能，希望15年後聽到呢個名係專業同認真。」吳業坤得獎後表示：「用咗10幾年攞呢個獎，真係好感動，明白係要用時間浸，攞獎時有好回憶，由歌唱比賽《超級巨聲》開始至依家。（公布獎項前，好緊張喎？）係呀，要咬牙切齒先可以紓緩到情緒，知自己攞獎時好醜樣，但我想畀大家知道我好畀心機同努力，不過今次攞獎，眼鏡冇起霧。」
葉蒨文感謝《愛．回家之開心速遞》團隊，由第一集開始做足8、9年，陪伴觀眾睇電視食飯，感到做藝人好有意思，《女神配對計劃》更是大豐收，並公開多謝男友曾展望（GM）及對方媽咪煲湯，她受訪時表示入行10年，以平常心面對獎項，反而《女神配對計劃》攞獎感動到喊，問到GM失落「男飛躍」會否美中不足？她說：「係嘅，有嘅，聽到唔係佢，自己都有啲眼圈一紅，仲激動過自己攞獎。（點呵番GM？）睇吓佢需要咩？咩要求都答應。」
林保怡捧蛋冇面目返屋企
林保怡和李施嬅昨晚孖住行紅地氈，有份角逐「最佳女主角」及「大灣區最喜愛TVB女主角」的施嬅，之前從未拉票，就算到現場也婉拒傳媒訪問，似乎採取「棄賽」態度。當司儀談及她在劇集《新聞女王2》中的角色「張家妍」在離開電視台時崩潰大哭一幕，令網民看得心痛，她說：「呢一幕戲都幾難忘㗎，我覺得好好彩有第一季，裏面有好多記憶同情緒，雖然冇對白只得音樂，但係好豐富。（網民話希望下次唔好咁慘。）都係Happy Ending。」
而有份角逐「最佳男主角」及「大灣區最喜愛TVB男主角」等的保怡受訪時說：「多謝無綫畀機會我再嚟。（爭視帝信心如何？）如果兩個獎都攞唔到就死囉，冇面目返屋企。」
林盛斌激動得滯整爛獎座
林盛斌（Bob）奪得「最佳男主持」，甫上台經已妙語連珠：「畀Mayanne（麥美恩）夾一夾，乜都唔記得晒，陳庭欣唔使擔心，我一定幫你搵個男友，2026年我乜都唔搞，淨係搞你一個。」之後，Bob回復正經感謝投票評審、一眾TVB高層，以及公司拍檔，當然還有他的家人，還提到自己的小朋友已習慣爸爸輸，但今次終於可以贏到，希望能令家人感到驕傲！最後，他指演藝路不易行，他會繼續努力，並高舉獎座再放下，應是太大力的關係，令獎座即時「解體」，場面既尷尬又搞笑，頒獎嘉賓王祖藍即「救場」，嘗試幫Bob「修理」獎座，可惜無效，Bob只好托住獎座落台，王祖藍即搞氣氛笑言：「講得幾好都冇用，最勁呢下，掂呀。」林曉峰即補充：「做主持呢個時刻都只能抹吓張枱。」王祖藍再謂：「你真係贏咗，你應該係TVB開台以嚟第一個整爛個獎嘅人，落地開花。」Bob受訪時說：「我應該係史上首位攞完獎立即『鏗』碎個獎嘅藝人，不過呢個係道具，遲啲會有個真獎，我會用保險箱鑲住。」又透露會幫甩拖的陳庭欣配對身家起碼20億起跳的另一半。
而車婉婉獲「最佳女主持」獎時淚崩，透露入行33年，多謝曾合作過的音樂人及節目監製。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
