紐卡素今個夏天面臨星散。(Getty Images)
英超勁旅紐卡素財政問題加劇，據英國《每日電訊報》報道，呢支老牌球會今個夏天將淪為「散貨場」，辛度東拿利、安東尼哥頓同利夫拿文度已鐵定出售，般奴古馬雷斯同利維斯賀爾亦待價而沽，曼聯、曼城、阿仙奴、巴塞隆拿等豪門排隊搶人，準備瓜分「喜鵲」！
紐卡素日前公布24/25球季財政報告，表面上錄得3,470萬鎊盈利，不過同時證實上年6月，已將主場聖占士公園球場出售，賣番畀老闆PIF(沙特阿拉伯公共投資基金)旗下公司，「左手交右手」換取超過1億鎊收入，否則球會將錄得破紀錄嘅9,840萬鎊虧損。
由於歐洲足協禁止呢種「財技」，據報紐卡素將面臨巨額罰款，佢哋為終止連年虧損，今夏將賣走主力套現。紐卡素總裁鶴健臣喺財務發布會承認：「球會策略係做好買賣，買得好唔代表買得貴，賣人亦要睇準機會將利潤最大化，上年賣阿歷山大伊沙克就係好嘅賣人。」
鶴健臣承認主力離隊「有價講」，《每日電訊報》指意大利中場東拿利、英格蘭後衞利夫拿文度同前鋒哥頓將被出售，東拿利係曼聯同阿仙奴爭奪目標，利夫拿文度就係曼城獵物，利物浦就對翼鋒哥頓垂涎已久，賣走呢3個球星可望為紐卡素進帳超過2.5億鎊。
除此之外，般奴古馬雷斯同利維斯賀爾亦係可變賣資產，巴西國腳古馬雷斯受到曼聯同皇家馬德里關注，而巴塞隆拿就睇中利維斯賀爾。著名足球財務專家Kieran Maguire分析，紐卡素財政面臨爆煲，今季如果只爭到歐協聯資格，可能會考慮放棄參賽，以逃避歐洲足協嘅財政監管。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|