爆壹爆
大孖沙戴綠帽
爆哥周不時都有順道去中環探吓班大狀老友，佢哋近排都忙緊幫城中大孖沙出出入入法庭聽審一單大案。好多人諗極唔明，大孖沙正印都算明艷動人，點解佢會搵個咁其貌不揚嘅紅顏知己，當爆哥諗到爆頭時，唔通大孖沙食得好嘢多要轉食吓重口味？
咁啱一個商界友人知道內情，佢私底下爆料，道出大孖沙同佢太太鮮為人知嘅秘密。原來當年大孖沙伯爺就係唔鍾意大孖沙老婆太明艷動人，所謂娶妻求淑女，但大孖沙件女就夠騷夠姣，可惜仔大仔世界，最終無奈俾咗件靚女入門，但大孖沙伯爺一早提個仔要留意自己老婆一舉一動。卒之不幸言中，真係俾大孖沙捉到老婆忍唔住做出牆紅杏，由於當初大孖沙為咗娶靚老婆已同屋企搞到差不多反面，為咗顧全面子及將來分身家唔會蝕底，大孖沙唯有啞仔食黃連，但同靚老婆感情就一去不返。自此，大孖沙就更加唔追求外在美，轉而追求內在美，當遇上紅顏知己後，大孖沙真係相逢恨晚，而且紅顏知己處處肯為自己分憂，即使大孖沙遭遇人生大劫及兄弟反面等，佢紅顏知己一直都不離不棄咁陪住佢。
雜交會周街貼海報
行走江湖，聲色犬馬一定少不免，但食多會滯，有人就會轉食重口味。話說早前爆哥個老友阿 John經過尖沙咀山林道，見到一張粉紅色海報，海報內有一班全裸男女，原來呢張海報係一個本地雜交會所貼，仲公開招新人入會嘅宣傳，真係夠晒誇張。爆哥雖然風流，但對雜交及多 P性愛活動仲未接受到，不過阿 John就眉飛色舞，話自己都曾參加過雜交會搞嘅活動，阿 John仲爆料話，呢個會由 07年成立至今，會長叫 Chris。其實香港都有幾個同類型雜交會，早排警方就拉咗其中一個會嘅負責人及有關成員，懷疑負責人搞活動時從中收取利益，而女會員則收錢來服侍男會員。不過阿 John就拍心口保證，話 Chris呢個會係不牟利，大家純享受性愛喎，所以警方最後都奈佢哋唔何。見阿 John愈講愈興奮，仲話介紹爆哥加入，佢話入會手續係先經會長審查會員身份，之後要附上全身裸照，再驗身後就可以入會，活動前會員一定要沐浴，原來除了衞生外，此舉可以杜絕記者及偷拍人士混入，之後當然是酒池肉林淫亂場面。
爆哥就睬你都傻，自己大把女友都未有時間安排，邊得閒去呢個騎呢會，仲話要影裸照俾人存檔，日後點行走江湖呀，呢個阿 John真係打得少，而且周圍貼街招搵新人好離譜，好彩俾警方見到，之後冇幾耐就將呢張海報撕走。
靠黑二代漂白
富二代聽得多，但黑二代就少人講。
近日爆哥入去屯門搵江湖朋友飲茶，講開屯門新形勢，江湖朋友說屯門猛人蘇牛，曾經雄霸一方，但近年差不多已金盆洗手，依家所有嘢由佢洪姓頭馬出面。聽聞蘇牛轉搞正行生意，例如屯門元朗一帶私人骨灰龕生意。江湖中人話蘇牛修心養性玩轉型，全部都係因為個乖乖女，佢個女好生性，讀得書多仲考埋專業牌照，後來仲叻到選做區議員，仲入咗一個大政黨。蘇牛得此乖女，當然父憑女貴，自己亦扶搖直上，唔行蠱惑專注打入上流政經圈。好似上年屯門一個盆菜宴，蘇牛個女就請咗佢個黨正副主席嚟食盆菜，好彩事前黨正副主席收到風，知蘇牛都會出席，為怕遭傳媒詬病，佢哋最終齊齊無出現，令蘇牛以為可以同兩會議員影張威水照嘅好夢落空。不過江湖朋友話唔好睇小蘇牛，因佢個女之前想選入更高一級議會，可惜差些少票數落敗，來屆議會選舉，若果蘇牛個女成功當選，屆時蘇牛就大把世界。估唔到江湖大哥因為囡囡改邪歸正，黑白道嘅嘢有時真係好似電影橋段咁，不過爆哥就認為，英雄莫問出處，黑二代分分鐘生性過富二代。
爆哥乜料
金融界撈家，穿梭黑白政商界，
朋友遍布旺角至中環，每星期都八到唔同料，
同《壹》仔讀者過吓癮！
|
鍾意就快D Share啦！
|
|
|
