2014年5月7日 星期三

[FACE 363] 學唔切 迫剪都敏俊頭 半百黎耀祥:想有韓劇 feel 黎耀祥,MF,




《商戰》中視帝同胡定欣飾演夫婦,要扮都教授梳齊蔭,再著修身西裝,好彩唔使胡定欣扮千頌伊啫,否則真係被鬧爆。

真面目

學唔切 迫剪都敏俊頭 半百黎耀祥:想有韓劇 feel

大台最叻係乜?見《星星》熱、韓風勁當然照跟。

除咗中女劇明抄韓片《陽光姊妹淘》,大台見早排《來自星星的你》大熱,金秀賢的齊蔭頭更成熱潮,於是下令新劇《商戰》中幾位中生齊齊梳齊蔭頭扮都敏俊;連啱啱 50歲生日的視帝黎耀祥都冇得豁免要扮都教授,仲要學埋都教授著貼身西裝。黎耀祥無奈表示:「公司話想有韓劇 feel喎。其實演員都係好被動,我哋都係想做好套劇啫。」成班阿叔扮韓仔,嚇鬼。

5月 4日(週日)係黎耀祥 50歲生日,髮綫冇後移;頭髮算密,勉強都梳到齊蔭頭。

韓劇 hit爆,一套《來自星星的你》令金秀賢、全智賢紅爆亞洲。韓劇除咗靚人、靚景,製作認真先係受歡迎原因。一向鍾意抄嘢的大台當然唔放過「參考」機會,正在拍攝的重頭劇《商戰》就規定一眾男演員要學都教授打扮。

夾硬梳齊蔭

《商戰》為今年大台重頭劇之一,由視帝黎耀祥孭飛,再加兩位當紥小生蕭正楠和黃浩然,上年節目巡禮中,《商戰》便是重點宣傳劇集。據知,極高層對該劇都好有信心,但見韓劇勢強,決定要硬加韓劇元素,可惜唔係學韓劇認真製作,而只係叫返電視城班梳頭化妝阿姐抄造型。知情者說:「試造型嗰日突然話要全部男仔都梳韓仔齊蔭頭喎!就算祥仔、曹永廉呢啲頭髮唔多嘅中年小生都要夾硬梳。」

唔只髮型扮韓仔,就連服飾都抄。黎耀祥於劇中飾演富二代,平時要著西裝,而幾十年來大台一向愛用觀奇洋服贊助西裝,但今次為了令《商戰》似韓劇,造型似韓仔,不惜換上貼身剪裁西裝。

48歲

黎耀祥要扮都敏俊,連曹永廉都要扮韓仔,一齊梳齊蔭。

37歲

最後生係蕭正楠,頭髮最濃密,梳韓仔頭絕對冇難度。

38歲

4位男主角身形 keep得最好係黃浩然,佢扮韓仔觀眾易啲受落啩。

祥仔:冇睇過《星星》!

上週五( 2日),《商戰》於中環取景,半百黎耀祥一身韓 look打扮現身,遠望造型真係有 0.01%似脹版都教授,其間唔少師奶粉絲探班,亦大讚祥仔後生。現場觀察,導演對視帝的韓頭亦相當緊張,每個鏡頭均要求他的髮型都好似啱啱吹出來貼貼服服。

黎耀祥帶點苦笑地說:「公司話想要韓劇 feel喎。(驚唔驚畀人話抄都敏俊?)其實藝員都好被動,我哋都係想做好套劇啫,我就冇睇過《星星》喇。啲衫真係窄㗎,我都要夜晚食少啲再跑下步先著得落。」其實早前他出席《商》劇拜神時,曾經話過韓劇老土:「套《繼承者們》題材係有錢老豆嫌棄窮家女, 50年前張活遊、白燕拍緊」如今 50歲仲要扮 26歲、扮做得佢個仔的金秀賢又 ok,老細真係唔得罪得!

時下嘅韓國男生都興梳齊蔭頭,因為「都教授」令呢個髮型爆 hit。男神金秀賢即使拍完戲都要 keep住齊蔭。

《商戰》學人玩韓劇 feel,不過劇本都係無綫師奶最愛劇種,家族爭產。抄得嗰殼,但內容繼續是是旦旦。

巡禮唔係咁

《商戰》大玩韓劇 feel,不過上年喺大台的節目巡禮時,當時祥仔仲梳緊老餅生意佬髮型,西裝並唔係貼身款,呢個黎耀祥順眼好多。

上年節目巡禮《商戰》片花中,黎耀祥嘅髮型係老餅生意佬款,襯佢好多。

《商戰》講駭客、科技騙案,無綫學人玩高科技玩意,希望唔好又變膠劇啦。但片花中依然係用搭出嚟嘅假 office景,真係好難同韓劇比。

全線韓風

大台炒韓風,除咗《商戰》要班中佬扮韓仔外,其他劇都抄韓劇元素。好似林峯喺新劇《使徒行者》又梳齊蔭頭,而陳豪同胡杏兒拍緊嘅新劇《陪著你走》,又咁啱同宋慧喬、趙寅成上年拍嘅《那年冬天風在吹》一樣玩盲妹愛情。

《那年冬天風在吹》

《陪著你走》同韓劇《那年冬天風在吹》都係講盲人愛情,好在《陪》劇以馬拉松做主線,叫做改咗少少,唔係抄曬。

林峯喺新劇《使徒行者》飾演旺角古惑仔,唔知點解會梳咗韓仔頭。

韓國《爸爸!我們去哪裡?》收得,大台亦照抄搵阿 Bob、胡諾言拍咗《爸爸也 upgrade》,據知亦會開第二輯。



鍾意就快D Share啦!
Related Posts Plugin for WordPress, Blogger...