3月 15日 甘比陪飲茶
宣判翌日，大劉如常帶甘比去灣仔福臨門飲茶，全程黑口黑面拒絕回應半百傳媒嘅提問，而甘比就好乖巧咁做大劉背後嘅女人。
媽咪姐
大劉有難 呂麗君甘比一條心
澳門世紀貪汙案經過近兩年審訊，上星期五終於宣判華置主席大劉劉鑾雄同南華足主羅傑承，行賄澳門運輸工務司前司長歐文龍及洗黑錢罪名成立，各判監禁五年三個月。媽咪姐先唔評論係咪罪有應得，但從呢單案可以睇到，大劉背後兩個女人都各有功能，而且仲有情有義㖭！
單案審咁耐，呂麗君幾乎次次都出席旁聽，宣判當日仲喺澳門仆返香港，即同大劉商議上訴嘅事，睇見佢憂心忡忡，絕對係仆心仆命。大劉雖屬戴罪之身，仍繼續日日去福臨門飲茶，同行仲有佢最錫嘅甘比。比起呂麗君，甘比表面上乜都冇做，但其實佢陪住大劉出入，聽佢訴苦，已經做到紓緩情緒嘅作用。大劉身邊兩個女人，一個主外，一個主內，仲要兩個都為佢生咗兩個小朋友，絕對唔係普通師奶咁簡單。大難臨頭，夫妻都冇各自飛，呢啲咪患難見真情囉！
3月 17日 面容憔悴
連續四日都見甘比陪大劉去福臨門飲茶，不過日日都苦口苦面。星期一（ 17日），甘比仲面青口唇白，睇嚟佢真係好擔心大劉。
3月 18日 前後腳
星期二（ 18日）下午，甘比同大劉前後腳到達福臨門，逗留個多小時後離開。
羅傑承太太陪讀
大劉日前辭去華置主席等職務，而羅傑承星期一（ 17日）則高調在旗下 BMA嘅銅鑼灣辦公室舉行記者會，喺太太梁芷珊陪同下讀出聲明，強調自己冇犯法，唔會辭去公職。
|
鍾意就快D Share啦！
|
|
|
