掃呢頁CODE去手機

2015年3月25日 星期三

我最懷念哥哥的…… [FACE - 409] MF,



全知言

我最懷念哥哥的……

每年嘅 4月 1日,唔再係充滿笑聲嘅愚人節。 2003年嘅愚人節,哥哥張國榮同我哋開咗個好大嘅笑話,從此, 4月 1日亦變成廣大市民懷念哥哥嘅日子。

雖然哥哥已經離開我哋 12年,但佢每一首歌、每一部戲,甚至每一個表情,我哋都仍然記憶猶新。咁大家又最懷念哥哥乜嘢呢?

舒淇 非常親切嘅大哥哥

佢嘅親切同埋好平易近人,因為我初初喺香港,第一部(片)做新人嘅時間,第一次同佢合作電影(《色情男女》),佢無俾任何嘅壓力我,即係會好主動咁同我傾偈,教我點做戲,叫我放鬆吓自己呀,唔使咁多壓力呀,就覺得佢係一個非常之親切嘅大哥哥囉!

《蘋果日報》圖片

馬詩慧 難忘〈怪你過份美麗〉

咁當然係我同佢一齊拍嘅 MV啦,〈怪你過份美麗〉。因為我自己好少拍 MV,我諗係一個幾特別嘅經驗

Janice Man 為你鍾情,傾我至誠

我最鍾意哥哥嘅一首歌係,「為你鍾情,傾我至誠」,呢一首歌點解呢?因為之前我拍一套戲《為你鍾情》,咁我喺入面飾演一個角色,其實主題曲都用咗呢一首歌!係我好鍾意嘅一首好經典嘅名曲

周柏豪 〈左右手〉遇上〈路過蜻蜓〉

我自己最喜歡哥哥當然係佢幕前嘅工作表現,佢嘅音樂令我記起好多嘢嘅。因為喺佢仲喺度嘅時候,媽咪都經常聽佢嘅歌,食飯時又會放佢嘅錄音帶出嚟聽,咁每一首歌其實都好熟,甚至唔需要背歌詞添!我自己喺哥哥咁多首歌入面最喜歡就係〈左右手〉,歌詞有意思啦,我認識哥哥嘅時間係比較後期啲,但係到佢離開,我就會追聽番佢早期嘅作品,佢有好多歌大家都熟,〈路過蜻蜓〉同〈左右手〉我自己比較喜歡。

街坊 最記得哥哥的長髮

咖哩  21歲

我呢個年紀其實對哥哥嘅印象唔係咁深嘅,咁我對佢兩個印象就係拍過《倩女幽魂》,同埋有一個好經典嘅長頭髮囉!我無諗過一個男性係可以將自己嘅形象轉化成為一個好似模菱兩可但又唔係男人,但又未至於係女人嗰個形象,咁所以就覺得呢件事好突破。

Tammy  70後

〈大熱〉吖!即係 fing髮嗰個!因為我覺得佢好大膽囉,即係好突破嘅演出,展露佢自己嗰面出嚟,咁好真情流露啦佢。佢不嬲都靚仔,佢長短頭髮都靚仔!我幾鍾意張國榮㗎!

Apple  18歲

最鍾意〈為你鍾情〉,鍾意啲歌詞,聽過佢啲歌幾首咁

知無不言 言無不盡 我係全知言

鍾意就快D Share啦!