2015年3月25日 星期三

《學是學非》扮嘢王 中大搞鬼教授:我流住星爺血 [FACE - 409 - 大專校園] 星爺,周星馳,MF,



歐陽偉豪 中國語言及文學系博士

原來喺《學是學非 2》扮鬼扮馬都係得一隻 tvbuddy咁大把,從來唔收錢,仲叫記者唔好追問,盞「愈問愈傷心」,不過佢話冇金錢利益輸送,反而放心自由創作。

Main Camp

《學是學非》扮嘢王 中大搞鬼教授:我流住星爺血

扮嘢叻易出位,喺大台剛播完嘅《學是學非 2》,就有位中大中文系高級講師因經常扮鬼扮馬位已上,連一向出名難服侍嘅高登仔,都盛讚呢位人稱「 Ben Sir」嘅歐陽偉豪博士好抵死。

《 FACE》校園組叫 Ben Sir扮《衝上雲霄》「 cool魔」張智霖,佢諗都唔諗就應承:「嘩,正喎!況且我係流住周星馳嘅血,只要推廣到中文,搞吓笑冇計嘅,好 enjoy出鏡扮嘢㗎!」

同 Ben sir一見面,佢劈頭第一句就係:「等你好耐喇衰鬼!」愛扮嘢,只因想令中文冇咁悶:「 05年同祖藍拍檔做無綫收費電視兒童節目,第一次扮廚師教小朋友廣東話正音,不過出嚟好生硬。」之後 Ben Sir一直有幫 TVB拍教學節目,直至今年拍《學是學非 2》,索性叫佢一腳踢自由發揮兼度埋稿,「咁教中文本身就係好悶,再唔用啲輕鬆幽默嘅手法,觀眾瞓着喇!反正我自己教書有時都會玩吓角色扮演,上堂會扮吓麥當勞叔叔,咁咪試吓扮唔同角色囉!加上楊過、黃飛鴻啲大俠,我想扮好耐,結果又估唔到反應咁好。」

日日上高登

Ben Sir佢自己日日都會上 fb、高登睇番網友對《學是》嘅評語,不過佢抵死咁話自己絕對冇高登帳號,只係 CD-rom一名。

Ben Sir(原名 Benjamin)是怎樣煉成的?佢托托眼鏡笑笑口話:「自己最鍾意睇星爺同發哥,鍾意佢哋搞笑得嚟夠自然,所以咪成日睇佢哋啲戲取經囉!由以前星爺飲啖茶、食個包,到最近發哥嘅《賭城風雲 2》我都有入戲院睇,咁先可以同年輕人拉近啲!」

Ben Sir仲長期登入 fb,又日日睇高登,睇吓𠵱家興啲咩潮語,又睇番高登仔對自己嘅評語改進,「我淨係每次度一集 7、 8分鐘嘅稿同諗角色,都用一個禮拜時間㗎!要多人留意中文,唔可以是是旦旦!」

學過兒

電視畫面

《學是學非 2》裏面 Ben Sir扮邊個角色覺得最神似最滿意?就係《神鵰俠侶》嘅楊過。

扮伯虎

網上圖片

有得扮唐伯虎兼同高登女神心穎 BB自拍兼放上 fb,唔少毒拎加麻甩仔肯定葡萄死。

上通識教粗口

連出名奄尖嘅高登仔都大讚,中大同學直頭當佢男神,同學爭住上佢堂,正常其他老師開嘅通識科有 4、 50人已叫受歡迎, Ben Sir教嗰科《追蹤粵語》(通識科之一)就過百人報讀。

「我上堂鍾意輕輕鬆鬆鄧梓峰,好似分析歌詞、電影對白,甚至當中幾堂專門探討粵語粗口嘅文法,好似好多年輕人𠵱家會覺得×噏,未必係粗口,戇××先算,又例如點解香港人會不約而同將啲粗口擺喺句子嘅唔同位置?好似千X幾蚊,好×貴喎、唔×係呀化,點解唔會將個粗口擺喺句子第二度呢?粗口都有 pattern,咁呢啲題材咁新穎,啲同學咪有興趣上囉!」

Ben Sir話自己幾十歲人,有冇民主都習慣晒,不過都身體力行去金鐘教書支持學生及民主。

Ben Sir老婆原來都係小學老師,仲大爆自己追太太嗰陣唔單只喺情人節約出街咁簡單,而係自製「情人週」氹對方。

學界福祿壽

扮鬼扮馬氹學生又點只 Ben Sir一個?《學是學非 2》裏面都有高大靚仔嘅 Patrick Sir着古裝教英文,仲有張欣欣同 K.O.TEN都好愛扮嘢㗎!

Patrick Sir(林溥來)曾經係英文補習社創辦人兼導師,現為幼稚園校監,靚仔校監少有呀!

當補習天王張欣欣仲係叫楚鋒時,拍過一輯古裝宣傳片,張現為活學教育中文科導師,仲因為經常貼中題目而被稱「中文常勝將軍」。

K.O. TEN曾為現代教育拍了一輯《職業特工隊》宣傳海報,但 2010年被英皇教育告違約破產,現為星河教育創辦人。

鍾意就快D Share啦!
Related Posts Plugin for WordPress, Blogger...