對於醉酒出事，陳山聰雖稱無稽，但他承認與超雲拍拖期間有飲醉過。
滾熱辣
揭分手內幕 陳山聰衰醉酒
去年 4月，賭王三房千金何超雲於微博自揭「雲山戀」玩完。事隔十個月，被打回原形的陳山聰重新向幕前出發，近日為大台新劇日接夜開工。
本刊收到可靠消息，指超雲與陳山聰擘面其中一個原因，是男方在三房大宅內飲醉酒出事激怒超雲。受分手打擊的超雲，連月來寢食難安。收埋自己多個月的她，早前骨感現身慈善活動，明顯暴瘦近 30磅。
對於醉酒出事，陳山聰回應時表示：「人生點都會醉過……飲醉都係正常生活。」酒可以影響一生，陳山聰就這樣失去做賭王快婿的機會了！
愛靚如命的何超雲，自去年中與陳山聰分手後，便絕跡公開活動，就連修甲和做 facial亦改由專人上門服侍。據知超雲受到分手打擊，不想出外見人，情緒處於低潮的她，因厭食及經常失眠，體重從高峰期的 140磅，半年間暴跌至只剩 110磅。
大宅內半夜醉酒
本月初（ 3日），何超雲為撐母親何陳婉珍，現身東華三院 143周年慈善晚會，穿上一襲 Lanvin綠寶石色的單肩晚裝，身形顯得十分單薄，鎖骨盡現。據其密友爆料：「佢哋分手嗰陣，好多人都將注意力落曬喺陳山聰度，其實超雲都好傷㗎！當時佢真係好愛陳山聰，分手又點會唔傷心。早前佢食慾不振，一日瘦過一日，到依家起碼瘦咗 30磅！」
該密友還透露兩人分手的原因，與陳山聰醉酒有關，「有晚陳山聰半夜飲醉酒，喺大宅亂衝亂撞。超雲見到佢飲醉酒嘅真面目，嬲得好緊要，即時趕走咗佢。」本刊亦向超雲身邊另一位密友求證，得知醉酒一事確是分手原因。
被打回原形的陳山聰，痛定思痛後，月前經已重回劇組開工，在新劇《官場浮世繪》中佔戲頗重，每日只有兩小時休息。上周二（ 11日），他早上練跑後駕車回大台，對於超雲的事，似乎不想再提。「（今日精神好好喎？）係呀！啱啱跑完步，所以精神好好多。（超雲分手後暴瘦，你有冇見過佢呀？）冇、冇、冇。（會唔會擔心佢有事？）我唔答喇！我唔想影響到人，你問番當事人，唔好問我。」
醉酒有前科 辣㷫伍姑娘
其實陳山聰醉酒出事已經唔係第一次。 2011年， 35歲生日的他在派對飲大兩杯同朋友玩「 truth or dare」，輸咗要打「絕交電話」俾契姐伍詠薇，佢拋下一句：「你以後不要再搵我！」事後伍姑娘在微博向陳山聰發表絕交宣言及取消對他的關注。事後陳山聰不止一次向伍姑娘道歉，但始終未獲原諒。
承認經常飲酒
本刊記者再問陳山聰是否有飲酒習慣，他直認不諱：「間中都有飲。（當日你係咪喺超雲屋企飲醉酒亂衝亂撞？）……咁無稽嘅事，我唔答喇！（咁拍拖有冇試過飲醉酒？）我覺得以前（嘅事）唔需要再講囉！人生點都會醉過……有飲醉過，都係正常生活囉！大家鍾意點樣去揣測同點講都好，因為已經過咗去，我亦有我嘅新生活。（超雲話想拍拖喎！）人哋嘅事唔關我事，佢嘅事唔關我事。」看似對醉酒致分手一事不在乎。不過，他卻在鏡頭後緊張地問記者：「你哋會點寫？無端端傳我呢啲嘢？喺邊度收㗎？」
難得合照
超雲與超蓮感情最要好時，就連服飾裝扮亦愛襯到絕。去年 3月兩人玩自拍放微博（右圖），但之後超雲一直沒有更新微博，超蓮亦沒再放姊妹合照。直至八個月後（ 11月）才再現合照，當時是何鴻燊博士的壽宴（上圖），不過都是由友人王賢誌放上網。
聞舊愛即走
暴瘦後的超雲近月開始出山，月初（ 9日），本刊發現超雲與男性密友 Vincent在中環 ifc嘆 high tea。現場所見超雲完全沒有進食任何東西，只顧不停與對方密斟，最後還向本刊記者透露想拍拖。「（心情咁好，係咪有人追呀？）我都好想有人追。（陳山聰積極做嘢喎！）唔答喇！」超雲面色一沉，隨即上車離去。雖然曾傳出超雲有新男友，但其弟何猷啟卻在活動上指大家姐仍然單身，並有意赴英國攻讀設計課程，似乎想離開傷心地。
超蓮掛住拍拖
過往超雲不開心，都有感情要好的超蓮陪伴左右，但近月超蓮掛住跟吳克群拍拖，再不見她與超雲孖公仔出現。上周四（ 13日），何超雲和弟弟何猷啟，與父親何鴻燊及母親陳婉珍，一同出席中大書院揭幕禮儀式，超蓮卻乘另一架車分開到場。當日超蓮心情麻麻全程黑面，與超雲亦甚少交流。本刊記者欲上前採訪超雲近況，卻被其助手阻攔，更反問記者：「係咪問嗰個男人嘅嘢？」似乎欲與陳山聰劃清界線，最終超雲亦拒絕回應。
失戀減肥法
想增肥？拍拖想減肥？甩拖睇嚇何超雲同陳山聰， 2012年開始熱戀期，唔使做四圍飛嘆世界，結果一齊變肥仔肥妹。分手後二人即做瘦身男女，陳靠跑步減磅，超雲就食唔安瞓唔樂，贅肉冇曬。
2013年
2014年
|
鍾意就快D Share啦！
|
|
|
