視后楊茜堯、視帝羅嘉良（撈家）及陳煒多位演員日前為新劇拍攝煞科戲，茜堯今次再跟撈家合作默契十足，大讚對方是「喜劇之王」，望有機會雙劍合璧拍喜劇放笑彈。撈家指今次角色難演，很有衝擊力，並對同劇的後輩有讚冇彈。而陳煒當日開工期間中暑頭暈，眼前一片灰黑，醫生老公緊張到場照顧。
由鍾澍佳總監製的無綫新劇《模範律師團》不久前在香港拍攝最後一場重頭煞科戲，當日氣溫高達37度，視帝羅嘉良偕視后楊茜堯、陳煒、劉佩玥、張曦雯、滕麗名及何廣沛等在金鐘的高等法院門外開工，眾人在酷熱天氣警告下以秋冬裝上陣，相當悶熱，雖然拍到滿身大汗，但現場充滿歡樂氣氛。
對於劇集完成拍攝，茜堯開心又不捨，尤其感嘆跟撈家相隔多年再合作仍默契十足，她說：「我哋嘅默契唔係我同其他男演員嗰種要拍好多場戲去培養，而係好自然就知道對方諗乜，大家嘅演繹冇需要綵排，一Take過就做到。」她指大家劇內嚴肅，劇外則充滿笑點，希望下次合作拍喜劇：「佢話我好識搞Gag，其實我唔係，但有佢帶住冇問題。佢係喜劇之王，好有喜感，我想跟佢學吓拍喜劇。」提到連日在高溫下拍外景，她坦言辛苦，但開心與撈家在鬧市出沒為途人帶來驚喜：「我哋仲要唔係做普通嘢，係要拍追逐同撞車場口，途人見到我哋都好開心。」
煞科帶仔女出埠玩盡
早前茜堯獲老公羅子溢帶同一對子女到深圳探班，她稱剛巧當日沒通告才可以享受親子時間，又大讚老公稱職，除了帶小朋友探班，又輔助子女學游水及安排連串暑期活動，讓她可以安心拍劇，而她完成拍攝後就會火速回歸家庭：「有少少遺憾嘅係，拍完套劇我陪唔到大家食收工飯，因為小朋友好快開學，我想帶佢哋外遊，加上小朋友升小一，功課會忙啲，希望今個暑假玩盡啲。」
而撈家染了一頭白髮，頭髮濃密的他受訪時表示：「我啲頭髮係真㗎！之前拍《家族榮耀》嗰陣，阿佘（佘詩曼）都問過我個髮型師究竟我啲頭髮係咪真，當然係真我鍾意試新嘢，呢個新造型都好鍾意。」他又指今次跟劇中演員合作得好開心，大爆角色「好難演」：「因為關係好複雜，衝擊力好強，我同楊茜堯拍咗好多場重要嘅戲都好正。呢套劇各樣都好好，劇本、演員都好好，好似陳煒、滕麗名、張曦雯、何廣沛、劉佩玥，大家好努力，所以拍得好開心，我覺得好幸運，今次返嚟遇到咁好嘅演員。」
至於陳煒就拍到中暑，她聲沙沙表示：「因為太熱太曬，件西裝褸又紮住條腰，頭先眼前灰晒，瞓咗一陣休息，但中暑後把聲就沙咗。」她指醫生老公剛好收工，所以趕了過去拍攝現場，問到之後會否到診所或醫院作檢查？她笑說：「有個醫生喺隔籬，唔使去。」她又透露經過兩個月的密集式拍攝後，9月會去登台及錄製綜藝節目：「去旅行最快都要9月底，因為係結婚周年。」
劉佩玥抓緊分秒 跟帝后學戲
作為後輩的劉佩玥首次跟羅嘉良及楊茜堯合作，大感興奮，坦言合作得相當愉快：「我瘋狂問嘢又同佢哋玩，珍惜每一分每一秒嘅機會去請教佢哋。」她讚撈家很幽默，是一位不可多得的前輩，茜堯則非常直率又樂於分享：「我喺演技上同生活上都成日煩佢，有時拍完一Take，自己都唔係好肯定嘅時候，佢就會主動幫我。」
至於劇中飾演撈家老婆的滕麗名雖然久未拍正劇，但表示沒有不習慣：「OK，幾好玩，我個角色有爭議性同反傳統，所以好有挑戰。」
張曦雯失味覺嚇餐飽
藝人張曦雯（Kelly）之前為《模》劇在深圳進行了為期一個多月的拍攝，過程愉快。拍攝期間撞正大熱天時，但她為配合劇情需穿上厚重的冬季套裝，幸好全程順利，未受風雨影響而延期，不過她自爆一度失去味覺，以為確診新冠病毒，幸好只是普通感冒，休息後已迅速康復。
談到劇中角色，Kelly笑言律師戲份難不倒她：「之前拍過《踩過界》，都有少少打官司經驗。」不過今次角色層次豐富，更要與劇中其他角色進行對抗，是頗大的挑戰及新嘗試。她開心可以與多位未曾合作的演員交手，大讚楊茜堯性格爽朗、親切又懂照顧人，而且很有幽默感。提到羅嘉良，Kelly更是滿滿感激：「佢係我師傅，好體貼，可能知我哋後輩會緊張，第一日就主動同我哋傾偈、壓低自己嘅氣場，令大家拍得好舒服。」提到她早前曾表示為拍劇暫居深圳，會否影響她照顧愛貓？Kelly表示間中會返港一、兩日處理家務，而談及飼養的新貓「冬菇」，她笑說：「佢好頑皮，貓BB成日跳跳紮。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|