2014年3月6日 星期四

[FACE 354 外地娛樂] 追到尾 首爾追擊 《星星》結局零度嗌凍 全智賢金秀賢連咀 12次 金秀賢,星星,來追星星的你,全智賢,MF,




咀足 1分鐘

失蹤 3年,都敏俊突然現身於 2017年的韓國電影頒獎禮,二話不說就同千頌伊咀起上嚟,咀足一分鐘,劇情需要啫!

真面目

追到尾 首爾追擊 《星星》結局零度嗌凍 全智賢金秀賢連咀 12次

上週四( 27日),大熱韓劇《來自星星的你》終於大結局,都敏俊借「蟲洞」重回千頌伊身邊,但卻會隨時消失,半喜半悲,結局評價好壞參半,但粉絲還是期待《星星》開續集。

韓劇拍攝方式跟香港有別,邊播邊拍成為韓劇特色。上週三( 26日)淩晨,本刊便於首爾的國立劇院,直擊《星星》拍攝結局經過,金秀賢和全智賢的久別重逢熱吻戲,全智賢更在零度的氣溫下袒胸露臂,好在有金秀賢愛的抱抱連咀 12次,氣溫再低都唔使怕。

其他影片
  • 穿越《星星》結局-重逢激吻一分鐘足本

《來自星星的你》上週四( 27日)播出第 21集結局,之前趕戲雙賢每日都得幾粒鐘瞓,不過錢冇人嫌多,據知全智賢於播結局當日,即飛往日本為 Uniqlo新廣告進行拍攝,酬勞更達 2千萬港元;而金秀賢則繼續開工拍廣告搵真銀。

都敏俊其實當晚戲分不多,不過都拍到淩晨 5點至收得工。

只有 1度的晚上,仲要上山低幾度,全智賢只係得塊布,導演一嗌 cut,即忍唔住繑手取暖。

凍到冇咩可以做,惟有伸嚇脷睇嚇有冇好啲囉!不過國民女神就算伸脷都係靚㗎囉!

暖爐取暖

助手要一眼關七,見鏡頭一轉,即為全智賢披番件羽絨兼提起暖爐保溫。

動用 80老臨

本刊上月貼身追擊《星星》拍攝過程,上週三( 26日)淩晨更第一手拍到結局場面,都敏俊和千頌伊於分別 3年後在「 2017」年的韓國電影頒獎禮重逢一幕。當晚韓國電視台 SBS請到約 80名「老臨」扮觀眾、記者,更租借位於首爾的國立劇院作場景,認真大陣仗。

早於上週二( 25日)晚上約 9時,劇組已在國立劇院布置場地,而約 80位「老臨」則陸續到場,有人獲分配相機扮記者、有人則獲鮮花做道具。當晚首爾只有攝氏 0度,加上國立劇院位於山上,即使凍慣的韓國人都要靠暖包取暖。晚上 11時 45分全智賢坐住私家 Benz到場,半小時後金秀賢亦坐住保母車到達。導演先後上車跟雙賢講解劇情,淩晨 1點(即 2月 26日淩晨)才正式開拍。

機器用最 top

今次《星星》套劇咁收得,其實劇組都花咗唔少心機。好似都敏俊識得用嘅「凍結時間」超能力,就係導演引用「 GO PRO」可攜式攝影相機拍攝。

劇組首先要鏡頭入面嘅演員全部配合,導演叫「 Stop」時即停止所有動作,再用多部「 GO PRO」及加上 Timeslice拍攝手法,加上 CG特技完成!香港嘅電視台唔知幾時先會追得上。

呢一幕,都敏俊同千頌伊都行得走得;而身邊嘅「老臨」要全部停止動作, cam man仲要好小心咁埋身大特寫,真係少啲技術都搞唔掂。

呢個就係傳說中嘅「 GO PRO陣」,係同時運用 60台小型攝像機 wi-fi遙控控制,進行高速抓拍同一時間觸發快門的圖像。網上圖片

韓劇盡執穿崩位

近年睇劇,網民最鍾意睇有冇穿崩位,不過呢樣嘢喺韓劇就比較少出現。

結局篇嘅紅地毯一幕,劇組喺國立劇院取景,當時劇院外掛住 2014韓國電影節嘅 banner(右),不過劇組冇大意到,返到公司做後期時,改番 2017配合番套劇,冇穿崩位,觀眾至睇得入戲㗎嘛!

雲海:日日返地球都得!

結局交代都敏俊靠穿梭蟲洞與千頌伊於地球不定時相聚,呢個結局大家滿唔滿意呢?對外星人好有研究嘅雲海就話:「八十年代出現咗『蟲洞』呢個理論,認為如果時空折疊後出現一條隧道,就可以縮短距離。《來自星星的你》用到呢個理論都唔係新鮮,其實一早就有好多科幻電影利用『蟲洞』做隧道。不過我係唔明,既然有得蟲洞,都敏俊日日返嚟地球都得,唔使等得咁辛苦啦?」

5分鐘拍 5個鐘

晚上 10點已到齊的「老臨」呆企 3個鐘終於有工開,等到戲內的千頌伊(全智賢)落車更不斷歡呼狂嗌;而千頌伊則在約零度的氣溫,穿上性感極少布的 Burberry Prorsum晚裝(港幣$33,000)落車,再企定定向觀眾揮手。導演一叫「 cut」,全智賢助手即醒水馬上向全智賢披羽絨和遞上暖爐,不過暖唔夠一分鐘,全智賢又要除褸繼續拍,在極低溫下袒胸露臂,導演亦十分體諒全智賢,多次讓全智賢返回座駕歎暖氣,以免冷病。

劇中都敏俊突然停頓了時間,並出現在紅地毯,替正在布景板前向觀眾揮手的千頌伊披上外套,情到濃時二人更在眾人面前激咀,足足咀了 1分鐘。由於導演張太侑唔收貨的關係,令雙賢連環咀足 12次,不過兩位都話咀就咀、話喊即喊,唔使眼藥水,表現得非常專業。

由於要拍攝定鏡的器材相當多,加上要 80位「老臨」同時定鏡,導演要求甚高,多次因少少瑕疵就叫「 cut」再拍。最終在 21集只有 5分鐘劇情的畫面,就由淩晨 1點拍到朝早 5點半。

上週四( 27日)淩晨全智賢完成《星星》全部戲分,朝早已經坐飛機去到日本拍 Uniqlo最新廣告,其實有個好老公錫住,全智賢使乜咁搏喎?

金秀賢上週四( 27日)完成曬拍攝後,唞夠就同班朋友三更半夜去打保齡球,睇落秀賢 oppa真係幾有姿勢喎,不過有冇實際就唔知呢!網上圖片

網上圖片

金秀賢不時都會 update微博告知行蹤,最新資料係佢已經落實會去參加江蘇衞視嘅《最強大腦》錄影,但電視台只安排 800個觀眾位,相信金秀賢嘅來臨應該會搞到機場同電視台淪陷。

雙賢搵人仔

《星星》人氣高企,韓國、香港和內地都大把《星迷》,據知已有大量廣告商向二人招手。拍畢《星星》,全智賢和金秀賢公開露面的第一炮同樣揀在出手甚闊綽的中國大陸。

全智賢、金秀賢和一眾《星星》的演員於週一晚( 3日)出席在首爾舉行的慶功宴,本週六( 8日),金秀賢便會乘包機到南京,與張栢芝一齊參加江蘇衞視的《最強大腦》錄影,之後便開始他的亞洲巡迴粉絲見面會。最新消息,首爾粉絲見面會( 3月 16日)因太多人買不到票,將在 5月 3日加開一場。

而全智賢亦將於 21日到上海出席只有 50人,國內護膚品牌的粉絲見面會, 23日再到雲南出席其代言一國內化妝品牌的活動,昆明恐襲不知有否令其計劃有變。而安徽衞視亦正極力邀請她參加《超級演說家》第 2季錄影。

一套科幻愛情片,令二人在亞洲紅到極點,今時今日睇怕只有韓劇至有呢個威力了。

《星星》喺週一( 3日)傍晚舉行慶功宴,申成祿(左)和安宰賢(右)都表現興奮!



鍾意就快D Share啦!
Related Posts Plugin for WordPress, Blogger...