藝人林盛斌（Bob）在《萬千星輝頒獎典2025》中，成功勇奪「最佳男主持」獎項，仲因太大力關係，令獎座即場「解體」，成為台慶蝦碌一刻。當Bob台上興奮時，原來太太率領一班子女及親友安坐家中做見證，做開KOL嘅Bob嫂更係準備好幾個鏡頭直擊親友興奮一刻，等依家可以有片分享畀網友按Like！
片中見Bob嫂、4位仔女及其他親友坐電視前，一聽到係Bob拎獎時，全體跳起尖叫大嗌，鏡頭再轉，就已經見到4子女已經攬作一團爆喊，細仔更加係七情上面，感動一刻卻被Bob整爛獎一幕打破，眾人破涕為笑。Bob嫂上載片段到社交網，留言指等咗17年，終於都見證到老公拎獎：「2009年 大家姐一歲，林生由大氣電波進入電視機 2026年 佢有四位小朋友，最細嘅八歲 17年，起過、痛過、怨過、落過，就是沒有後悔過！ 失意的時候看過程，得意的時候看結果，人生每一步都是成長，直至成功，每一步都算數！」
今日Bob嫂（5日）再出Post，自豪指阿仔依家可以同大家講爸爸係金牌主持：「前日，細佬問我：『啲人話爸爸係金牌主持，係咪㗎 ？？』我話：『呢個係其他人支持爸爸嘅講法，其實冇一個大眾指標，不過喺我哋心目中，爸爸當然係金牌主持』尋晚，睇完頒獎禮，我同細佬講：『之前咪講金牌主持冇一個大眾指標嘅？依家有爸爸係最佳男主持！』
對於Bob在《萬千星輝頒獎典禮2025》獲頒「最佳男主持」時，因太過興奮「扑爆獎」成為全城熱話。對於有傳媒關注林盛斌當晚手上所持獎座孰真孰假，無綫企業傳訊部回覆：「基於現場保安及安全等因素的考量，無綫一向在處理含有純金、鑽飾或寶石等貴重物料製成的獎項頒贈儀式時，部分情況下會採用仿製品作為頒獎時使用。其後，公司會將得獎者姓名鑄刻於真品上，並於完成製作後正式送交得獎者。 昨晚舉行的《萬千星輝頒獎典禮2025》中，得獎者所獲頒的獎座均為臨時仿製品，主要用於現場拍攝及拍照等用途。其後，所有得獎者將會各自收到刻有其姓名的真品獎座，以作正式留念。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
