利辛度馬天尼斯被逐惹爭議。(Getty Images)
周二(14日)凌晨英超上演「玫瑰打吡」，自卡域克上任後翻生嘅曼聯，主場意外1比2輸畀列斯聯，45年來首次喺奧脫福輸畀呢支死敵。阿根廷中堅利辛度馬天尼斯「衰多手」扯對手頭髮食紅牌，成為曼聯輸波罪人。
曼聯已經超過3個星期冇比賽，上星期拉隊去愛爾蘭集訓，停賽嘅哈利馬古尼就由養傷2個月復出嘅馬天尼斯頂替，久疏戰陣下果然入局慢，5分鐘就被諾亞奧卡科接應傳中射入；29分鐘曼聯遲遲解圍不遂，被奧卡科再入1球。
落後2粒嘅曼聯力圖反撲，56分鐘出現爭議紅牌，馬天尼斯同卡維特利雲喺中圈爭波互有動作，但馬天尼斯出手拉扯對手長髮，VAR介入後判定「暴力行為」趕佢出場。10人應戰下曼聯仍未放棄，卡斯米路69分鐘頂入追成1比2，可惜最後返魂乏術。
今次係曼聯自1981年後，45年來首次主場輸畀列斯聯，唯一安慰係佢哋仍然排喺第3位，同第6嘅車路士保持7分差距，拎下季歐聯資格仍然樂觀。不過，馬天尼斯將會停賽3場，缺席對車路士、賓福特同利物浦3場大戰。
曼聯隊長般奴費南迪斯賽後怒轟球證判決：「球例演繹次次都唔同，我諗我唔可以講太多球證，因為我再講可能會引嚟大麻煩。」領隊卡域克賽後亦表示：「紅牌判決令人震驚，我哋已經連續2場出現不利判決，今場呢個係史上最差決定之一！」
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|