2014年4月3日 星期四

[壹週刊 1256] 視帝回歸 有米表妹做阿四 鄭嘉穎黑面出遊 鄭嘉穎,M1,




鄭嘉穎外遊散心面燶燶,結伴同遊兼一路冧笑的表妹王賢詠,則尾隨做阿四。

探熱針

視帝回歸 有米表妹做阿四 鄭嘉穎黑面出遊

11年出街的內地劇《步步驚心》爆紅,帶挈鄭嘉穎在過去兩年一口氣拍五劇,可惜孭飛劇接連仆直,人仔財源中斷,唯有打道回港,返無綫交人開工。

趁月初埋位拍新劇《天眼》前,鄭嘉穎孖住富貴表妹王賢詠(電子大王王華湘孫女)飛新加坡再叉叉電。起程當日,兩老表一齊現身機場 check in,只見王賢詠七情上面,出盡力氹黑面表哥,一入到禁區,鄭嘉穎拋低一句:「分頭行事。」跟住一支公彈開去買免稅煙,睇雜誌,毫無風度!

分頭行事

去旅行,照計未出發先興奮!但出發當日,鄭嘉穎全情面燶燶,心不在焉。一行四人,表妹王賢詠一馬當先,負責埋航空公司櫃枱辦理登機手續,見表哥心情麻麻,王賢詠主動撩傾偈,見對方無反應,已是三子之母的她唔怕尷尬,公然扮 cute擺甫士,同行女性友人笑到走曬樣,唯獨視帝繼續 cool,話之你!

辦登機手續期間,航空公司職員示意他們將行李放上行李帶,四人中只得鄭嘉穎一名男丁,但卻繑埋雙手,任由表妹做咕喱。王賢詠終於忍不住發炮反擊,鬱曬手講足五分鐘,鄭嘉穎一味點頭無發言,之後索性孖住另一友人行先。

入到禁區,原本刻意停步等埋團友的鄭嘉穎見附近旅客眼望望,馬上將 cap帽拉低,十分避忌。之後行到去免稅店,鄭嘉穎細細聲跟王賢詠說:「分頭行事!」之後便一支箭行入免稅店買煙,再去附近書店打書釘,到起飛前五分鐘,他才匆匆買雜誌再行去登機。

扮 cute

有三名兒女的王賢詠大庭廣眾下曬 cute扮花,鄭嘉穎依然笑唔出無反應。

講笑

國內三劇連環仆,人仔財路頓失,鄭嘉穎心情差,難得富貴表妹扮開心果,出力講笑氹對方開心。

發圍

大爺繑埋手等人服侍,王賢詠忍無可忍反擊鬧爆鄭嘉穎。

有關照

據了解,鄭嘉穎同表妹王賢詠向來有偈傾。

「嘉穎呢兩年搵落唔少,之前佢買樓, Vivian(王之洋名)都有俾意見,有時聽到啲消息, Vivian都會關照嘉穎,等佢可以錢搵錢。」知情者說。

投桃報李,王賢詠早年陪大仔去英國升學,曾在當地報讀攝影課程,鄭嘉穎去年底推出國語碟《說來話長》,亦特別將多首 MV交託表妹操刀,平時出席活動,又會叫對方為自己影工作照放上微博。「 Vivian係闊太,三個仔女又開始大個同去咗外國讀書,嘉穎叫到,佢又得閒,貪得意咪跟出跟入,陪開工囉!」

黃賢詠上週一先行離開新加坡,鄭嘉穎則留到上週三才單拖回港,全程閃縮鬼祟。

過去一年不時黐實富貴表妹的鄭嘉穎,去年底獲對方親自接送食晚飯。(《 FACE》圖片)

身價急插

《步步驚心》帶挈鄭嘉穎兩年內連拍五劇,連同商演、活動,吸金超過半億,更一度計劃開製作公司,疊埋心水留守內地賺人仔,只可惜三部已播出的劇集收視均不理想,連帶已預備開工的《葉問 2》,都考慮改由林峯頂上。

內地吸金告一段落,鄭嘉穎焗住回歸,由五十五萬人仔一集,回塘接拍收二萬五港幣一集的無綫劇。

《葉問 2》開拍在即,有指製作單位改由人氣勝一籌、剛拍完《大漢賢後衞子夫》的林峯頂上。

鄭嘉穎以五十萬一集接拍電視版《葉問》,被指睇得唔打得,收視欠理想。

國內財路頓失,鄭嘉穎將於本月夥拍陳展鵬為無綫新劇《天眼》開工,但早前拍節目巡禮,只有女主角楊怡在場。



鍾意就快D Share啦!
Related Posts Plugin for WordPress, Blogger...