2014年4月3日 星期四

[壹週刊 1256] 港視開倉賣劇 破困局 港視,M1,




港視行政總裁杜惠冰話,最希望港人優先睇到港劇,不過冇辦法的話,都要先考慮荷包賣埠。(曾春南攝)

八卦陣

港視開倉賣劇 破困局

王維基同通訊辦就播放制式嘅爭拗依然未傾掂數,香港電視開台無期,連帶早年拍落嘅劇集都無緣出街,慘變倉底貨。為咗打破困局,港視上星期喺香港國際影視展擺咗個攤位賣劇集。

睇番港視介紹單張,主要力推十五套劇集及五套資訊節目,大部分於一二年製作。港視中人解釋社會潮流轉變,服飾同化妝都會過氣,所以要盡快清倉。例如有套劇叫《童話戀曲 201314》,如果再唔播出街,連劇名都會 out。據了解,有買家要求獨家播放,但出手未到價,而港視仍然希望賣俾多啲人,增加播放渠道,所以仲未撲槌。偵探劇《開腦儆探》、靈異的《驚異世紀》都有唔少人洽談。至於香港人有無機會睇到?港視行政總裁杜惠冰話,佢都好想照顧到香港觀眾,最好係香港跟購入地區同步播放喎。但上週六王維基同通訊局談判破裂,睇嚟要搵定小米盒子透過大陸或東南亞頻道睇《警界線》。

王維基

港視的介紹單張特別用簡體字,唔知係咪要配合大陸市場需要。

雞農鄭展強斥政府「無腦」

距離恢復入口大陸活雞剩下不足三個月,食衞局處理中港活雞分流仍然順得哥情失嫂意。早前本港品牌粵王雞董事鄭展強,事先張揚會以「三部曲」挑戰政府入口活雞及檢疫政策,上月已發律師信要求局方賠償一百四十多萬,原來律政司早前已代食衞局發信回覆,堅持鄭展強只係雞苗承包商,唔係雞農,換言之一個仙都冇得賠!

睇完封信,鄭展強直斥政府「無腦」:「我係本土產業,雞苗都係本土孵化,當日因為禁雞,啲雞苗囤死曬、大雞又出唔到市,雙重損失,點解會冇得賠?」鄭展強強調一定會啟動第二部曲,日內就會向申訴專員公署投訴當局行政失當,最後一步就係同政府打官司。「就算要幾百萬打官司都好,我係唔會向政府就範!」

法律行動以外,鄭展強更索性上街抗爭,本週日就夥同打鼓嶺鄉事委員會主席陳崇輝以及土地正義聯盟等成員,去到預備改建做臨時活雞中轉站嘅前政府農場示威;陳崇輝更即場踢爆,食衞局從未諮詢過鄉委會,就連身為主席嘅佢都係睇電視至知道農場被改建成中轉站,怒斥政府做事無規無矩。

政府建議嘅活雞中轉站(左)同民居只係相隔一條馬路。

雞農鄭展強(右二)聯同打鼓嶺鄉委會開記招,質疑政府事前零諮詢,做事無規矩。(張貴材攝)

絕食爭普選 何秀蘭最傷

泛民十七名「義士」,上週五展開「雞蛋抗高牆,絕食為普選」第一波運動,截至本週一下午兩點,當中十四人已絕食七十四小時,三人喺絕食兩日後因血糖過低而退出,不過佢哋呢份為民主豁出去的心意,已贏得唔少市民掌聲。

一向體形纖瘦的工黨何秀蘭,參加絕食三日,原來已經瘦咗七磅,以佢體重只有一百一十七磅計算,減幅達百分之六,真係我見猶憐。何姨姨話,身體已支持唔住,行斜路都無力,無法正常工作,惟有退出絕食行動。對比民主黨胡志偉,原來只係輕咗四磅,仲有餘力出席兩個主禮活動,佢話呢排控制緊體重,所以絕食後磅數無明顯跌幅。至於昂藏七尺嘅民主黨總幹事林卓廷,都輕咗四磅,仲有力對付鬧人嘅維園阿伯,同埋向報紙投稿講圍標,真係唔可以睇小呢位絕食初哥。

而已屆六十六歲嘅絕食老將楊森,計劃好似十年前反對廿三條一樣,目標絕食一百小時,佢睇嚟精神唔錯,輕咗六磅。佢話呢幾日都係飲清水同電解質飲品,身體仲撐得住,但夜晚就瞓得好差,皆因滙豐銀行喺佢哋絕食第一日播放氣氛熱烈嘅七人欖球賽宣傳片,半夜又有跑車喺皇後大道中風馳電掣,好彩現場有提供耳塞。至於身形有啲分量嘅何俊仁,原來亦已輕咗七磅,仲開始面青口唇白,對記者嘅問題都冇乜反應,真係要保重呀!

何秀蘭絕食三日,體重勁減七磅,惟有退出絕食行動。

一班泛民義士絕食後,閒閒哋輕咗幾磅,但李永達(左一)怕被醫護人員勸退,所以一直唔肯量體重同血壓。

金融界科水撐佔中

一班撐佔中金融界人士上週即場籌款,唔使半個鐘頭就籌到四萬蚊現金。

中央打壓佔中嘅藉口,來來去去都係話影響經濟同營商環境,擺明睇死金融界同商家唔敢佔中。不過,佔中先頭部隊、資深對沖基金經理錢志健成立嘅「金融界佔中」組別,原來已聚集七十幾名高薪厚職、來自中資及國際投資銀行嘅金融界人士,仲會定期喺中環搞研討會。

最近佢哋發起「對中國共產黨的十個訴求」行動,內容包括要求中共履行《中英聯合聲明》,不幹預香港內部行政;不幹預行政長官一切提名及選舉框架等。

佔中金融界暫定本月廿三日開記者會,會後接力參與爭取普選第二波絕食行動,又打算喺香港《蘋果日報》同英國《金融時報》、亞洲《華爾街日報》等賣廣告表明立場,預計集資廿五萬元。上週五喺佔中研究會完結後,呢班金融界才俊齊齊拎荷包出嚟磅水,有人仲現兜兜放低廿張五百蚊紙,即係成萬蚊,疏爽程度嚇親在場嘅記者,截稿前已籌得六萬幾蚊,相信善款陸續有嚟。



鍾意就快D Share啦!
Related Posts Plugin for WordPress, Blogger...