掃呢頁CODE去手機

2014年6月18日 星期三

[FACE 369] 埋身 3個月 胡杏兒攣上 TB「成龍」 成龍,胡杏兒,MF,




被爆是新歡後,上週四( 12日), Jackie陪著杏兒外出,繼續不避嫌用同款行李箱型電話殼、同在食指戴戒指。

封面

埋身 3個月 胡杏兒攣上 TB「成龍」

唔再係夾埋閨蜜李思捷同全世界開玩笑,今次胡杏兒真係「找到了!」

34歲杏兒同相戀 7年黃宗澤分手兩年兼 dry爆兩年,直至近日才傳出與同性密友過從甚密。回應新緋聞,當事人當然例牌否認、只說密友係助手,不過據本刊獲悉,今次杏兒確實被英文名 Jackie Chan,同成龍撞名的 man爆 TB埋身成功,三個月前私有化做埋貼身助手,打正牌日夜依偎!



其他影片:>>杏兒轉口味






捉手臂

Jackie一早在杏兒香閨侍候,一齊外出傾公事、再陪埋去銀行打點私事,杏兒更不時挽實 Jackie手臂,比一般助手關係更親密。 DV畫面

分手兩年,黃宗澤先後傳出多個緋聞,內地演員唐嫣、柳岩、過氣名模楊崢、仲有四洲太子女戴凱欣,杏兒則沉迷事業、閒餘日子深閨簡出,見得最多都係班同公司閨蜜。直至上週終傳出新戀情,爆出與女助手 Jackie Chan用同款電話殼、戴情侶戒指。否認新戀情後杏兒與新歡完全沒有避忌,一句助手就大條道理開脫!

香閨常客

近日趕拍新劇《陪著你走》,新「助手」 Jackie亦日夜侍候。入行 15年,一早已經晉級當家花旦之列,更攞埋視後做咗大台台柱,杏兒直到最近才首次自費聘請私人助手。

表面上話關係只限賓主,上週四( 12日),難得不用趕拍劇、約了電視台經理人在灣仔見面,下午三點杏兒從大埔香閨出發時, TB助手已經常伴左右,明顯大早就殺上香閨。上車落車, TB一馬當先、杏兒小鳥依人捉實對方手臂,與經理人開會傾公事, TB則靜靜殿後話頭醒尾,最後傾完公事,杏兒趁住放假往銀行處理個人事務,連照料多年的經理人都費事應酬,只把 TB留在身邊,兩個關係非一般。

離開香閨去到灣仔,杏兒同大台經理人密密斟, Jackie就醒水殿後,難怪特別得杏兒寵幸。

三月開始轉職, Jackie已經極速成為杏兒香閨常客,在微博毫不隱瞞對杏欣賞愛慕,還愛屋及烏,自爆電話相簿除了杏兒、就是杏兒家中愛貓; Jackie更在 fb內曬與杏兒蜜照,杏兒笑到呢!網上圖片

fb曬蜜照(網上圖片)

宇宙最冧

戀愛空窗兩年,上月尾( 31日),與徐子珊出席雜誌活動時,杏兒突然風騷承認有新戀情,正好在 Jackie入宮後不久。

TB與成龍同名為 Jackie Chan,初入行時做過宇宙最強甄子丹助手、過去幾年在英皇唱片部效力,年初因為工作關係認識杏兒,不只火速獲得信任,於今年三月開始任貼身助手,更靠細心細緻成功冧掂杏兒。

「其實女明星特別鍾意請 TB做女助手,一嚟擔得抬得,二嚟又係同性,換衫貼身照顧都唔使驚蝕底嘛!最緊要係佢哋好細心好忠心又話頭醒尾,未出聲已經知道你想做乜、想食乜,無論晨早定深夜都揸車速遞到家門口甚至床邊。講真,有返咁上下年紀同資歷嘅女星,都俾啲男人玩到無曬信心,突然間有個人咁識照顧自己,真係好快投降。」知情者說。

自爆蜜運

女人最美好的青春八年都投資在黃宗澤身上,最後卻因為男方花心最終分手收場,上次情傷後,杏兒表面堅強,實情卻在訪問中多次透露對男性失去信心。年初為卓韻芝電影《失戀急讓》客串、被影帝張家輝跪地求婚,就趁機呻:「現實中有咁好嘅男人就好喇!知你想要乜就帶埋層樓契嚟求婚,仲要跪曬地咁有誠意!」

嗰頭仲呻現實世界好男人缺貨,呢頭杏兒已經態度大轉,上月尾出席雜誌活動時自爆愛情有著落:「未確認住……等確認咗至話俾你哋聽,對方唔係圈中人,唔係抗拒圈中人,係圈中都冇乜選擇。」圈中冇選擇,異性更加窄,都係 TB貼心好!

三月撻著 Jackie前, dry爆杏兒一度夾埋李思捷開個「我找到了」大玩笑,事後埋言「任何事都有可能發生」便露出拗攣端倪。網上圖片

網上圖片

TB Jackie人緣好

最強助手

初入行 Jackie曾經是宇宙最強甄子丹助手,話頭醒尾與甄生甄太甚至甄太胞妹汪圓圓都關係極佳。網上圖片

集女星郵

除 Jackie初入行時開工有鋪集郵癮,同關之琳合照戰利品即鋪上網曬。

離開甄子丹後, Jackie轉職英皇唱片部,服侍歌手包括 Twins、泳兒、相中的鍾舒漫(右)和關智斌(左)。網上圖片

拍劇貼身侍候

胡杏兒拍劇一向冇助手跟身,年初開始,忽然多咗個同性助手 Jackie Chan,出入有人服侍,男友邊可以咁細心呀?

日頭服侍

上月杏兒拍《陪著你走》時 Jackie Chan已經跟實杏兒,服侍周到。

拍攝期間,胡杏兒與工作人員吹水, Jackie Chan就喺旁邊搭嘴,似朋友多過似助手。

夜晚護花

開工跟到實,收工後 Jackie亦被拍到陪埋杏兒返閨,關係比一般助手緊密得多。

轉軚有因

男女藝人拍感情戲日對夜對往往戲假情真,男藝人撻著女助手亦時有聽聞,相戀廿年好事近的古巨基就是最佳人辦;至於女藝人,貪其方便又忠心,都愛聘請 TB做助手,不少更與同性助手傳出緋聞。

鄭秀文

同安仔離離合合 20年, 04年 Sammi與安仔分手後便曾經傳出寄情於多年助手 Eleanor身上。圖片

衞蘭

曾經被舊愛 Gordon出賣外洩親密照,衞蘭亦一度對異性失信心, 09年傳出與 TB助年阿端發展斷背情。《忽然 1周》圖片

薛凱琪

感情多年冇著落,薛凱琪身邊都只得同性密友圍繞多次傳出攣情,最近便被拍到與助手 Van攬頭攬頸。網上圖片

鍾欣潼

方力申、陳冠希到韓籍 K先生都沒有好結果,一度與 TB助手大嬸傳出緋聞。 09年大嬸曾經轉幫鄭秀文,亦因為私通阿嬌搲著數被 Sammi怒炒。《忽然 1周》圖片



鍾意就快D Share啦!