藝人楊思琦今日（24日）現身汽車品牌活動，並成為首批車主，她透露以優惠價購買，同場的兒子Kody也有幫手挑選給意見，她自認是家人的專業司機，問到何時換大屋？她笑言承大家貴言，談到有指她擁5物業，有半億身家，她避而不談：「我都唔知，默默努力工作，之前話我一個月賺幾百萬，係冇咁嘅事，絕對唔係。我只係小康之家，大家太抬舉我，我咁努力工作，只係想畀家人生活舒服啲，我有好多支出，否則唔使成日直播，我唔係富豪生活。（你老公呢？）大家財政獨立，我由細到大都好獨立。（佢冇幫你分擔？）唔需要講，當然屋企人同老公都係我嘅依靠。但唔需要對方畀幾多offer你，或者送你幾多車，呢啲都唔需要。（叫老公送呢架車畀你？）使乜人送，自己買，我係女強人。（收埋老公到幾時？）順其自然，冇刻意收埋，大家見到就見。好多人話我冇老公，其實係有，佢係素人，希望家畀啲空間，佢有佢工作，我有我打拚。（但一直冇人影到你老公個樣，好神秘。）睇吓呢個紀錄可以維持到幾耐，我哋都係正常生活，大家唔需要好奇，我係思琦。」
提到無綫近日深夜重播她與佘詩曼及郭羨妮主演的劇集《無名天使3D》，她笑言回看時最大感受是自己當年卜卜脆，有指當年她被另外兩人孤立，她即說：「呢件事唔講，啲人話我套套劇都話畀人蝦，係咪我有問題，我冇問題，但我唔會回應，過去就過去，我冇嘢補充。」她指開心劇集重播，被不少網民讚她的樣子跟以前變化不大，保養得宜。至於她最近在清談節目中講拍劇時到被前輩演員欺凌，她強調當日並不知道訪問問題，亦非刻意去講，又謂已經放下，笑言：「我其中一個優點係冇記性，加上以前跌傷個頭，記性更加唔好，唔開心嘅嘢最好唔記得。（網民推測你所講嘅前輩係商天娥，你唔幫佢澄清吓？）我唔講，已經講得太多，係唔係佢都唔會講。」
不過思琦就主動澄清被指戲屎問題：「我係憑呢部劇攞獎，如果我戲屎，我唔會攞到獎，你當監製係盲，又唔係太公分豬肉，所以唔好講和我戲屎或者冇熟讀劇本，我仲攞過女配角獎同國際獎項。」她自言有不少內地劇邀她演出，問到會否再拍無綫劇，她揚言無任歡迎：「我要回娘家。（同佘詩曼、郭羨妮、商天娥合作呢？）我唔介意。（同前度李泳豪合作呢？）我好Welcome，演員係要專業。」接着她又為盛傳她孤寒的傳聞而解畫：「話我攞拜神燒肉返屋企，唔係我主動攞，係有人提議我攞，而且我只係攞過一次，又話我唔萬歲，我係有萬歲，只係無人講，又話我連隔籬廠有人萬歲，我都走去攞，冇啲咁嘅事。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|