藝人陳庭欣今日（10日）出席活動，向來熱愛運動的她，笑稱跑步是其弱項，因覺得長跑比較單調故很少跑，提議她可找個男士陪跑？她笑指打匹克球會有很多人陪，又指近來工作大都圍繞和運動有關，她笑謂：「依家着運動衫仲多過晚裝，似半個運動員，10月出戰香港一項匹克球大滿貫比賽，遲啲會去越南跟教練訓練。」
談到她上月27日迎來39歲生日，獲大班好友為她舉行生日會，當中包括曾一度傳出緋聞的上位鮮肉曾錦燊，和被指為博紅顏一笑而負責為生日飯買單的謝東閔。陳庭欣笑言當晚飯局是由一班同事安排，大家都不知道謝東閔原來已買單，對於有指兩位護花使者於大合照時一左一右企「主人家」位置，她笑稱只因他們較高才站於後排：「我同閔大人同期入行，識咗15年佢都係第一次請我食飯，咁多年除返開，都幾抵請。」她指對方也愛打匹克球，間中會相約打「友誼波」，歡迎大家相約他們打波，更笑言不介意跟對方一起出活動搵真銀。
陳庭欣坦言未有感到獲兩位護花使者追求，又指過往的男友年紀都比自己大，笑言自己思想較成熟故不敢亦未有考慮過「小鮮肉」。提到她明年將步入「4字頭」問可會心急找對象？她指不會被年齡框住，直言身邊有不少人到40歲仍在尋覓真愛，對於謝東閔印象，她説：「好高囉，最近多咗一齊打波。（為追你學打波？）唔係，我哋係分開學，後來知道先一齊打。（打波提升友誼？）打友誼波？分到勝負囉，哈哈！」她透露跟對方有意合作搞有關匹克球生意，但要待成事再公布，問到對方可有相約她一起過中秋節？她搞笑指當晚要在公司主持節目：「食燈籠玩月餅！（同你玩月餅？）又關事？如果中秋約我，送個一比一人形攬枕畀佢。」
陳庭欣指大家太關注，只是吃餐飯或打場匹克球便傳緋聞，但大嘆現實中感情仍然空白，又大讚《女神配對計劃2》的求愛勇者高質：「我留意到有冷氣師傅，即刻檢查自己屋企部冷氣有冇壞，哈哈！」問她可有考慮參加《女神配對計劃2》踢館環節？她笑指反而想當「花生團」，幫一眾女神好好過濾。
本文作轉載及備份之用 來源 source: http://hk.on.cc
|
鍾意就快D Share啦！
|
|
|