[FACE 364] 多謝導演 契爺照住 阿嬌橫店打橫行 阿嬌,鍾欣潼,MF,

有契爺照住，阿嬌難得當片場似屋企一樣自在，一改多年黑面內向習慣，在橫店臉上整日掛著笑容。

真面目

多謝導演　契爺照住　阿嬌橫店打橫行

北上賺人仔係就係辛苦錢，不過朝中有人待遇可以差天共地！

導演劉鎮偉橫店開拍新戲《蹴鞠》， 3位港女阿 Sa（蔡卓妍）、阿嬌（鍾欣潼）同鄧麗欣（ Stephy）都係掛名女主角，本刊現場探班直擊，論戲份論片場受重視程度，唔只 Stephy淪落到變孤獨精、連阿 Sa都被比下去。鬼咩！「朝中」嗰位導演，正係阿嬌契爺，連平時出名慢熱的阿嬌都搖身一變開籠雀，唔使好似之前拍劇咁俾劇組玩，沙漠食塵咁陰功。

其他影片： >>橫店四萬嬌

一樣係北上，去年尾阿嬌人在北京演出電視劇《迫在眉睫》，說好的總導演馬偉豪因為私人原因辭拍，內地導演內地班底臨時頂替，搞到阿嬌乏人照應被劇組玩謝。半年後總算執到好籌，接拍內地電影《蹴鞠》，全程有契爺兼導演劉鎮偉親身照顧，即由「孤兒仔」升格做「大小姐」。

身為導演契女，阿嬌十足片場老闆女，趁住燈光師調整反光板，豪邁伸手即有專人遞上飲品。

據工作人員透露，得寵嬌十分識做，不時萬歲，甚得台前幕後歡迎；而契爺導演（紅衫者）亦全程監工，睇實愛女表現。

10年合作過《出水芙蓉》後，阿嬌與導演劉鎮偉一拍即合，成為上契父女。新戲《蹴鞠》亦點名阿嬌做女一號，更日日在微博曬父女合照。網上圖片

片場開籠雀

《蹴鞠》講述宋朝年間一眾愛國人士以踢球方式對抗奸臣外敵的故事。男主角是內地演員何炅，「女一」正是阿嬌，飾演長平公主一角。

開機一個月的《蹴鞠》上週拍攝已經到尾聲，雖然每日早開夜收、等多過拍，橫店亦一如既往無啖好食，不過平時唔多出聲的阿嬌就似返娘家一樣自在又輕鬆。除了香港專程飛去貼身服侍的助手，和當地司機外，片場上下無論配角定工作人員都愛圍住阿嬌氹氹轉。等埋位時，阿嬌被前呼後擁圍住侍候，反而另一位同場女演員 Stephy就十足孤獨精，不是愁樣呆望就是微信找朋友解悶。據劇組人員透露，並非 Stephy唔識做，而係《蹴鞠》根本就係阿嬌主場。

除了現場專人負責妝頭、遞水、擔擔抬抬外，阿嬌外景更有兩位英皇特派助手飛到橫店服侍，收工十足女王一樣。

Twins相隔七年再合體拍戲默契十足，劇情仲講述二人爭仔，齊齊自拍橫店素顏床照。網上圖片

冷落 Stephy

知情者說：「阿 Sa阿嬌同 Stephy，仲有劉鎮偉都唔係第一次合作，但係全場都知阿嬌係導演契女，阿嬌成日『老竇老竇』咁叫導演，導演又乜都預埋阿女，有時阿 Sa喺現場都明顯冷落，莫講話 Stephy不過阿嬌都好識做冇恃寵生驕，淨係呢個星期都萬歲過兩、三次。可能佢拍住老竇開工心情都靚啲，又的確來者不拒，所以成隊 crew都鍾意圍住佢，真係冇乜人得閒理 Stephy。」

唔使 crew爆料，其實睇「兩父女」微博都見端倪，劉鎮偉同阿嬌多年來父女相稱微博互動，開鏡一個月以來劉鎮偉大半現場自拍都係攬住「阿女」，連相隔 7年至合體拍戲的 Twins成員阿 Sa都似局外人， Stephy又確係難融入嘅。

Stephy孤獨精

阿嬌是方力申前度，自然同小方現任女友 Stephy冇乜交流，連日來記者都發現 Stephy（右）一個人打發時間，與阿嬌零交流。

Stephy在微博自稱身在橫店日日留在房中上網看書少交際，在片場內一樣自己坐埋一角用微信與友人解悶。

匿內地 6年

08年陳冠希事件後，阿嬌事業開始遭遇滑鐵盧，形象受損、工作量大減，要養家又要供樓的阿嬌，主要收入來源幾乎全靠內地，當中更絕少商業活動和代言，大部分是電影與劇集，嚇嚇都要幾個月長駐荒山野嶺無啖好食，真係辛苦錢嚟㗎！

去年 11月在北京拍攝《迫在眉睫》就被爆被劇組人員冷待、明明沒有戲份都要食風白等，阿嬌在微博不時曬出傷痕和自拍照，流露孤獨一面。網上圖片

網上圖片

08年至今在內地拍攝 7套電視劇一概都是古裝，阿嬌因此吃過不少苦頭。網上圖片

鍾意就快D Share啦！

下一篇 》