2014年3月21日 星期五

[忽然1周 973] 突然悔婚 楊明速食韓系辣妹 楊明,MW,




拖實落樓

周日( 16日),楊明與新歡十指緊扣落樓,二人當時睡眼惺忪,應該之前一晚玩得盡興所致。楊明新歡個子不高,但身材豐滿,衣著亦入時,有幾分韓妹味。

娛樂喧

突然悔婚 楊明速食韓系辣妹

今年 33歲、喜愛夜蒲的楊明,去年終於識得修心養性,宣布與拍拖三年的圈外女友 Joanna拉埋天窗。不過婚紗相都影埋,楊明一句意見不合,突然煞停婚事。

悔婚冇耐,楊明隨即回復溝女 mode。據知他去年底已與一名年約廿多歲的圈外女子撻著。周日( 16日),本刊拍得楊明拖住新歡離開紅磡寓所,二人更當街十指緊扣。楊明這位新女伴衣著走韓風路線,打扮似足千頌伊,食家楊明認真識食。











我索過佢好多!(設計對白)

去年 10月才爆出婚訊變分訊的楊明,轉眼就展開新戀情。周日( 16日),楊明就拖實女伴離開男方位於紅磡的寓所,其間二人全程十指緊扣,甚有默契。

去年悔婚

楊明去年宣布與圈外女友 Joanna結婚,但影完婚紗相後,才發現性格不合而斬纜,他說:「慶幸問題喺結婚前出現,如果結婚又離婚,問題仲大。」

當街發脾氣

楊明新歡十分嫩口,年約廿多歲,而且衣著韓系,加埋一把長髮,形象頗為清純。不過這位新歡似乎唔夠韓妹溫柔,事關二人搭的士到尖沙嘴,記者發現新歡落車時突然發脾氣,除黑口黑面外,更向楊明硬塞幾十蚊車錢。最無奈的是,任憑新歡野蠻,楊明一粒聲都冇出,看來終於有人有本事收服性格反叛的楊明了。

據知楊明與新歡去年暑假在朋友飯局中認識,兩人一撻即著,私下約會了兩次便拍拖。知情人士說:「 Mat(楊明洋名)把口不嬲𠺘過油,多年嚟經已有唔少女仔中招㗎啦。不過 Mat家陣真係大個仔咗好多,就算識到女仔,佢會攞個心出嚟同人發展,唔會再係以前咁玩完就算。」

硬塞車錢

不過女友情緒時好時壞,二人搭的士到尖沙嘴,女方忽然黑面,更將車錢硬塞向楊明。

街上開火

之後二人行街時明顯離行離列,女方更不時向楊明開火,但楊明冇還拖,非常順攤。

落力耍冧

二人約齊其他朋友後,楊明隨即領隊上身,帶隊飛的過海(上圖)。坐的士時,楊唔介意坐司機隔籬,等女友與朋友傾偈。

強調冇劈腿

雖然今鋪嚟真,畢竟楊明去年 10月才向外公布與舊愛婚訊撻 Q,難免令人聯想楊明當日背住未婚妻劈腿。知情人士說:「其實 Mat真係諗住同前度 Joanna結婚,佢哋仲特登去馬來西亞影婚紗相。不過當時女方屋企人對婚事好多意見,堅持楊明要飛去紐約大搞。奈何楊明根本放唔低工作,而女家亦唔肯延期,先搞到不歡而散。其實楊明都為呢壇嘢愁咗一排,大約半年後先識到呢個女仔。」

周二( 18日),記者致電搵過楊明,提到新戀情,他最初拒認拍拖,他說:「呢啲嘢唔多唔少都有。(咁即係多定少?)哎,呢啲嘢唔好講(你拖住個女仔喺屋企出嚟喎?)咁嗰個係我女朋友嚟㗎嘛!(夜場識?)佢係朋友嘅朋友,聚會識嘅。食飯啫!我依家好少去夜蒲,佢係圈外人,唔好講佢咁多(你啱啱先婚事告吹,咁快又投入新戀情?)其實我上年 5月已經冇婚約㗎啦,都放低咗成大半年先識佢。」

98年入行的楊明,經常夜蒲,更多次惹上官非,負面新聞不絕。直至 11年憑《心戰》警察一角人氣急升,頻頻接受專訪(左圖)。其後在處境劇《誰家灶頭無煙火》入屋才洗底成功。

《 FACE》圖片

溝女無數

楊明入行 16年,緋聞無數,情史厚過電話簿。

俘虜中女

圖片

01年在《娛樂反鬥星》扮謝霆鋒彈起的楊明,就被爆其口味與霆鋒一樣,鍾意玩姊弟戀。當時只得 21歲的楊明,就被拍得鬼祟與中女陳鳳儀拍拖。

長黐敏之

《蘋果日報》圖片

撇甩中女後,楊明轉向娛樂圈覓食。 02年楊明撻著陳敏之,不過拍拖唔夠兩年就玩完。之後 07年二人又再復合,但由於楊蒲性不改,二人情變收場。

攀登阿佘

05年,佘詩曼的鄰居爆料指楊明經常夜闖阿佘北角香閨。本刊追訪下,就拍得頭戴漁夫帽的楊明,自由進出阿佘屋企,其後二人例牌否認戀情。

網交𡃁妹

楊明其後愈食愈雜, 08年就流出他與圈外女友 Elaine的牀照,二人的咀嘴相更於網上瘋傳。

《 FACE》圖片



鍾意就快D Share啦!
Related Posts Plugin for WordPress, Blogger...