2015年4月17日 星期五

難忘拍戲割損腳 美棋 BB︰媽咪孭我衝落山睇醫生 [忽然1周 - 1029] 美棋 BB,黃美棋,MW,



美棋 BB經常讚媽咪靚身材正,今次拍攝,她更說服媽媽着性感短裙,搞到黃媽媽好尷尬!

娛樂喧

難忘拍戲割損腳 美棋 BB︰媽咪孭我衝落山睇醫生

世事冥冥中自有主宰!美棋 BB(黃美棋)最近同媽咪赴韓國拍攝《帶阿媽去旅行》,其間得知媽咪因為家貧,曾經兩次想遺棄她,但美棋 BB坦言沒有怪媽咪。

皆因她做童星的時候,母親對她照顧無微不至,令她感受母愛偉大!她開工 7小時,母親就做足 10小時。除了照顧美棋 BB飲食之外,有次拍攝發生意外,母親就化身守護天使,拼命孭着她落山睇醫生。









當年美棋 BB家境貧困,黃媽媽懷着美棋 BB的時候,已經有一仔一女,所以曾想到家計會墮胎,醫生叫佢睇定啲。後來黃媽媽再搵醫生,點知醫生外遊未返。等到醫生回港時,又因為美棋 BB已經太大,唔可以墮胎。難怪美棋 BB都話:「多得家計會,我依家先喺度咋!」

美棋 BB雖然成功出世,不過當時有個無兒無女的親戚想要她,幸好黃父知道後鬧爆黃媽媽:「仔女生咗落嚟就應該養大佢,冇理由送俾人。」兩次考驗,美棋 BB終於能夠留下來。黃媽媽拍攝節目時才首次提起這兩件事,想起自己當年咁忍心,她內疚到喊起來。

電影《行運一條龍》

美棋 BB當年拍咗唔少劇㗎!每次拍戲嗰陣媽咪都跟住佢,唔怪得冇時間陪其他仔女

當年拍《大冒險家》,美棋 BB曾經被草割傷,幸好有媽咪在才沒有事。

雖然天寒地凍揸雪車,兩母女玩到不亦樂乎。

難得去到韓國,美棋 BB扯埋媽咪一齊穿傳統朝鮮裝。

美棋 BB特別做咗一本相冊,送給媽咪做母親節禮物。

拒為錢打個女

初時知道媽咪兩次不要她,美棋內心有點不舒服,但諗深一層多年來她佔用媽咪時間最多,反而哥哥及姊姊被忽略了,所以她實在嬲唔落。美棋 BB說︰「媽咪好錫我, 5歲嗰陣拍劉德華的電影《大冒險家》時,拍攝一場赤腳跑的戲,我雙腳被草割到流晒血。媽咪當時嚇到發晒矛,即刻孭住我衝落山返酒店,搵醫生幫我洗傷口療傷,唔理孭住我跑有幾重有幾攰。

「另外仲有一次拍電視劇《刑事偵緝檔案》時,導演要我拍一場喊戲。佢同媽咪講,如果我喊唔出,就要媽咪打到我喊為止。不過媽咪當時好堅決咁話:『要打喊我個女就寧願唔拍。』最後因為我想飲朱古力奶,但買唔到,當時就好自然喊咗出嚟,反而過到骨。」談到這裏,美棋 BB亦鼻子一酸。

美棋 BB當年在美國柏克萊大學讀書,因為學費貴,她拼命讀,將原本兩年的課程縮短在一年內儲夠學分畢業。不過因為提早畢業,反而令父母無法放假出席其畢業禮。這件事一直令美棋 BB耿耿於懷,所以今次她特別要求有線安排她在韓國梨花女子大學的禮堂再舉行畢業禮,還租了畢業袍,跟媽咪影相圓心願。

不管之前發生了甚麼事,依家佢哋兩母女一條心,美棋 BB可以放心在娛圈發展。

今次去韓國雖然是為了工作,不過美棋 BB唔放過機會,同媽咪又食又玩。

美棋 BB特別去了梨花女子大學,再搞畢業禮,每次提起這件事,兩母女都哭成淚人。

重現畢業禮

當年拍《大冒險家》時,美棋 BB已經好識集郵,黐實劉華合照!

美棋 BB興奮地說:「我叫同事之前唔好俾媽咪知,呃佢我去拍啲嘢,之後再會合。佢一見到我着件畢業袍出現,開心到眼濕濕呢!」美棋 BB還作了一首歌,連同在韓國跟媽咪的合照,輯錄成一本紀念相簿,送給媽咪做今年的母親節禮物。黃媽媽收到後,哭着說:「呢份係我收到最開心嘅母親節禮物。」

童星難 Keep住紅

雖然香港電影界出產了不少童星,不過能夠一直留在娛圈發展,而且打出名堂的就少之又少,尤其係 80後的童星,好多都已經轉咗行。

馮寶寶

15歲前馮寶寶已經拍過 300部電影,是全球拍攝最多電影的童星。更被已故大導演李翰祥形容為「寶裏寶氣、玲瓏剔透」的女星,獲獎無數。

張繼聰

8歲的冬菇頭張繼聰在奶粉廣告中一句「十五樓養嘅牛牛」,深入民心,而且他還拍攝超過 100多個電視節目、電影和廣告,當時可算是童星界的大紅人。

唐寧

唐寧是少數從童星開始發展,直到結婚也沒離開過的藝人。她的作品多不勝數,尤其在《縱橫四海》飾演紅豆妹妹,最令人留下深刻印象。

鍾意就快D Share啦!
Related Posts Plugin for WordPress, Blogger...