2013年12月12日 星期四

[壹週刊 1240] 緋聞女友捱插 霆鋒護 JM:佢係好女仔! JM,謝霆鋒,霆鋒,文詠珊,M1,




探熱針

緋聞女友捱插 霆鋒護 JM:佢係好女仔!

與張栢芝離婚後,變回圈中鑽石筍盤的謝霆鋒感情一直無著落,直至近日才傳他與女神 Janice Man(文詠珊)秘密撻著數月。據知,有人背後安排飯局,打算撮合「霆 M」,可惜兩個撻唔著。無辜背上霆鋒緋聞女友之名, Janice Man慘遭網民圍攻,不忍女方受傷害的霆鋒,唯有出面捍衞:「佢係好人嚟!你哋唔好咁對佢。」

10/12

本週二北上的霆鋒,見 Janice Man與他傳緋聞後遭網民圍攻,即出聲保護對方。

追問二人有否發展機會,霆鋒聽罷只報以一笑,莫非暗示關係萌芽中。

朋友做媒

Dry足兩年,霆鋒到今年中才與內地女星周迅傳出緋聞,繼而再被指秘密發展「霆 M戀」。外傳二人由妹妹謝婷婷一手撮合,霆 M還雙雙出席朋友飯局,互攬互餵,表現親暱。但據悉霆鋒與 Janice Man是經另一位共同認識的朋友介紹,並非婷婷經手。對方見男方失婚,女方亦與初戀男友甩拖近一年,於是在自己的生日飯局上,刻意撮合兩個筍盤。朋友撥行大葵扇,可惜曾被情傷的「霆 M」,根本唔敢行多步,只能維持做普通

朋友。

「佢哋認識之後係好好傾,但未至於去到可以拍拖階段。始終霆鋒經過婚變一役,對感情好謹慎,又唔想觸動前妻神經,影響同兩個仔見面機會,加上佢偏向鍾意成熟女人, Janice Man根本唔啱霆鋒胃口。而 Janice Man自己身邊亦有好多觀音兵圍住,唔一定要揀霆鋒,佢兩個只係間唔中通嚇 Whatsapp嘅朋友。」知情者爆料說。

「霆 M戀」爆出後,上週為新電影開工的 Janice Man承認跟霆鋒有齊齊出席飯局,但關係只是好朋友。

未有真命天子出現的 Janice Man,早前被發現在夜店連番醉爆。

從來是網友寵兒的 Janice,與霆鋒傳緋聞後竟被網民圍攻,幸而男方公開護航,抵番!

離婚後的霆鋒感情雖未有著落,但事業更勝從前。他孭飛的新片《救火英雄》即將上映。

有事業又識烹飪的霆鋒,被冠以鑽石筍盤。

四哥開到聲催霆鋒快啲拍拖,睇嚟佢都好想「霆 M」撻得著。

外傳婷婷是一手撮合阿哥同女神 Janice Man好事的人,但其實撮合二人的是一名圈外朋友。

開聲護花

Janice跟時裝店太子爺,初戀情人李冠峰拍拖七年,終在去年甩拖。之後傳與霆鋒撻著,睇嚟佢同鋒字幾有緣。

唔想緋聞影響友情,二人同樣以「單身」回應事件,盡量預留一線,保留將來發展的機會。上週五(十二月六日) Janice Man與張家輝、朱千雪於銅鑼灣拍攝新片時,被追問「霆 M戀」一事,她只說:「我哋係有個共同朋友生日,所以一齊出嚟食飯囉!」

雖然已主動否認緋聞,但前謝太張栢芝的 fans,卻咬實 JaniceMan唔放,指她黐霆鋒搏宣傳、搏出位,無辜成為網民箭靶。

一向對負面新聞懶得出面澄清的霆鋒,本週二(十二月十日)早上飛往北京出席活動,知道 Janice Man被狂插,決定開口護花,「佢係好人嚟㗎,你哋唔好咁寫佢,總之我哋只係好朋友。」問霆 M戀可有發展機會,霆鋒繼續 cool魔上身,只笑一笑,不肯回應。

有霆鋒開聲撐,並確認「好友」地位,捱鬧的 Janice Man總算得到安慰。本週二(十二月十日)出席活動時回應說:「係囉!我哋只係朋友,其他乜都唔係,你哋唔好諗多咗!」

四哥催拍拖

見霆鋒感情未有著落,老豆四哥謝賢也開到口催促。「佢拍拖都好應該,我都想呀!」對於霆鋒與 Janice Man緋聞,四哥沒有否認:「呢啲我唔識講,佢嘅私事,我唔參與意見,所以你哋問唔到啲咩,唔好問我啦!」

離婚後「有價有市」的霆鋒,幾乎撻著的緋聞女友,其實只得周迅一個。據悉鍾情成熟女人的霆鋒,周迅原本是最佳人選。女方為近水樓台,更來港租下霆鋒入住的金鐘柏舍,實行與他為鄰方便埋手。但周迅的辣椒妹性格,最終令霆鋒卻步。「雖然佢同周迅好啱 key,但阿仔(霆鋒)身邊朋友都勸佢諗清楚,因為周迅同佢前妻性格一樣咁辣,無謂鍾意個翻版啫。」知情者爆。

為免一場無米粥令前妻發癲,霆鋒索性搬離栢舍,遷入未裝修好的寶雲道新居,與周迅緋聞劃清界線。不出所料,明知係假的栢芝,依然出招玩嘢,忽然帶兩子移民加拿大,之後再居留新加坡,隔絕三父子見面機會。有兩個仔做籌碼,栢芝一日未放得低,霆鋒要投入一段新關係,始終諸多顧忌。

與 Janice Man扯上關係前,一向偏愛成熟女人的霆鋒,今年中傳出與大他六年的周迅撻著,女方更被拍到來港租住霆鋒居住的金鐘栢舍。

與周迅傳出緋聞後,為免愈描愈黑,霆鋒索性搬離栢舍,遷入寶雲道新居,同周迅緋聞斬攬。

成熟口味

今年 33歲的謝霆鋒,一直鍾情姊弟戀。即使與張栢芝同年出世,但霆鋒依然比前妻細三個月。

趙學而大 8年

甫出道,掛住偶像光環的霆鋒,卻戀上同公司的師姐趙學而,令不少女 fans大跌眼鏡。不過戀情維持年多便告終。

盧巧音大 6年

甩咗趙學而, 99年同大他 6年的盧巧音因合作電影《順流逆流》撻著。再一次譜姊弟戀,但此情快來快去,短短數月便無疾而終。

王菲大 11年

霆鋒愛得最轟烈的,莫過於跟大自己 11年的王菲撻著。當年王菲在傳媒圍捕下,在跑馬地夜店公然拖實男友仔霆鋒離開,確認姊弟戀全城轟動。可惜四年情最終因張栢芝介入,分手收場。



鍾意就快D Share啦!
Related Posts Plugin for WordPress, Blogger...