無綫戀綜《女神配對計劃2》昨日正式招親，新一季女神郭珮文大談理想類型，繼續情迷「壞男孩」黃宗澤。「拜金女神」陳若思對前度的「貧窮論」令人嘩然，更認為有錢無可否認是有吸引力的條件。
無綫去年炮製的戀愛真人騷《女神配對計劃》除了令葉蒨文與曾展望（GM）、羅毓儀及林俊其等成功配對成為「真情侶」外，節目更叫好叫座，為無綫狂吸金。昨日新一季節目在將軍澳電視城展開全球招親記者會，為5位「新女神」郭珮文、陳若思、何沛珈、俞可程及阮嘉敏搵筍盤，節目主持繼續由「金牌媒人」林盛斌（Bob）擔任，期間預告會有「隱藏女神」現身踢館爭仔。
眾女神以「仙氣」打扮現身，最有睇頭屬「大騎樓」郭珮文的低胸裝扮，趁機晒「咪咪」，談到擇偶條件時，她指外表要高大有型，有壞男孩味道，但內心要善良、有擔當。問到是否要有錢？她笑說：「好呀。（月入幾多？）如果要有好條件嘅生活，要月入10萬。」一直不諱言傾慕藝人黃宗澤的她，指擇偶條件希望像對方有壞男孩味道，非常有魅力，又乘機大讚對方合作拍攝時會照顧和關心後輩，經常煲湯給大家喝，相當細心。
拍過5次拖的陳若思自嘲膚淺鍾意靚仔、壞男孩類型，大讚羅子溢靚仔，她說：「唔使好有錢，但係要上進，我唔介意出街AA制，以前有啲男友都係冇錢，都係搵兩、三萬。」Bob嘩然：「兩、三萬都叫冇錢？」
GM葉蒨文讚「天然呆」有優勢
郭珮文受訪時講到鍾情黃宗澤，她說：「理想類型啫，對佢只係尊敬。」身材吸睛的她不擔心追求者只喜歡她的身材，相處過就會見真章。問到可擔心「天然呆」嚇怕追求者？她說：「佢驚嘅話可能唔適合，覺得可愛就可能適合。（要對方月入10萬？）唔係，如果向結婚方向發展，希望共同收入有10萬，呢個數對我嚟講係可以有好嘅生活，同埋對小朋友負責，可以共同努力達成呢個目標。」
陳若思對於形容月入兩、三萬也屬「冇錢」的說法，她說：「唔係，要自己照顧到自己，唔好要我照顧佢，以前啲男友都唔係有錢。（唔要富二代？）有錢係一個優勢，揀我可能因為我靚，如果冇乜吸引人嘅地方，有錢就係吸引人嘅地方，係無可否認嘅好好條件，但唔係我一定揀你嘅原因。（同富三代鍾培生傳過緋聞驚被標籤？）唔驚，人哋都結咗婚，唔好講咁多喇！」
同場的GM與葉蒨文分享配對成功貼士，GM說：「公司嘅女仔見識比較多，一眼就睇得穿你心裏面諗乜，最緊要係真誠，女神都係想要錫佢嘅男仔，真心定係呃呃氹氹，佢會感覺到。」葉蒨文認同男友並爆料說：「我哋上季其實收到啲風，有啲參賽者表裏不一，我哋係知道嘅，就會出現唔信任，好難相處落去。」講到經常「天然呆」的郭珮文參與真人騷令人擔心，GM讚她外形是女神，但給他有周星馳的感覺，男士跟她一起會很開心：「佢呢種天然呆幾吸引，都係講化學作用，可能有啲男仔就係鍾意呢種性格。」葉蒨文亦說：「百貨應百客，佢嘅節奏感好得意，一定有人鍾意。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|