[壹週刊 1272] 扮潮人揸潮車 周柏豪挑機余文樂 柏豪,余文樂,周柏豪,M1,

探熱針

扮潮人揸潮車　周柏豪挑機余文樂

早前周柏豪因為「貪就手」，偷食籃球隊「橫洲工業」隊友妹妹斷正，除被逐出球隊，更與好兄弟余文樂終極反面。各行各路，周柏豪冇波打，一條心拍戲搵錢，唔單止豪花二十四萬投得心水靚牌「 PH」，最近再花過百萬買 Benz jeep、襯靚牌。兄弟做唔成，但周柏豪卻抄足余文樂，做潮人、揸潮車，甚至將對方設定為假想敵，爭做潮界一哥。

拍戲換車

以潮人自居的周柏豪，今年一月以自己英文名 Pak Ho縮寫「 ph」，創立自家品牌 logo，雖然被指抄襲 Planet Hollywood餐廳的標誌，但周柏豪話之你，再花二十四萬投得自訂「 PH」車牌，原本打算買架 dream car襯靚牌，可惜當時因為屋企等錢使，周柏豪未能如願，「柏豪投到個牌之後，興奮到周圍同朋友講，可惜當時佢屋企有事用咗筆錢，加上網上時裝店又使咗佢唔少積蓄，所以冇錢買新車襯靚牌，不過佢之前唔放假連拍三部戲，終於俾佢有錢買到架百萬 Benz jeep，再套埋個『 PH』，識襯，一定係咁襯㗎」知情者說。

新車平治 jeep五月落地，價值接近百萬。

跟莊思敏合作電影《小姐誘心》，柏豪就揸住新車到外景現場。

扮肌佬

Dream car到手，周柏豪更好事成雙，可以到紅館舉行處男個唱，「本來開得一場，但因為贊助商多，分走唔少飛，條街唔可以冇飛賣，所以要開多一場。講真，柏豪冇乜大熱 hit歌，所以呢幾個月不斷做健身，打算到時騷六嚿腹肌，反正而家潮流興，唔唱得都睇得嘛！」知情者說。

新戲中，跟女神劉心悠有對手戲，他亦將二人合照放上微博。

九月在紅館開個唱，兩場大爆，柏豪近月操肌練大隻，早前更跟經理人在記者會上笑住宣布喜訊。

拍完跟 Liddy合作的電影《四非》，柏豪再接了兩部電影，加上演唱會大爆，有錢落袋的他即買嘢獎勵自己。

鬥到底

投靚牌、揸潮車，甚至做潮服生意，周柏豪一舉一動，其實只係余文樂做乜，佢就做乜。「柏豪當日冇諗過樂仔會咁絕情，話反面就反面，兄弟都冇情講。但佢唔覺係咩損失，反正柏豪覺得自己行緊運開始紅，某程度上仲會視樂仔為假想敵，除咗想歌、影兩邊企穩，多樂仔一瓣，連買車，都要買架同樂仔同款。柏豪而家冇晒班波友，全部企樂仔嗰邊，所以佢都好耐冇打波。柏豪今年拍咗三部電影，套套做男主角，佢最想套戲出街之後，有人讚佢演技，到時無論事業又好、揸咩車都好，都可以同樂仔鬥到底。」柏豪身邊友人透露。

陳偉霆都有一架

陳偉霆都係潮男，跟余文樂同期擁有平治 Jeep，經常揸住接載女友阿 Sa。

11年　平治 jeep

14年林寶堅尼

一一年，余文樂已經擁有平治 jeep，更揸住去超級市場入貨，近年賺到錢，余文樂再升呢，購入價值八百萬的林寶堅尼 Aventador Coupe，早前因泊在傷殘人士專用位而被網民鬧爆。

鍾意就快D Share啦！

下一篇 》