藝人陳瀅在新劇《臥底嬌娃》的角色怕醜內斂，與本人反差甚大，還要挑戰跳唱女團，堪稱演技考牌之作。原來此角一開始另有人選，但因對方辭演而改由陳瀅頂上，她明知執二攤也不介意，絕對是圈中義氣女。
由陳瀅、張曦雯、羅毓儀和馬貫東主演的無綫劇集《臥底嬌娃》現正熱播，陳瀅日前接受本報專訪時，表示自己是最遲入組的一位，沒時間多作準備，因此拍時相當擔心，又大爆飾演的「江妙姿」原本選用另一女演員：「有日監製打畀我，話珍姐（曾勵珍）都喺度，問我有咩做，就叫我入組。」陳瀅表示不介意執二攤，因為對方是其好朋友。
寸馬貫東NG累街坊
而《臥》劇監製方駿釗證實辭演的女演員正是賴慰玲，透露一早已找對方試鏡，但開工前約3星期想與她傾角色及古仔時，她卻欲言又止，指直接上公司見面再傾。方駿釗昨日接受本報訪問時坦言：「當時佢用一個私人理由話拍唔到，我咪要即刻另外再搵人囉！因為得番3個星期好急，同埋搵邊個都好，每個藝人都會覺得自己係執二攤，我一定要搵一個關係好好、我又好信任嘅演員幫手，我就即刻打畀陳瀅，亦如實同佢講咗來龍去脈，佢都非常之有義氣，一口就應承咗我，好多謝佢。」他表示已跟陳瀅合作3次，原先是因為欣賞賴慰玲才找她試鏡：「其實《降魔的》兩集都有佢，佢係做馬國明阿媽，謝雪心的後生版，嗰陣得幾場戲，佢都演得好好，所以想再合作。」現已離開無綫的方駿釗坦言不能跟賴慰玲合作有點可惜，未知以後會否再有機會。至於未能出演的賴慰玲則回覆道：「本來覺得好遺憾，但知道係陳瀅做好開心，我哋有傾過呢個角色，依家出嚟效果佢真係做得好好，好戥佢開心！」臨危受命的陳瀅花了不少工夫拿捏角色，認為是「表演上的表演」難度極高，因為「江妙姿」文靜怕醜、存在感低，但現實中的她說話聲大大、朋友眾多，反差極大。
《臥》劇前晚播出的一集中，陳瀅、張曦雯和羅毓儀分別以露腰搖滾風和校園風造型跳唱，陳瀅更大晒功夫舞，踢腿踢出新高度，展現打女潛質。談到《臥》劇是馬貫東首部擔正男一的劇集，陳瀅大爆：「佢同我合作過嘅男演員好唔同，成日唔記得對白又講錯晒啲名，一到要拍案件戲，我就知要OT哈哈，變成笑話，好享受取笑佢。」又指有一場對打戲被馬貫東起飛腳致跌傷，膝頭留疤，要對方答應一世幫她兩隻愛犬免費洗澡作補償。
命中注定開音樂會
向來以演戲為主的陳瀅，將於4月首度夥拍同門的蔡潔到澳門舉行首個音樂會《Pillow Talk》，她直言若不是在《臥》劇演過跳唱女團，應該不會接受演出：「今次角色畀人睇到呢個陳瀅，時間上好夾，如果突然要我做騷可能唔太啱，好怕做同我形象太唔一樣嘅嘢，觀眾未必接受到我突然唱歌。依家就好舒服，係個天計劃我去唱。」
陳瀅去年犯太歲，自爆與電影有關的大項目功虧一簣，令她領悟有些事情毋須強求，相信上天是想讓她先做跳唱，可能下半年再做其他項目。談到以前經常遭網民批評「時裝車禍」，陳瀅打趣說：「如果我高10厘米或者再瘦10磅，應該會靚啲。」去年努力運動減磅的她，笑言最近似乎再也沒有人批評她穿衣不夠漂亮。
本文作轉載及備份之用 來源 source: http://hk.on.cc
|
鍾意就快D Share啦！
|
|
|