
肥媽透露台慶上除了會與《中年好聲音》唱歌跳舞外,更預告會挑戰熱爆舞步「閃身步」,雖然難度高,但幸好自己最近有在家裡操練,「可能佢哋見我最近成日喺屋企跳舞,所以就諗起我。」並呼籲觀眾拭目以待。

霸氣回應無緣《中年5》:唔係你話事,亦唔係我話事
對於網民猜測她與周國豐被「Foul」出《中年好聲音5》評審席,肥媽直言節目尚未正式開始,但之前公司曾向她提及過有這個節目,現在落實當然最好。被問到會否主動向無綫高層「問一問」究竟,肥媽坦言:「梗係唔會問啦呢啲嘢!(妳係節目台柱喎?)你話啫,我喺你個台就柱了。唔可以咁樣㗎嘛,梗係等上頭嘅命令落嚟㗎嘛!又唔係你話事,又唔係我話事,係咪呀?我哋呢啲『On Call』,你叫我就返工,好簡單㗎咋嘛!」
肥媽更自爆未來八個月的檔期早已爆滿,已叮囑經理人及所有Agent在《中年》系列暫停期間「盡量畀我做嘢」。她細數未來行程指,20日便飛往美國登台,其後更要連飛三藩市、洛杉磯、多倫多、新加坡及雲頂等地巡演,笑言自己在《中聲5》前是「空中飛人」,將主持《中聲》時的錢,一次過賺回來。
肥媽稱最開心是,登台賺錢之餘,又能探望一下在外國的孫仔孫女,並會將全部歌酬貢獻給他們,「而家啲錢唔使唔值錢架啦,做婆婆、嫲嫲,最開心就係可以『跌』錢。同埋啲孫仔孫女知我嚟,已經講明想食啲咩,又乾炒牛河、豉油雞,仲有蘿蔔糕,好刁鑽。不過,食嘢係可以俘虜晒佢哋個心。」
樂意提攜後輩
雖然未知能否再任《中年5》評審,但肥媽對過去幾季的《中年好聲音》參賽者充滿感情,直指當這班學員是自己的「仔女」,即使未能入十強的,她和黑妹也會為學員爭取工作機會,直言作為前輩應該「伸隻手去拉一拉」後輩:「人哋叫你一聲前輩,你點樣去做人前輩呢?好似《中聲1》時,我喺紅館開演唱會,寧願自己唔唱Encore部分,都要畀晒佢哋上去,因為我唔知你呢一世有冇機會上紅館唱歌,但呢個機會我畀你,希望你一生難忘。」
本文作轉載及備份之用 來源 source: http://www.hk01.com
|
鍾意就快D Share啦!
|
|
|


