2015年3月25日 星期三

唔想再做純純兔 「皇阿媽」梁小冰:係時候轉型 [FACE - 409] 梁小冰,MF,



梁小冰在《導火新聞線》演惡死老總汪海藍,演技才得以被認同,但她沒有怪責大台,反而認為被大台磨練才有今日成果。

爆 Like王

唔想再做純純兔 「皇阿媽」梁小冰:係時候轉型

HKTV又有神劇,《導火新聞線》唔只劇情神級,演員演技亦好出色,奸到出汁皇阿媽梁小冰同正義記者方凝周家怡,在大台十幾年做慣花瓶,真係唔演都唔知咁好戲!

喺《導》集集喪鬧人,又要出賣親生女同孫女嘅梁小冰, 19歲選港姐入行,多演古裝戲,當年有「蝴蝶美人」之稱, 97年因為捱到殘離開大台,之後參演舞台劇,又在內地及台灣拍劇為主; 45歲小冰首次惡形惡相演奸角,就是要擺脫花瓶的面具。

F:《 FACE》 冰:梁小冰

F:皇阿媽(汪海藍)呢個角色講嘢好惡死把聲好嘈,係導演要求定係你塑造出嚟?

冰:導演由得演員發揮嘅,聲線係自己調校,因為有 24集,唔可以太平淡去演呢個老總角色,我研究過,如果樣樣嘢都擺喺心度,細細聲,個角色就變得好陰濕好奸狡,但佢(皇阿媽)係一個大開大合,唔係陰濕嘅角色。遇過好多人係汪海藍嘅性格,跣你就跣你、踩你就踩你,我好憎呢類人,就因為我憎呢種人,所以要特別誇大佢,睇到觀眾好恨囉!

梁小冰同周家怡嗌交呢場戲,由於對白多情緒起伏又大,被網友稱為國際級嗌交。電視畫面

小冰在劇中有性感露背戲,想知佢點解今時今日至咁博,就要下載 FACE Pop睇片喇!電視畫面

以往多演古裝的小冰,曾與小豬羅志祥(右)合演《少年梁祝》,更因此同陳嘉輝(左)撻着,之後結婚, 07年仲生埋囝囝 Louis添!《蘋果日報》圖片

F:喺大台咁多年,係咪浪費咗你嘅演技?

冰:又唔可以咁講,我離開大台時 28歲,冇可能做到呢啲角色,不嬲係做周家怡方凝嗰啲,正派實係俾個反派蝦嘅。我係做慣咗一啲忠嘅角色,絕對掌握到做一隻純純兔,一定受歡迎,一定受保護;到呢個年紀已冇可能再做愛情劇、偶像劇,係時候轉型。

F:同男神王宗堯合作有乜感覺?

冰:拍嘅時候我以為佢係新人,傾開至知原來佢做咗十幾年。佢喺《導》嘅形象污糟邋遢,有集講我抽起佢張被叫佢起身,我一揭起張被,吓!冇拉褲鏈,得番條底褲,點呀導演,我話我好㷫呀,點解啲男演員可以咁 open㗎?王宗堯話:「皇阿媽我係咁㗎嘛,你嚟緊呢 8個月都要接受呢啲挑戰架喇!」

F:最難忘邊場戲?

冰:同家怡嗌交嗰場啦,被網友譽為國際級嗌交嘛!仲有出賣咗個女(黃美棋)俾石修打嗰場,修哥一到就全世界講:「我真係摑小冰,總之我摑到佢飛起,要一 take過!」轉頭修哥靜靜雞同我講,陣間嗰巴唔會真打,叫我做反應得啦,結果一次過拍完,所有人拍手,冇人知係假嘅!

F:你有段時間去咗演舞台劇,對演《導》有冇幫助?

冰:如果冇舞台劇嘅經驗,汪海藍可能唔係咁樣, 05年搵老師教演技,每年上兩個 course,持續咗 10年,喺劇團演戲攞咗個「優秀女演員獎」,幾年後遇上汪海藍呢個角色係用得到,舞台劇訓練你咬字要清晰,所以汪海藍鬧人好似機關槍,但你依然聽到佢鬧咩!

王宗堯在劇中不經意露點,嚇到梁小冰大叫,但又大讚:「有啲咁驚喜嘅演員,至有咁驚喜嘅劇嘛!」電視畫面

古惑石修聲稱要真打梁小冰一巴,實情錫住小冰,結果兩人演技呃晒所有工作人員。

鍾意就快D Share啦!
Related Posts Plugin for WordPress, Blogger...