男團MIRROR昨日現身記者會宣傳12月舉行的團體演唱會，現場突變「和解大會」，姜濤坦言不介意Edan跟曾有「牙齒印」的組合JFFT合作；Ian亦尊重Anson Kong（AK）與反目的音樂人合作。向來火爆的AK全程「寸神」上身，黑面之餘更周圍辣火頭，令人費解。
即將迎來成軍8年的MIRROR，昨日宣傳12月假亞博舉行的8場演唱會《MIRROR 12 AS 1 LIVE 2026》，12子全程表現相當平淡。Tiger回顧過去最難忘的回憶時，感性表示：「每一個當下都好值得記住，我想代表MIRROR多謝公司，畀好多資源我哋。」怎料AK突然爆Seed，似乎寸Tiger「擦鞋」：「我呢8年，最難忘係你依家變成咁，依家大個仔，好叻。」
姜濤早前偕馮德倫合拍以「跌落海」為題材的廣告，被指以去年在西環墮海一事自嘲，姜濤笑笑口說：「我一向好鍾意自嘲，個劇本好玩，但冇真落水嘅，就算真落水都可以，因為有經驗。（識游水？）依家都識識哋。」談及姜濤曾為隊友出頭，在網上留言反擊組合JFFT的床哥暗寸Edan「只顧拍拖外遊」，Edan近日卻零酬勞為JFFT與黃淑蔓的合唱歌拍MV，被指「掉轉槍頭」，Edan解釋：「係黃淑蔓邀請客串MV一個角色，當初都有考慮同理解大家會有唔同嘅情緒同感受，唔係要強迫大家鍾意，只係覺得大家有唔同選擇，當幫朋友或遠觀啲，一齊做好件事，令呢個圈唔好咁多怨氣。（同JFFT破冰？）睇吓點定義破冰，又點為之結冰呢？」Edan直言事前已告知姜濤，姜濤淡然指選擇尊重：「覺得唔需要因任何人而影響任何人嘅選擇囉，喺呢行大家都想互相尊重啫。」
AK九唔搭八「寸神」上身
隊中感情最好的Ian和AK同樣面臨友情考驗，事緣AK新歌《傷心萬里通》作曲人Anson Poon及監製陳考威，正是Ian爆出抄歌風波而反目的前好友，問到Ian可有聽AK新歌時？AK似有不滿寸爆：「呢條問題唔夠直接。」Ian則大方指絕不介意：「我係個只專注自己事嘅人，同埋會關注一啲關心我、愛我嘅人佢哋點樣，呢個世界咁多嘢，好似Edan話齋邊管到咁多，雖然我哋係一個組合，但每個人喺自己Project上面都有好大嘅自主權，每個人都有自己嘅選擇，我哋冇權干涉其他人點做。（AK事前有冇同你講？）冇，點解佢要同我講？」
雖然Ian表明跟AK情未變，但AK仍然不改寸嘴本色，問到演唱會可否在聖誕節加場？AK亂噏表示希望加到明年2月4日：「一加就加到年廿八，我心裏面最近嘅日子就係年廿八。（點解？）順口。」問AK在中秋節上載舉中指的貼文，隨後又刪除，他霸氣表示：「個帳號係我嘅，鍾意出咩咪出咩囉！唔使咁多擔心。（你唔開心？）我開唔開心都唔關你事。冇乜特別，我向來都係咁，冇乜特別事發生，我鍾意咪出吓囉。」
至於隊長Lokman被問到可有信心打破16場的演唱會紀錄時，他表示：「紀錄嗰啲好虛，最緊要大家Enjoy個舞台。（有網民話門票最貴1,680元，售價偏貴？）因為今次係M字台，設計特別兼有新花臣，較前位置嘅觀眾會有沉浸式體驗，好似畀我哋包圍住，同我哋一齊喺舞台上表演咁刺激，所以就貴少少，Sorry啦。」同時大會指12月18日是「MIRO專場」，將推出8周年紀念相集及舉行線上簽名會。
Anson Lo讓「露」拒做騷肌擔當
近來忙於拍攝港版《金秘書為何那樣》的Anson Lo（AL），昨日透露劇集正式煞科，他前一日在社交網上載跟劇組打邊爐的合照，問到是否提早慶功？他表示：「冇提早，只係一齊食個飯，嗰日邊個出席到就出席，我哋唔齊人，但都好開心，要多謝郭子豪，佢係搞手。」問到是否開始戒口以備戰演唱會？AL自言近半年都以清淡飲食為主，至於會否成為演唱會的騷肌擔當？他謙稱：「我應該唔係騷肌擔當，Stanley先係。」
提到活動前，歌手Serrini與母親恰巧在附近，其母欲留下跟AL合照，但遭Serrini拒絕，AL笑言合照無任歡迎，又慫恿伯母成為MIRO，可優先訂票，相當搞笑！活動後，他在社交網上載影片多謝粉絲支持，又自爆昨日因身體抱恙而狀態不佳。
Jeremy Tiger隨時拍BL劇
Jeremy最近推出個人單曲，邀得Tiger合演MV，更加入BL元素，有不少親密鏡頭，睇到粉絲嘩嘩聲，Jeremy笑言：「我就係想有呢個效果，做呢樣嘢都係想粉絲開心同有新衝擊。（下次再激啲？）仲可以點激？驚粉絲爆血管。」他預告演唱會上會跟其他隊友有類似演出，着大家好好期待。問到兩人是否願意拍BL劇？他們異口同聲表示願意，若公司開拍便會出演。
此外，Jeremy表示生日當天正好要拍攝組合新MV，難得集齊12子為他慶生，相當難忘，Stanley即打趣指自己是迫於無奈，Jeremy反問：「你唔開心咩？對我係好好嘅回憶。」他稱生日願望是大家開心、工作順利和演唱會大賣。
本文作轉載及備份之用 來源 source: http://hk.on.cc
|
鍾意就快D Share啦！
|
|
|