2013年12月12日 星期四

[壹週刊 1240] 精疲力盡 大戰 BB九日 林峯包食包住包胸圍




為滿足 BB購物慾,連買胸圍底褲,林峯都照樣簽卡埋單。

娛頭

精疲力盡 大戰 BB九日 林峯包食包住包胸圍

「峯語戀」拍拖接近一年,熱情有增無減,剛剛度過三十四歲生日的林峯,更一早 plan好同女友出埠慶祝。本月二日,林峯同吳千語現身香港機場出發到日本,先遊大阪再轉戰東京,玩足九日。週日(十二月八日)林峯生日當晚,二人閉關酒店,激戰十七個鐘,盡興過後,翌日殘爆的千語 BB同男友坐的士去新宿期間,仍意猶未盡在車廂中互啜,為箍實「好愛好愛……」嘅 BB,林峯繼續放水,全程住得豪,食得豪,同時滿足埋拜金 BB豪買名牌衫褲鞋襪苛索,連買「爸爸」、「弟弟」,林峯照樣碌卡找數。

前後腳上機

本月二日下午,林峯同千語 BB現身香港機場,準備乘坐下午四點半的航班飛大阪,為避耳目,二人分頭行事,千語 BB先行落車到櫃枱 check in,入閘後再到禁區內的萬寧 shopping。另一邊廂,林峯已到達上機閘口,見記者上前拍照,顯得相當不耐煩,致電女友通風報信後,便急急腳登機。約十分鐘後,千語 BB到達閘口,警覺地兩頭望,更除低黑超四圍搵記者,之後才急步上機。

大戰十七小時

為同女友共度生辰,林峯一早同公司攞定十日假,二人先在大阪逗留六日,週六(七日)乘坐子彈火車轉戰東京,入住位於千代田區、新落成的五星級酒店 Palace Hotel Tokyo。

週日(八日)是林峯正日生日,下午一點,著住短裙曬長腿的千語 BB,同壽星仔手拖手從酒店出發,搭的士到代官山,先去蔦屋書店各自各睇書,打完一輪書釘,再到附近的寵物店買寵物用品,不需一會,二人便拎住一袋二袋戰利品從後門離開。到了七點晚飯時間,兩個居然飯都唔食,急不及待跳上的士直返酒店過二人世界。晚飯只叫 room service,寸步不離留在房內貼身陪伴壽星仔。

BB指住衣架上的大紅胸圍、 T-back套裝,林峯即舉起手指公俾 like。

BB在內衣店內左試右試,試勻不同款色,逗留接近兩粒鐘。

酒店大戰十七個鐘後,翌日林峯與 BB殘樣現身,齊齊到新宿血拼。

元氣大傷的林峯,一邊睇衫,一邊放蚊。

BB親手為林峯試戴頸巾,林峯俾佢箍到實,當堂冧曬。

豪使壽星仔

有 BB陪過 34歲生日,林峯當然冧到暈,九日八夜,食最好住最好,加埋要滿足 BB嘅巨額購物慾,林峯使錢絕對唔手軟,旅程埋單保守計,接近 100萬。

的士嘴對嘴

經過十七小時纏綿,翌日下午十二點,零化妝的千語 BB殘爆現身,玩到精疲力盡的林峯同樣一臉倦容,二人先坐的士到位於中央區的 chez inno高級法國餐廳醫肚,分別點了兩個 set lunch,埋單約二千四百港元。歎完法國菜,二人坐的士到新宿準備血拼,其間 BB突然施展「啜功」嘴向男友,林峯即時回禮反啜 BB,二人在車上你一啖、我一啖,相當癡纏。

唔夠喉, BB再出招,在車廂嘴對嘴,連啜兩下。

情到濃時, BB突然使出「啜功」,主動嘴向男友面頰。

男友送 bra

到達新宿,二人先到地下商場的寵物店掃貨,之後再去名店林立的伊勢丹百貨公司,二人索性搭𨋢直上八樓,由上至下逐層行、逐層掃, Prada、 Dior通通有殺錯無放過,可能前一晚慶生大傷元氣,試衫期間,林峯不斷「放蚊」, BB見狀即主動幫男友試戴頸巾,好服侍。逛完一轉,二人再轉戰女裝部,千語 BB馬上發揮 fing錢本領,衫褲鞋襪全部買買買,在旁的林峯攞出信用卡碌完再碌。經過一輪血拼,千語 BB走入一間內衣店揀 bra,怕尷尬的林峯,未有留在內衣店,坐在另一間時裝店外等候。之後,服務員上前帶林峯行近試身室,相信是正在試 bra的千語 BB想詢問男友意見。試足兩粒鐘,千語 BB終於揀啱心水,林峯坐在一片 bra海的櫃位前找數之際, BB指住衣架上的火辣紅 bra加 T-back,示意自己買咗,林峯當堂笑曬點頭,然後繼續簽卡。 BB發功,男友即時暈得一陣陣,林峯的「 BB降」果然愈中愈深。買完 bra,一臉滿足的千語 BB拎住戰利品與男友雙雙離去。

屋企有養狗的林峯,在寵物店添置狗用品。

林峯生日正日, BB穿上短裙曬長腿,為男友慶生,二人先到代官山的書店買書。

落的士後, BB的吸盤嘴收唔切,繼續想啜,林峯當然十分回味。

周遊列國

「峯語戀」自今年 2月公開後,二人多次被發現拍拖外遊,由日本到米蘭再到美國,已經走遍歐美亞三大洲,真係恨死隔籬。

沖繩過年

今年 2月,林峯專誠由上海飛去東京同 BB度過拍拖後第一個情人節,返港兩日,二人再飛沖繩喪玩五天。

血拼米蘭

2月第三度外遊,林峯再帶千語到米蘭,瘋狂掃名牌,埋單過百萬,全由林峯找數。

美國畢業禮

5月,林峯帶埋 BB到美國,出席胞弟林逸洺的畢業禮, BB見曬家長當正自己人,成為林家半個小新抱。

橫店探班

5月尾,林峯要返橫店為新劇《陸小鳳與花滿樓》埋尾,為防林峯作反, BB人肉速遞橫店,𥄫實男友兼做跟得夫人。

盡興返歸

玩足九日,本週二(十日)千語 BB同林峯盡興返歸,一早 check-out離開酒店到東京成田機場,二人雙雙步向櫃位辦登機手續,之後便排隊入閘。回到香港後,下午要出席活動的千語 BB,率先離開,林峯幫手做苦力,留守在機場幫女友拎行李,其間記者上前問他:「(千語送咗咩生日禮物俾你?)冇呀!食咗一餐好難 book嘅飯囉。(千語係咪買內衣都要你過目?)正常 shopping,好正常!」

週二(十日)林峯與 BB抵達東京機場準備回港,大戰九日,二人同樣精疲力盡,一臉倦容。

林峯被問到是否幫眼替女友揀胸圍,一臉尷尬:「正常 shopping,好正常。」

二人的戰利品塞爆三個大喼,滿載而歸。

一落機, BB趕住開工先行離開,林峯替她拎埋行李。

一返港就出席活動,被問到送什麼禮物給男友,她表示:「唔講得!不過就同佢(林峯)去咗間好難訂位嘅餐廳食飯。」

添情趣

圈中有不少女藝人為箍實另一半,都會出盡冧仔法寶,甜言蜜語送禮物,招數當然唔少得。

熊黛林買挑情枕袋

07年,熊黛林與郭富城拍拖期間,男方要到泰國拍戲兩個多月, Lynn專程飛往當地探班,二人在酒店房大戰一輪後,在當地商場的床上用品部,買了一對印有女方酥胸半露大嗌「 one more」,男方標曬冷汗話「 OK」圖案的枕袋。

官恩娜自製禮物

與醫生男友拍拖 5年, Ella經常自製禮物冧男友,除情人節親手製作花藝裝飾外,去年男友生日,更花盡心思去上堂,造了一個皮革袋給對方作生日禮物。

徐靖雯買催情 bra

11年,徐靖雯翻撻鄭嘉穎,為箍煲成功,專誠到中環買催情內衣賀男友生日,最終揀了一個黑色性感喱士 bra,夠曬火辣。



鍾意就快D Share啦!
Related Posts Plugin for WordPress, Blogger...