掃呢頁CODE去手機

2014年5月7日 星期三

[FACE 363] Delete王菀之 祖藍車輪戰魯芬 BB 祖藍,王菀之,魯芬,王祖藍,MF,




戲內最爆笑場面,當然係魯芬捉住祖藍個頭夾硬咀,仲咀足 10秒。 FBI望住魯芬雙唇不斷喺祖藍嘴上面啜來啜去,真係睇到心都寒埋。

FBI

Delete王菀之 祖藍車輪戰魯芬 BB

葉念琛執導,由笑星王祖藍同王菀之主演嘅新戲《 Delete愛人》,本週四( 8日)上畫,難得今次冷面笑匠元祖許冠文亦出山聯手發功。一向有「飛屎」嘅 FBI,梗係拎住首映入場券先睹為快

《 Delete愛人》講王祖藍飾演嘅黑仔王蘇波榮,一日收到個奇怪短訊,只要轉發即可擁有 delete自己唔鍾意嘅人嘅法力。點知阿榮錯手確認短訊後,就開始除去所有眼中釘。

有王祖藍上陣,當然笑戲連場, FBI最笑到碌地嗰場就係魯芬因為祖藍老友方力申玩魔術,攞咗幾個少女嘅 5百蚊零用錢,仲將銀碼愈變愈細,少女「老豆」魯芬要求祖藍代方力申還原,否則就以「打車輪」懲罰,結果梗係變唔番,祖藍侷俾魯芬咀。

就係呢一幕,王菀之原本諗住嫁得出好開心,點知俾祖藍識穿佢扮 cancer惡化,王菀之即七情上面大叫兼爆喊崩潰(劇照係爆喊前),最後更被祖藍 delete埋,演技發揮超水準。

片中,許冠文飾演王祖藍嘅賤老闆,一開場就罰祖藍跑勻港九新界買下午茶,衰到爆!

葉念琛拍親戲,都鍾意搵班靚仔靚女做布景,今次搵咗高海寧同糖妹前度 Dominic(何浩文)飾演許冠文一對仔女。

雖然李亞男冇份演出,但上週六首映禮,李亞男亦繑住男友祖藍到場,入到戲院當然係一齊坐啦。

《 Delete愛人》由葉念琛執導,今次亦搵埋緋聞女友莊思敏上場,飾演祖藍細妹。上週六( 3日)首映後,莊思敏即聯同有份投資嘅 3D中國數碼老闆蕭定一(左二)去慶功。蕭定一更向 FBI證實《 Delete》同荷里活電影公司 Nu Image達成協議,以 390萬港元買入《 Delete》版權,開拍荷里活版。威呀!

祖藍後期仲 delete埋老友方力申,令方力申變成型爆 Iron Man。搵 Eric Kwok扮 Robert Downey Jr.(右),又幾似喎!

而祖藍同藥煲女友王菀之條感情線,其中一幕話祖藍收到醫生電話,得知女友所患嘅癌症情況轉壞,祖藍即走去向王菀之求婚, FBI都睇到眼濕濕。不過到試婚紗嗰日,祖藍發現王菀之嘅癌症原來講大話,癌症冇惡化,祖藍一怒之下,鬧爆菀之,菀之即著住婚紗大叫喪喊,演技比起佢喺《金雞 SSS》仲精采喎!唉,諗諗嚇「討厭政治」嘅王菀之開 1場演唱會( 5月 17日),賣極都唔爆,反而觀眾好似 buy佢做戲多啲囉!



鍾意就快D Share啦!