藝人古天樂早前唱完紅館，即轉戰澳門開唱，澳門站尾場尋晚（30日）舉行，「信一」劉俊謙終登場做嘉賓，同林峯和胡子彤合唱《跳舞街》，成功令《九龍城寨之圍城》「城寨三子」合體，跟住古天樂出場，孖三子合唱《最緊要好玩》、《Monica》，全場high爆。劉俊謙台上賣口乖表示：「我本身唔係歌手，我自己就好努力咁聽晒你所有歌。」古天樂霸氣即場叫佢唱《杯麵》，當然考起劉俊謙：「咩呀？畀背面你睇？」劉俊謙隨後知衰，即刻跪地道歉：「對唔住老細！」，爆笑收場。
同場，仲搵埋男團MIRROR成員姜濤擔任嘉賓，姜濤話MIRROR出道時，已經得到古天樂鼓勵，每次開騷佢好嚴肅坐喺觀眾席，自己就會好緊張，今次終於見到古天樂其他表情，姜濤仲變百厭姜，融化男神。前晚（29日）姜濤偶像、台灣舞王羅志祥（小豬）任嘉賓時，因作狀撒嬌，成功於舞台上被古天樂「新娘抱」，姜濤亦有樣學樣，向古天樂提出要求，希望可以畀佢抱一次，更模仿小豬擺撒嬌甫士，最終成功公主抱古天樂，全場尖叫拆天。
而姜濤騷後都超興奮，一口氣貼出多張靚仔相，Chok到震驚艷網友，又捉實另一嘉賓「阿姐」汪明荃合照，仲吸引到小豬留言：「小老弟 帥喔 瘦瘦的姜姜回來囉」兩大男神惺惺相惜。
本文作轉載及備份之用 來源 source: http://hk.on.cc
|
鍾意就快D Share啦！
|
|
|