入行逾40年的黎耀祥演出過百多部電視劇，為戲劇人生忙碌大半生的他，近年刻意放慢工作步伐，在收成期好好享受正常人生活，樂得逍遙。不過，重感情的祥仔認為情還在，難以做到真正退休，若有好友叫到幫忙，絕不會托手㬹。
3屆視帝黎耀祥近年刻意將工作節奏放慢，以往劇接劇、一年有兩、三套劇集上映，但現時熱播中、他與龔嘉欣、丁子朗合演的無綫劇集《香港探秘地圖》已是兩年前拍攝。當年憑着《巾幗梟雄》在內地打響名聲的他，至今依然受歡迎，獲不少廣告客戶垂青，不時登台演唱、直播帶貨，所以大多數時間都留在內地工作，他直言放慢腳步有多方面原因，包括市場萎縮、觀眾口味轉變，以及年紀問題，他日前接受本報專訪時坦言：「自己都唔係細，日捱夜捱就好難，心態都係一個問題，唔同後生嘅時候，咩都去衝、咩都想試，好似海綿咁吸收唔同嘢，依家反而精益求精，總結經驗攞啲精髓出嚟擺落角色。」
近年大環境不景氣，電視到電影製作量大減，祥仔看見電視圈由黃金時代的盛轉衰未有感到唏噓，反而用感恩、樂觀的心態看待：「我都幾好彩，經歷咗咁輝煌嘅電視年代。每個行業都有高低，唔講得上唏噓，經濟唔好影響好多行業，唔係剩係影視圈，喺潮流巨輪底下，你只能夠去適應。」
演出過百套劇集的祥仔不乏代表作，例如《西遊記》系列、《楚漢驕雄》、《樂壇插班生》、《巾幗梟雄》系列、《大太監》等，過去數十年絕對是「戲劇人生」，日夜顛倒趕工，直至現時收成期才樂得逍遙，好好過「正常人」的生活，他說：「依家工作量唔係咁多，個仔又大，好多嘢都放輕咗，年紀又有番咁上下，係沉澱收成期。以前搏又搏過，幾日唔瞓覺、荒山野嶺惡劣嘅環境、40度拍古裝黐頭套乜都試過，依家靜落嚟，反而覺得人生可以有唔同階段。以前好似做咗好多嘢，但生活上冇乜感覺，好似喺屋企煮吓飯、行吓超市咁，以前邊有時間做？根本就忙到冇時間返屋企，好嘅返屋企食完飯又返去開廠，跟住瞓3、4個鐘又拍外景，以前忙碌到好似唔記得咗生活係點樣，正常人係點㗎呢？覺得自己好似唔係好正常，好多嘢都唔知。」
成功之道：永不Say No
由配角到視帝，祥仔演活不少經典角色，如「豬八戒」、「籮記」、「柴九」、「劉醒」等，原來能夠成就角色，全因對監製、編劇的信任。眾所周知，祥仔從不推劇，更不會揀角色，連接劇拍亦不會太過問跟甚麼演員合作，他說：「人哋搵得你就覺得你嘅元素係啱，咁樣成功嘅機會大啲，所以咁多年都冇推劇。自己由配角開始，有得做已經好好，所以習慣咗唔會推劇，反而可以鍛煉平時處理同解決難題，做配角就係要配合主角入到主題，啲唔就手嘅嘢你要去迎變，令到你產生好多能力。」喜歡演小人物的他更不介意由主角變成配角，坦言此時此刻也想不出有甚麼角色特別想演：「反而做配角發揮可以好大，劇本寫得好，配角仲吸睛過主角添！我唔介意，都有人搵我做配角，但係冇乜興趣，因為個角色唔好玩。」
入行逾40年的祥仔現時樂得清閒，但對於真正退休，他認為做幕前難以言休，因為多年來認識的朋友，大家建立了關係，情還在總有人找他工作。去年胡定欣、蕭正楠與曹永廉分別在內地開演唱會，祥仔二話不說就答應擔任嘉賓，日前又踏上紅館為張德蘭演唱會助陣。他相當珍惜這份感情，朋友叫到總不會托手㬹，他說：「人生就係經歷，撞過咩人、做過咩事、去過邊度，呢啲就係儲儲埋埋嘅資產，老咗諗番就好開心，我好珍惜呢樣嘢。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|