10/5勝利撥髮
做完推拿落樓，苟芸慧一臉風騷同記者揮手，仲勝利撥髮添！
封面
氹小美 黐伍姑娘 苟芸慧重整攻城計
苟芸慧（ Christine）同郭富城傳緋聞傳足 1年，前排有指苟姑娘暴肥被城城嫌棄，轉嗒周秀娜 19歲師妹 Kabby同「魔鬼胸」蔚雨芯，拒食肥膩嘢。
30歲唔後生，肥苟早前終於的起心肝，中醫行山瑜伽推拿樣樣試，務求以最短時間回復魔鬼身形，令天王回心轉意。瘋狂加操，苟姑娘趁住未有劇開，更乘機向城城身邊人埋手，包括對方的經理人小美同「邊爐腳」伍詠薇，實行等天王身邊人助自己一把。
城嫂唔易做，苟姑娘呢套全新攻城計真係許勝不許敗！
一度受甲狀腺問題困擾的苟芸慧，傳聞高峰期體重達 170磅，冇劇開冇騷出，女神慘變大山婆，更被無線勒令停工，閉關唔准見人。
孖小美推拿
事業幾乎玩完，愛情亦唔見得順利。本來同郭富城拍廣告撻著，有望接熊黛林棒做新城嫂，可惜自己身體唔生性，虎背熊腰加搣極唔甩的肥肉嚇窒城城，攻城失敗。 48歲城城更轉口味向小妹妹埋手，以 Instagram力溝只得 19歲的娜姐師妹 Kabby（許雅婷），又向「魔鬼胸」蔚雨芯抄牌囉電話，雜食好過冇得食。
輸俾𡃁妹，成功減磅的苟姑娘近月終於可以洗脫「肥苟」汙名，重新攻城。上週六（ 10日），本刊發現苟姑娘孖住城城最尊敬、合作 21年的經理人小美齊齊現身佐敦， 2人先上樓搵周潤發經常幫襯的推拿師傅梁新，不過由於該時段預約已滿， 2人惟有先去附近茶餐廳食飯，邊食邊等。
唔敢大食
行去搵食途中，苟姑娘同小美雞啄唔斷，小美講到手舞足蹈，同平時 cool爆形象差得遠，而苟姑娘亦俾足反應，全程陪笑。
2人坐近門口，減肥中的苟姑娘唔敢喪食，尤其在小美面前，只叫了一碗雲吞麵。苟姑娘唔使 10分鐘已鯨吞成碗麵，期間小美發現記者，隨即起身埋單折返上樓推拿。
據知小美跟苟姑娘感情唔錯，不只一次約埋去街，「小美幾鍾意 Christine（苟芸慧），覺得佢純品又斯文，冇乜機心，最緊要係唔會借阿城宣傳，同阿 Lynn（熊黛林）好唔同。佢知 Christine要減肥，仲主動介紹個推拿師傅俾佢。」知情人士透露。
「𠵱家好番好多」
除了識得向城城最信任的小美落藥，苟姑娘亦深明有共同朋友的重要性。最近苟姑娘主動約城城的「邊爐腳」伍詠薇做運動。 2人一齊搵黃佩霞做高溫瑜伽外，又去行山遠足，可以同對方混熟之餘又減到肥，一舉兩得！
對於狂黐小美再攻城，苟姑娘回應時唔敢多口，驚講錯嘢辣㷫城城。
F：《 FACE》 A：苟芸慧
F：今次係咪城城叫小美陪你去推拿？
A：拜拜！
F：之前浪琴個活動係咪城城欽點你去？
A：唔係呀…… Thank you！
F：以前熊黛林都冇你咁好待遇喎？
A：嚇？唔講呢啲喇。
F：𠵱家個病（甲狀腺問題）點呀？
A：好番好多喇。
識得講少句，苟姑娘明顯比熊黛林識趣啦。
東山再起
上年入秋後因為體重不斷上升，苟芸慧即被大台打入雪櫃，冇劇拍。好彩經過各種方法治療，因甲狀腺問題最肥的苟姑娘已成功減磅，慢慢回復最佳狀態。今年年中正式在大台復工。
修身乜都試
自爆甲狀腺問題最肥的苟芸慧，早前試過打泰拳、潛水同針灸減肥，但成效唔大，現時又改變策略，轉玩瑜伽同行山，更獲小美推薦醫師，推拿按穴位減肥。
兩人上週幫襯的醫師梁新，診所位於佐敦利金閣，只醫熟客唔收新症，連發哥同梁家輝都係長期客仔。梁醫師精通氣功、踩背同穴位推拿，佢肯出手打救苟姑娘，相信「肥苟」呢個朵應該好快搣甩！
|
鍾意就快D Share啦！
|
|
|
