藝人吳卓羲與張曦雯（Kelly）今日（25日）出席無綫台慶劇《璀璨之城》宣傳，受訪時卓羲自認是怕醜仔，問到兩人發展如何，他再次叫大家給予空間：「幾好。（約咗出街未？）唔話畀你聽，秘密，總之開心就得。（林峯話你幾十歲係時候？）佢都係幾十歲先結婚，佢哋問我嘅話，我會親自交待，如果佢哋問，但佢哋唔會問。（帶埋Kelly一齊交代？）搵日啦，最近我喺內地拍劇，基本上我冇見過佢哋。（連Kelly都冇得見？）晚晚見，睇電視。」講到兩人要異地戀，Kelly笑指對方只是在珠海拍劇，相距不遠，問她會否去探班？她說：「睇下有冇機會。」
另外，之前Kelly受訪時不慎爆粗講「Ｘ街」，被網民指因近得卓羲多，Kelly即時護愛：「我講粗口都唔係第一日，我打機都有講，以前講英文，呢排講廣東話。（邊度學？）使乜學㗎。（係咪因為近得卓羲多？）唔使佢教我自己都識，廣東話叻咗，加插吓。」她解釋見到電視劇也會播這兩個字，以為無傷大雅。
卓羲指有人將張智霖之前講粗口也歸咎於他，他直言：「張生嘅嘢關我咩事，好多人都講過，可能我太惹火，但我冇聽過Kelly講粗口。（佢喺你面前好斯文？）梗係要。」不過，他強調大家不會再在公眾面前講：「總之我哋唔會再咁，費事教壞小朋友，作為公眾人物唔可以咁。」Kelly也謂：「我知道嗰兩個字唔得㗎喇！」
另外，談到Kelly的劇中的大尺度場口，她坦言：「收到劇本時有少少猶豫，因為尺度大，冇試過，停拍亦都唔係因為我嘅猶豫同Say No，而當時亦即刻搵咗另一個方案去拍呢場戲，其實都冇嘢，最後拍出來都OK。（唔係受壓力而拍？）最後點解去拍，因為停咗之後劇本有修改，我同卓羲個角色較多修改，當然要睇吓合唔合理去拍，修改咗後加上對個團隊嘅信任。因為我同監製係第一次合作，亦都要視乎自己舒唔舒服，我猶豫係因為同大家初時唔熟，同監製同演員都係第一次合作，因為種種因素而停拍，完全而唔係因為呢場戲，期間大家有聯絡傾劇本、有綵排圍讀，大家熟絡咗，多咗溝通，之後再講呢場戲，從個角色去出發去睇係合理，嗰場戲係會衍生好多對劇情推動，嗰場唔係只關於除唔除衫，而係情緒上好多推進，係一場好高挑戰，7分鐘5頁紙對白，要好多準備。（有話係因為陳瀅肯拍，你先拍？）梗係唔會啦，我相信好佢哋為個角色去做一個決定，都係為劇情，點會爭住除衫。」
至於袁詠儀與江美儀做說客一事，她說：「我同佢哋兩哋之前喺《模仿人生》合作，我好多嘢都同佢哋傾，平時都會約出嚟一齊食飯，除咗嗰場戲，其他戲都有傾，我有問佢哋意見，係我問佢哋，平時個人嘢，甚至其他場口都有傾，嗰場戲我都有接納佢哋意見，加埋我自己從角色去諗，對團隊任信拍咗。（卓羲有冇畀意見你？）問女前輩較適合。」問到卓羲意見時？他笑言：「前輩我又唔夠張智霖前輩，又唔夠監製前輩，我係最冇資格講嗰個。（你哋關係非比尋常。）我覺得兩個字講完『專業』，做戲之嘛，拍出嚟係好睇同順住劇情去，成個故事好睇。」
至於Kelly被問是否性感底線時，她認為要視乎劇情合理性及自己是否能接受，對於監製稱接到投訴，該幕未知會否會被刪剪，要由公司決定，問到若被剪掉，會否感可惜？Kelly說：「咁當然，除咗我仲有其他演員，有台前幕後，大家咁努力去拍，我哋好相信個劇本先去拍，如果冇得原整出嚟，咁都拍咗點解唔播，我希望大家睇咗先，仲有好多場戲，我個角色都好慘，愛老公愛到冇底線。（你同陳瀅性感程度邊個犀利啲？）完全係兩樣唔同嘢，相信大家睇我嗰場個焦點唔係性唔性感，大家嘅情緒谷到最後係個個都喊晒。（有啲圈中前輩認為尺度大，唔需要咁拍，你點睇？）每個演員都係覺得角色合理而去做。」而卓羲亦主動發表自己意見，曾在劇中露股的他以過來人身份說：「我都拍過好大尺度戲，好大心理陰影，好在都見得吓人，我同林峯拍時，導演到現場先話畀我哋聽，導演話係劇情，我同阿峯研究都覺得試吓啦，無問題。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|