2015年3月10日 星期二

郭偉亮婚前偷食 葉佩雯劈腿回敬 郭偉亮,Eric Kwok,葉佩雯,

2011年結婚的Eric與Grace原來在情路上遇過波折。(資料圖片)


郭偉亮婚前偷食 葉佩雯劈腿回敬

樂壇模範夫妻郭偉亮(Eric)及葉佩雯(Grace)相愛14年,經常孖住出動的他們原來戀愛路上曾有暗湧!早前Eric兩公婆一起參與電視節目,談到相戀遇過最大的危機,Eric自爆拍拖初期曾背Grace偷食:「做咗啲係男人都想做嘅嘢。」不甘示弱的Grace竟然以相同方法「回敬」Eric!Eric更指Grace曾持刀望着他,最後被Eric摑醒,而Grace亦承認曾掟刀。到前晚,兩人外出後返寓所,未知是否因怕被記者追問偷食事件,竟一反平時大方任影的常態變得閃縮。

音樂人郭偉亮及葉佩雯一直是圈中的模範夫妻,相戀多年的他們在2011年拉埋天窗。正當大家都以為相戀14年的兩人戀愛路順暢無阻時,豈料Eric早前竟在電視節目上自爆拍拖初期曾偷食,而Grace為報復亦曾出軌!

認躁爆飛刀

Eric與Grace早前參與王祖藍及李亞男主持的電視節目《蜜月到訪》,眾人到新西蘭遊玩之餘,Eric及Grace又乘機向祖藍及亞男傳授相處之道。在上周五播出的最後一集,四人邊歎美食邊暢談同居的苦與樂。祖藍問Eric及Grace同居生活是否是如童話般美滿?Grace坦承兩人同居初期「幾難搞」:「因為我未試過同居,二來我情緒起伏大。」之後Eric爆Grace性格火爆:「同居頭兩年佢隔日會掟嘢,未見過女仔掟嘢掟得咁行。」Grace坦承自己曾掟刀、剪刀和玻璃杯。Eric續說:「我哋隔日會嗌大交,好記得有次喺廚房,佢攞住把刀望住我,好似癲婆咁。我都係呢世仔第一次摑女人,我一巴星埋去叫佢醒吓。」

Eric在《蜜月到訪》中自爆自己與Grace都曾有外遇。
  • Eric在《蜜月到訪》中自爆自己與Grace都曾有外遇。
前晚Eric與Grace駕車帶愛犬外出,返回寓所時態度閃縮,Grace急步抱愛犬先上樓。
  • 前晚Eric與Grace駕車帶愛犬外出,返回寓所時態度閃縮,Grace急步抱愛犬先上樓。

談到戀愛路上遇過最大的危機,Eric表示是熱戀過後對對方失去感覺,並自爆曾偷食:「做咗啲係男人都想做嘅嘢,應該話如果我冇做呢啲嘢而結婚會好唔死心。我為咗呢個好唔穩定嘅女仔(Grace),用咗好多時間同心機先可以建立到信任。但拍咗拖三、四年發生咗呢件事,破壞咗信任,無辦法彌補。」Eric隨即大爆對偷食事件放不低的Grace用同樣方法報復:「咁啱身邊總有啲『朋友』,嗰段時間,佢就報復。」

Eric指最難捱是在Grace出軌後自己每日都要承受痛苦:「喺知道件事之後嘅九個月,佢未真係斬纜,嗰九個月我每日都要承受番,諗佢每日係咪真係出去做嘢,定係又喺背後見嗰個人。」所謂患難見真情,兩人發生偷食事件後,經商議決定再開始,對此Grace坦言:「嗰陣一係分手,一係一齊,我哋決定做最難做嘅嘢,就係重新開始,將所有我對佢嘅唔信任,到我報復都要完全原諒,然後再開始。」

Eric整理完車尾箱才上樓。
  • Eric整理完車尾箱才上樓。
Eric和Grace與祖藍和亞男在節目中分享愛侶相處之道。
  • Eric和Grace與祖藍和亞男在節目中分享愛侶相處之道。
Eric於2011年開演唱會時,突然向Grace求婚兼註冊結婚,期間獲大班圈中好友見證。
  • Eric於2011年開演唱會時,突然向Grace求婚兼註冊結婚,期間獲大班圈中好友見證。

「唔會再犯」

記者昨日就偷食事件以短訊聯絡Eric,他回應道:「仲有乜嘢衰嘢呀男人。(兩公婆喺節目互爆曾偷食怕唔怕對方唔開心?)都過咗咁耐,係人都會做錯嘢,講出嚟即係唔怕,唔會再犯,冇事嘅。」在節目上公開互爆當年偷食秘密的兩夫婦早已原諒對方,十分sweet的他們經常孖公仔出街。

前晚10時許,Eric與Grace帶愛犬在跑馬地遊完車河駕車回家,兩公婆平時大方任影,但當晚他們一反常態,態度閃縮,未知是否因怕被記者追問偷食事件,Grace更避忌得抱住愛犬一支箭衝上樓,而Eric執拾車尾箱後即上樓陪妻。

攝:追蹤組

文:音樂組

鍾意就快D Share啦!
Related Posts Plugin for WordPress, Blogger...