男團MIRROR快將推出新團歌，其官網釋出姜濤、Ian、Jeremy等6位成員的破格「Cult片」，雖然內容無厘頭，更被網民嘲笑集體失常，但仍然有大批「鏡粉」狂派Like，大讚亂髮姜濤夠型、雞叫Ian好可愛。
MIRROR預告將於本月27日推出今年第一首團歌，令粉絲大表期待。而組合官方社交帳號近日以「唧牙膏」方式上載各成員的無厘頭短片，為團歌宣傳造勢。打頭陣的隊長Lokman在片中木無表情發呆，但突然自摑一巴似拍蚊；之後再輪到Ian登場，他坐住滾輪椅在辦公室碌來碌去，聞一聲雞叫後，即忍不住發笑，再向鏡頭展現手上的塑膠雞公仔；而Alton捧着招財貓擺設，再隨手捉住擺動的貓手，一句「完咗㗎啦」頗有畫龍點睛之效；至於Tiger就大耍盲拳，還有用風扇仔吹鋼鎖的「開鎖佬Jeremy」；最後登場的姜濤則食住香香口膠對住鏡子整亂頭髮後便瀟洒走人。
由於每條片都令人滿頭問號，僅出現「CAN I GET YOUR ATTENTION」的字句，反而激起「鏡粉」的好奇心。有網民笑言人氣男圑集體失常，亦有粉絲力撐「我愛」、「我已經ATTENTION了」、「CAN I GET YOUR ATTENTION係咪新團歌名呀」。不少「鏡粉」期待其餘6位成員的短片，又讚內容有創意：「突然咁樣拍片宣傳團歌真係唔係好慣，不過咁樣宣傳我喜歡，唔識MIRROR嘅會以為佢哋傻傻哋，喺度做緊乜，麻煩Keep住」。而姜濤的短片僅上架一日，觀看次數就達33.2萬；Ian兩日累積37萬觀看量，其他成員亦逾17萬以上。
本文作轉載及備份之用 來源 source: http://hk.on.cc
|
鍾意就快D Share啦！
|
|
|