由古天樂、林峯、宣萱、郭羡妮、滕麗名主演電影《尋秦記》票房狂爆，自12月31日上映至昨日港澳累計票房閃破4,000萬。當中滕麗名同時係TVB長壽劇《愛．回家之開心速遞》主角之一，佢忽然公開5年前受傷坐輪椅片段，當時不慎受傷嘅佢要坐輪椅代步，全程自己推自己，身旁就有同樣有拍《尋》及《愛．回家》藝人、「風少」陳浚霆（Andrew）。
滕麗名留言：「電影版尋秦記的回憶 畀你哋聽吓我哋平時嘅對話 我覺得Andrew 對我真係好好，所以直出畀大家欣賞🤣」仲Tag埋陳浚霆。片中滕麗名自己推輪椅，旁邊陳浚霆笑說：「你快啲好番啦隻腳，我哋真係等唔到你好耐，哈哈哈」又走到佢身後表示：「我好想幫你推，畀我幫你呀…」滕麗名話「唔制」，陳浚霆再笑說：「我未收到聽日通告，唔知有冇時間同你嘥…」滕麗名繼續自己推輪椅：「Ok，我覺得自己活動自如，可以減埋手臂bye bye肉。」陳浚霆繼續走近：「我好想幫你推，你隻手臂會唔會好似石頭咁？」滕麗名嬌斥：「唔好搞我！」旁邊女子笑說：「其實要考驗自己，唔應該係雲石，試吓喺地毯（推輪椅）呀！」
有網民關心問：「咁樣聽日仲去謝票？」滕麗名回覆：「拍尋秦記嗰陣㗎好番啦，明天見」網民亦關心係咪《尋秦記》打鬥戲意外，擔心佢係太多動作場面而受傷，滕麗名表示已康復，已經係五年前嘅事。同時有網民批評陳浚霆：「個男仔好冇風度」、「點解唔幫手推😢」陳浚霆急急留言澄清：「我要澄清一下，我有幫手推，但係尊敬嘅前輩鍾意自己嚟 😮😂😮😂」陳浚霆於《尋》中飾演墨者，戲份不多。
而有網友上載《尋》謝票活動片段，見有小朋友見到滕麗名、歐瑞偉等藝人時，只叫得出二人於《愛．回家》角色名「熊尚善」及「KC」，即被滕麗名親證《愛．回家》確實受歡迎及入屋，並現場更正小朋友，指歐瑞偉係「戰國法律部陶總管（《尋》角色）」，笑言自己平時亦好溫順，非《尋》中角色「善柔」咁硬朗，場面溫馨又好笑。
本文作轉載及備份之用 來源 source: http://hk.on.cc
|
鍾意就快D Share啦！
|
|
|