2014年2月28日 星期五

[忽然1周 970] 貪崢敗走 商台無人留 貪崢,楊崢,MW,




陳志雲:「佢因為個人理由請咗假。我估可能壓力好大,最近好多記者朋友追訪佢啦。」

媽咪姐

貪崢敗走 商台無人留

可能媽咪姐真係太天真,愈睇愈覺得依家啲男女關係鬼咁複雜,但又鬼咁兒戲!就講黃宗澤( Bosco)同楊崢呢對吖,離奇地俾人影到公然咀嘴,搞到全城追訪呢段失驚無神姊弟戀。點知女方啲新聞愈揭愈臭,貪錢、搶好姊妹男友、失場唔專業等等,無樣好嘢!結果「黃楊戀」唔夠一個月就差唔多玩完!楊崢喺上星期仲突然向商台無限期請假,據知周四( 27日)出席埋一個品牌活動後,就會飛去峇里治情傷。

森美:「我同佢都係喺𨋢口撞到先講兩句,我諗偈都無乜傾過。(覺唔覺佢近排心情差?)我自己心情差啲,所以見到佢都無乜心情!」

少爺占:「我無乜留意(指楊崢新聞)呀!佢請咗假吖嘛,咁可能要休息嚇啩?我哋互相唔會影響,係我屋企就麻煩啲,我同佢住隔籬㗎嘛!附近多咗好多人(記者),都諗住搵嚇有無第二個停車場。」

嗱,講真吖,男女感情出問題,大家通常同情女方,但媽咪姐收到風,楊崢一話唔做,商台上下完全無人留佢。事關佢主持《一圈圈》年幾以嚟,最鍾意喺節目中插嘴,但講嘢又無 point喎!連節目監製鄧潔明都講過楊崢嘅主持技巧有待磨練,據知仲一早諗住搵另一位 DJ頂佢個位,依家楊小姐主動話走,大家更加係送都送唔切!媽咪姐早兩日特登去問嚇志雲大師同一班 DJ,大家講起楊崢都即刻劃清界線,無人為佢走咗而感到可惜。拍檔少爺占仲忍唔住呻同佢住得近,俾記者𥄫住,出入都唔方便㖭!

Well,楊小姐人緣「好成咁」,又難怪有報道話黃媽極力反對黃宗澤同大 9年嘅楊崢拍拖,仲寸個仔多咗個「阿媽」。而個底一向花嘅 Bosco,估唔到楊小姐個底仲花過佢,諗咗一諗,嗱嗱聲就收番借俾女友部仿古車,仲話大家好耐無見㖭!大難臨頭各自飛,莫過如此了。

辣㷫兩個阿媽

黃宗澤之前同胡杏兒拍拖,契媽汪明荃同阿媽李佩芬都好 like,但今次拖楊崢,周一( 24日)汪阿姐出席海馬活動時,都忍唔住鬧契仔唔認真,而辛苦養大個仔嘅黃媽更加講明「有佢(楊崢)無我」。

楊崢連微博都無心情更新,最後 update時間係上周五( 21日),佢嗰時已經有啲強顏歡笑,估唔到呢一日仲係佢喺商台嘅 last day。

快餐快散

黃宗澤同楊崢呢段姊弟戀,由俾網友發現喺遊艇會咀嘴,到上星期傳出 Bosco被女友臭史嚇怕,楊崢「被收車」,維持咗唔夠一個月,真係快過打針!

5/2借車出巡

《蘋果日報》圖片

忽然有網友爆喺遊艇會見到 Bosco同楊崢 kiss kiss,又話見到佢哋新春遊西貢,吸引大批記者追訪。楊小姐亦離奇高調咁揸住 Bosco借俾佢嘅仿古車返商台開咪, timing好鬼 fit!

10/2爆出臭史

《蘋果日報》圖片

勢估唔到戀情爆出後,模界群起攻崢,除被踢爆報細年齡,又俾人爆佢撬當年大緊肚嘅好友黃佩霞牆腳。當日楊崢仍然笑住回應,話無得驚人講自己。

11/2團拜被玩

《蘋果日報》圖片

繼被指撬黃佩霞牆腳,又傳佢同趙式芝老婆楊如芯( Sean)曾經關係密切,男女通殺,令楊崢喺商台團拜「搶曬鏡」!林海峰即刻話今日係含春團拜,森美又話係「崢愛」。楊崢惟有硬食,但承認同 Bosco冇時間見,感情現暗湧。

19/2愈揭愈有

《蘋果日報》圖片

女人團結起上嚟,真係無得輸!黃佩霞唔多願再講楊崢,但有好姊妹歐陽妙芝接力數臭,直指佢搞散人頭家。嘩!即刻就有大批記者包圍楊崢求證,佢只能一味話無回應,而 Bosco亦俾人問到煩。

20/2 Bosco轉軚

《蘋果日報》圖片

Bosco一向係醒目仔,一見勢色唔對,即刻避見新女楊崢,就算拍劇有空檔,都寧願相約傳過緋聞嘅酒吧老闆娘餘小雅(黑白衫)喺九龍城私竇密會,仲叫埋阿媽一齊。楊小姐連影都冇,而車亦俾 Bosco收番, finish!



鍾意就快D Share啦!
Related Posts Plugin for WordPress, Blogger...