掃呢頁CODE去手機

2014年12月10日 星期三

[FACE - 394 - 外地娛樂] MAMA鬥 sexy  Girl's Day趷贏 AOA MAMA,BKD_S,MF,




Girl's Day

4年前出道的 Girl's Day,由 4位 20歲至 28歲的索女組成,今年憑〈 Something〉一曲 hit爆韓國,上週出席《 MAMA頒獎禮》時,着住高衩裙騷長腿,仲玩埋自摸,超惹火。

韓飯台

MAMA鬥 sexy  Girl's Day趷贏 AOA

連續 3年來港舉辦的《 Mnet Asian Music Awards》( MAMA)已於上週三( 3日)完滿結束,結果 EXO奪 4獎成大贏家,天團 BIGBANG主將太陽以單飛姿態擸走「最佳男歌手」等 3個大獎,一如觀眾所料。

其實除 EXO同太陽鬥得激烈,兩大新晉女團, AOA同 Girl's Day於頒獎禮當晚亦來個性感大激鬥,鬥趷籮、鬥騷長腿,大跳火辣 K-pop舞,真係春光無限。

有獎攞

當晚 Girl's Day擊敗對手 AOA及 SISTAR,攞走「最佳舞蹈表演女子組合獎」,成績唔錯。

AOA

12年出道的 AOA,由 7位 18歲至 24歲的少女組成。今年的〈 Like A Cat〉都好紅,但未紅到攞獎,所以只能於「紅地氈儀式」做表演嘉賓,但一樣博到盡,趷籮跳勁舞。珉娥因為她的爸爸最近病逝,所以缺席 MAMA。

代領獎

AOA雖然冇獎攞,但亦上台代缺席的同門師兄 CNBLUE領「最佳樂隊演繹獎」曝吓光。

MAMA頒獎禮中,兩大性感女團點樣比併?

Girl's Day有獎攞不特止,還夾埋巨肺歌手 Ailee(右三)玩 featuring,一齊 jam歌同大跳火辣舞,令全場氣氛高漲。

首先是 AOA先出招,當日 AOA 6個索女先踩入紅地氈獻唱今年代表作〈 Like a Cat〉做暖場嘉賓,期間着上黑皮短裙的 AOA不斷扭籮跳勁舞,搞 high現場觀眾。不過 4人女子組 Girl's Day都不甘示弱,當晚在 MAMA頒獎禮上着上高衩晚裝的 4人,獻唱 hit歌〈 Something〉時,不時大騷長腿,更狂趷籮甚至擘腿,動作惹火,引來全場尖叫。雖然惹火程度不相伯仲,但論當晚成績,始終係攞走「最佳舞蹈表演女子組合獎」的 Girl's Day,比起冇獎攞的 AOA先贏一仗。

AOA同 Girl's Day喺韓國邊隊紅啲?

講到今年兩隊女團在韓國的成績,首先 AOA的代表作〈 Like a Cat〉只在音樂節目《人氣歌謠》取得冠軍,但 Girl's Day的代表作〈 Something〉,不單在各大音樂節目流行榜冠軍,早前在《 Melon Music Awards》更攞埋「 Top 10歌手獎」。樂壇方面 Girl's Day贏晒,但視壇方面 AOA就反勝未有劇拍的 Girl's Day,早前 AOA成員珉娥就客串演出 tvN電視劇《花樣爺爺搜查隊》,而另一位成員雪炫更有份參演李敏鎬新戲《江南 Blues》,實行歌、影、視三線發展。

AOA樂壇成績唔及 Girl's Day,但最近唔只有成員珉娥拍劇,另一成員雪炫更跳上大銀幕,拍住韓流亞洲男神李敏鎬合演新戲《江南 Blues》。

鏡頭後仲好睇

MAMA頒獎禮除咗大家在鏡頭前見到的豪華舞台與巨星的精彩演出,其實鏡頭背後亦有大量有趣位,一樣咁好睇。

太陽永遠第 1行

當日所有候選得獎者均被安排坐在台上的候選歌手區, 4小時的騷內,由於要頒不同獎項,所以歌手們包括 EXO及 WINNER等都要不斷轉坐位,惟獨太陽永遠坐第 1行的同一個座位。佢地位去到邊?唔使多講

宣美論盡

離開 Wonder Girls作單飛發展的宣美,今年憑〈 Full Moon〉一曲,擸走 MAMA「最佳舞蹈演繹獎」。不過行出去領獎時,宣美因裙尾攝住喺櫈腳,最後要工作人員幫手拉番出嚟,認真論盡。

INFINITE以為有獎

當頒獎嘉賓宣讀「 K-pop Fans Choice Female Awards」候選名單時, INFINITE成班隊員傾緊偈。當聽到自己個隊名時, INFINITE各成員以為自己得獎,即拉大隊行出台前,但最後知道搞錯,惟有好尷尬咁返埋位繼續坐。



鍾意就快D Share啦!