2015年6月4日 星期四

部署 5個月 莊家彬密包猛料北姑 設局呃傅明憲 [壹週刊 - 1317] 莊家彬,傅明憲,M1,



29/4

莊家彬開始帶女友出席飯局,介紹俾朋友認識,而這名新女程新惠相當黐身,又繑手又哄埋。

娛頭

部署 5個月 莊家彬密包猛料北姑 設局呃傅明憲

傅明憲同莊士集團太子爺莊家彬拍拖九年,終於宣布玩完,外間甚至連當事人傅明憲,都以為分手原因是一直反對二人拍拖的莊父莊紹綏,使計踢莊家彬出董事局,保事業棄愛情所致,但原來只是一場騙局!早在去年八月,莊家彬已經搭上一名豪放北妹程新惠,一腳踏兩船近半年。

據知,莊家彬的新寵程新惠( Grace)做小三其實早有前科,過去曾經與台灣綜藝天王吳宗憲搞埋,男方更差點為她離婚。換新碼頭後,程新惠即獲莊家彬安排入住月租六萬蚊的陽明山莊酒店長房。「男友」風流快活,傅明憲蒙在鼓裡,白白犧牲九年感情。

傅明憲同莊家彬發展姐弟戀玩足九年,最後因為第三者導致分手收場。

急帶新女見老友

花近半年時間,逐步將九年女友傅明憲淡出朋友圈的莊家彬,今年三月中爆出二人分手消息後,過冷河一個半月,已經急不及待,帶同新歡出席有老死霍啟剛、郭晶晶等人的活動。

四月底,一班朋友拉隊到灣仔一間「平民餐廳」老巴剎開餐,莊家彬亦有帶同新女到場,二人並肩而坐;據有份在場的目擊者稱,新女操流利普通話,國產味濃郁,全程陪坐陪笑,冇機會搭嘴,就連同聲同氣的郭晶晶,都沒有理會對方。

飯局晚上九點半散 band,等車期間,這名國產佳麗主動繑實莊家彬,見男友冇厘反應繼續手插褲袋,她便加強攻勢,送波餅頂手臂,又刻意哄埋莊家彬面前,搏他進一步行動,但男友卻一味顧住同其他人傾偈,她唯有無癮玩手機。

28/5

莊家彬在陽明山莊月租包房,同程新惠禁室狂歡成個下午,在晚上才出外開餐。

食飯前,莊家彬同新女到金鐘 shopping睇衫。

當晚飯局還有霍啟剛及郭晶晶,但程新惠似乎與他們格格不入,甚少傾偈,全晚負責陪坐及陪酒。

身份多又神秘

莊家彬的新歡叫程新惠( Grace),做過娛樂圈幕後經理人工作,經常吹噓自己交遊甚廣,識盡中港台三地娛樂圈猛人;報稱今年只有三十歲的她,出身上海,但卻經常扮是台灣人,連 Facebook都填報自己現居台北。北姑充台菜外,程新惠的背景亦十分神秘,一時是富二代,一時又暗示屋企有軍方背景。

據了解,去年八月和莊家彬撻着的程新惠,幾年前已經互相認識包括傅明憲,亦清楚二人是情侶關係。

「舊年八月家彬去上海公幹,有晚同班富二代去咗蒲,當時 Grace都在場。佢見到家彬單拖到, Gigi(傅明憲)又唔喺度,就好似機不可失咁,埋去黐身黐勢,一齊劈一齊玩。嗰晚有冇下文唔知,不過之後佢哋肯定 keep住有聯絡,仲係瞞住唔俾 Gigi知嗰隻。原本家彬諗住同佢玩吓就算,點知個女人(程新惠)咬住唔肯放,佢最後仲揀咗同 Grace一齊!」莊家彬身邊人說。

獻計教分手

雖然莊家彬答應和程新惠繼續來往,但為進一步令男友同正印傅明憲分手,程新惠索性擺埋男方老豆上枱,度出絕世好橋,假借莊父莊紹綏要莊家彬在離開董事局,和同傅明憲分手,二擇其一。最終傅明憲唔想影響男友前途,妥協分手,誰料到從頭到尾都是一個局,傅明憲完全被蒙在鼓裡。

莊家彬和傅明憲分手爆出後一個月,程新惠已急住在微博、 Facebook等網上平台,有意無意間宣示她與莊家彬的合照,有策略地,一步一步走入男方的生活圈。

30/5

莊家彬同程新惠在街頭耍花槍,今次輪到莊家彬主動繑女友手。

兩人在街頭做出連串親密動作,又攬又摸,非常親熱。

吳宗憲前小三

程新惠釣到莊家彬前,同吳宗憲搭上,更差點搞到對方婚變。

其實程新惠並非初次做小三,一二年,她搭上台灣有婦之夫綜藝王吳宗憲,當時她的身份是吳宗憲的中國經理人,大條道理出雙入對,更有指程新惠曾多次逼吳宗憲要同老婆離婚,拖拉多年,兩人曖昧關係去年正式結束。

泊埋香港富二代,程新惠表現進取,經常陪住男友周圍飛公幹,平時亦大部分留守香港箍到實。為了方便見面,莊家彬上個月開始以月租港幣六萬元,在大潭陽明山莊酒店包了一間長房,用來做愛巢。

上星期四(五月二十八日),莊家彬冇返工,全日留在酒店瘟女!晚上七時,司機到酒店準備接二人外出,似啱啱瞓醒的莊家彬和程新惠一身街坊裝,先接了個朋友到金鐘睇衫 shopping,程新惠不時主動幫男友襯衫,又拼又度表現體貼。

之後一行人去了間日本料理食晚飯,莊家彬更在餐廳外賣了幾箱酒,叫司機送返酒店房。當晚莊家彬沒有留在酒店過夜,而是返回山頂莊家大宅交人。

街頭耍花槍

兩日後(三十日),莊家彬帶同程新惠到灣仔逸東軒同友人飯聚,食到晚上十時,離開時,只見莊家彬對黑住面的程新惠又繑又氹,即使當住男友的朋友面,程新惠照樣大發脾氣,為了氹番對方,一直做晒主動,又攬又呵,女方見好就收,又肉緊地摸住男友塊面嗲番,非常有手段。耍完一輪花槍,二人就返回酒店,繼續 happy。

對於被莊家彬設局呃分手,本週二傅明憲回應記者時,顯得相當愕然。

壹:最近仲有冇同莊家彬聯絡?

傅:之前喺報紙都講咗,而家係少聯絡嘅朋友。

壹:知唔知莊家彬有新女友,拍緊拖?

傅:(停頓三秒)唔知!

傅明憲被蒙在鼓裡,完全唔知被前男友呃。

莊家彬帶新女出海,同行還有台灣奀星丫頭。

程新惠認識不少藝人,更帶埋莊家彬去見朋友,公開晒戀情。

見過 Grace一兩次

壹:佢女友叫程新惠,妳識唔識?

傅:(諗了五秒)英文名係咪叫 Grace。

壹:妳同佢熟唔熟?

傅:幾年前見過一兩次。

壹:知唔知佢哋拍緊拖?

傅:完全唔知。

壹:佢哋上年八月已經一齊,妳嗰陣都未同家彬分手。

傅:真係完全唔知,不過過咗去就由得佢過去。

壹:覺唔覺得俾莊家彬呃咗?

傅:過咗去就由得去,最緊要佢依家開心。

壹:會唔會嬲莊家彬一腳踏兩船?

傅:過咗去唔會再諗,好 obvious佢 move on佢嘅 life,我都要 move on, I am happy with my life, I hope he's happy with his life too!

壹:知唔知 Grace之前都做過人哋小三!

傅:人哋嘅嘢我唔清楚,最緊要家彬而家開心就得。

九年情

06年傅明憲與莊氏集團太子爺莊家彬撻着,雖然二人年齡相差十一年,但多年來一直恩愛,可惜付出九年時間,亦無法得到莊家父母體諒和歡心。

秘密撻着

99年與葉劍波結婚,直到 06年因為海域集團有賬目問題,葉劍波失蹤,二人隨即傳出「婚變」,其後傅明憲搭上莊家彬,因當時她還未正式離婚,一直未有公開承認。

逐漸浮面

08年,傅明憲與葉劍波正式離婚後,二人經常被拍到出雙入對,甜蜜外遊,又結伴到日本沖繩出席台星吳辰君婚禮。

父母打壓

莊父莊紹綏多年來一直棒打鴛鴦,更曾出言公開踩傅明憲,又不滿兒子搭上失婚婦,除了經濟封鎖,又逼莊家彬大時大節返屋企交人,出盡招數拆散二人。

正式玩完

年多前,在家庭壓力下,二人一度再傳分手,但未幾又復合。經歷多次離合後,莊家彬終於為新歡程新惠,和傅明憲在去年底正式結束 9年情。

鍾意就快D Share啦!
Related Posts Plugin for WordPress, Blogger...