藝人莊思明與楊明今日在馬來西亞舉行婚禮，在婚禮上互講誓詞，思明表示：「唔經唔覺一齊10年，冇想過同一個人生活10年係咩感覺，直至我遇到你，我知道我脾氣唔好，成日鬧你，有時你都會鬧番我，我好多謝你永遠都會做道歉嗰個先，好多謝你包容我嘅一切同遷就我，好寵愛我，我知道你為我改變咗好多，你由從前乜都唔諗，每日只係嘻嘻哈哈嘅大細路，變成一個願意去承擔所有責任，每日都好努力去顧照我嘅大細路，我同你呢10年可謂歷盡風雨，經歷過一段不平坦嘅路，令我更加肯定我哋可以一齊走得更加遠，我曾經聽過一句說話，一個人離開你可以有千千萬萬個藉口，但佢要留低只需要一個理由就係愛。我哋兩個都唔係嗰種會成日講甜言蜜語嘅人，但我心入面知道你有幾緊張我，每當我覺得日子好徬徨好恐懼嘅時候，你都會及時攬實我畀最大嘅安全感我，叫我唔使驚，因為無論發生咩事，你都會喺我身邊，多謝你願意成為我嘅避風港，我好多謝你陪我走過每個高山低谷，我更加感激你愛鍚我嘅同時，亦都非常愛鍚我嘅家人，特別係我媽咪，多謝你對佢無微不至嘅愛同照顧。」她承諾：「今日我正式成為你太太，我應承你我會盡量少啲鬧你，多啲愛錫你，同埋包容你最難頂嘅拖延症。」台下賓客聞言即時發笑及拍手，她續說：「我會一直做你最強大嘅後盾，等你可以放膽去追尋你自己嘅夢想，喺未來日子入面我會拖住你隻手一齊面對所有快樂同挑戰，多謝你令我成為你嘅女主角，I love You。」
至於楊明則謂：「老婆，唔經唔覺我哋已經拍咗拖10年，喺呢10年好多好開心嘅時候，亦有好唔開心嘅時候，我知道大部分係我帶畀你，我記得我哋剛一齊時，我拍劇時揸電單車炒車入咗醫院，你唔單止喺醫院日日陪我，我出院後，你每日都幫我洗傷口，你唔怕個傷口恐怖，其實嗰時好感動，應該唔係咁多人做到，何況我哋剛喺埋一齊，到我喺人生最低落嘅時間，你唔止要對住一個冇嚟神氣，同日日借酒消愁嘅男友，仲要面對外界好多嘅壓力，我知道你係好辛苦，但你喺辛苦入面都諗好多活動同飯局，好多健康嘅運動畀我去做，令我冇時間去鑽牛角尖或者諗啲唔開心嘅嘢，呢啲我全部都知道，呢段時間我真係好多謝你，冇咗都唔知點過，我曾經喺你爸爸面前應承過你，我會照顧你一生一世，今晚多謝你畀機會我開始呢個承諾，多謝。」兩人遂交換戒指及當眾接吻3次合共近20秒，然而，身為主持的莊思敏不小心，將合法「丈夫」變「妻子」，思明即時着對方冷靜。
兩人隨後多謝父母，思明稱：「多謝你哋畀我哋過上較富裕生活，但從來冇縱壞我哋，你哋令我哋學識要腳踏實地努力做人，我知你覺得我最近畀咗好大壓力你，因為你話我迫得你好緊，但因為我真係好愛你，好緊張你，我先會變得咁急躁，希望你願諒我嘅脾氣，今日連你最細嘅女都嫁人，我哋四個真係長大，唔需要再擔心同為我哋而操心，希望你可以為自己努力、照顧好自己身體，你要加油，我哋一定會喺你身邊陪住你，再辛苦嘅路只要家人喺身邊我哋一定可以戰勝困難，媽咪多謝你畀我嘅一切，多謝你做我媽咪，如果有得揀我希望生生世世你都做我媽咪，我真係好愛你，希望你都好好愛你自己。」
她邊說邊哭，身邊的楊明亦忍不住落淚，並細心地將紙巾遞給太太，他哽咽說：「你放心，交佢畀我，媽咪，加油，我哋好愛你。」又不忘幽默表示：「將最麻煩嗰件交畀我，我幫你頂咗佢。」其後他感謝父母：「媽咪多謝你一直咁錫我，我係曳啲，但我好愛你，多謝你湊到我咁大，好關心我，我會生性，放心，呢件難搞嘢交畀佢（思明）。爸爸多謝你，我知你唔鍾意講嘢，唔係好達自己，但我知你好錫我，有次我離家出走兩個月，畀我爸打到我離家出走，佢好大男人，但最後都頂唔順，去咗我打籃球嘅球場邀請我返屋企。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|