爆壹爆
元朗教父捽腳看風雲
新界再起風雲，上週新界王劉皇發據講要退休，發叔個仔劉業強已經自動當選鄉議局主席之位，新界人稱之為「太子登基」。發叔人走餘威在，好多人仲靠佢搵食，所以各路鄉紳都已表態支持效忠，連久未露面嘅有勢力人士，都紛紛蒲頭搵着數。
話都冇咁啱，發叔退位前幾日，爆哥去元朗一間足浴按摩店揼「正骨」，竟然撞到久未露面嘅大人物，佢就係九十年代翻雲覆雨，有元朗教父之稱嘅戴權。今年八十八歲嘅戴權，睇嚟精神仲好掂，一個人走去捽腳刮筋歎世界。戴權自退出政壇後，聽聞近年多喺加拿大同香港兩邊走，今次咁突然喺元朗蒲頭，仲要係發叔退位之際，咁爆哥當然捉住佢老人家問幾句，係咪返來撐「太子登基」呀？教父當然係老江湖嗰隻啦，一味遊花園，話絕對唔想參與新界風雲變色喎！
教父你咪扮低調啦，爆哥仲收到猛料，話說九十年代雄霸屯門嘅屯門之虎豬頭細，自從 01年被仇家槍擊重創後，近年一直豹隱，但呢排突然再現江湖，據講臨老受命，就係要帶領屯門老新，出嚟撐太子登基，角色等同御前侍衞咁話，以對抗一班新界 14K勢力嘅擴張。新界江湖忽然又多股勢力活躍，日後不單黑道多事，政黑勾結亦會更嚴重。
和勝和大搜捕
上星期差佬大規模搜捕黑幫和勝和成員，拉咗骨幹人物幾十人，包括現任坐館肥堅同前坐館雙鷹青，連幫中猛人陳安都有傳俾人拉埋，事件震驚整個江湖，成為江湖熱門吹水話題，有人話每逢坐館卸任前，差人都會例牌拉人，正所謂坐完館就坐監，但也有人吹水，話勝和高層呢排高調接受《壹仔》訪問出事。
不過知道內情嘅江湖中人就話，其實大約兩個星期前，一眾勝和大佬已發覺被警方狗仔隊貼身跟蹤，而喺差人展開拘捕行動前，試過一批大佬輩人物覺得唔對路，立即召來社團內嘅飛車手協助，卒之飛車擺脫警方狗仔隊跟蹤，之後就搵地方暫時避避風頭，如果唔係，可能會有更多猛人落網。江湖中人又替肥堅唔抵，因為當初元老大飛本想推「十二點後我話事」而響朵嘅英傑做坐館，但雞腳黑一方極力反對，最後搵咗肥堅後補頂上。點知分分鐘頂埋入冊，真係多得英傑唔少。
黑警警長幫手開雞竇
呢排警察形象麻麻，不時俾人失去理性咁叫黑警。但講到真正黑警代表，一定係綽號「潮州怒漢」、十多年前已退職嘅警署警長陳×明。有朋友爆料，話陳喺黑白兩道都好有地位，一個電話吹雞，閒閒哋都吹到過百人晒馬，好鬼巴閉。八、九十年代，好多油尖旺嘅夜場，都係由陳分配睇場權俾不同社團，十四 K猛人華喜，都要聽陳支笛。
而十多年前，四名警員聯同一名姓洪女影星嘅前夫，喺尖沙咀香檳大廈開雞竇一事，有傳亦係陳做中間人。因陳係女星前夫黑道上大佬，而涉案警員有人係陳嘅舊部屬，所以走埋一齊開雞竇。不過，由於當時無證據顯示陳直接參與雞竇運作，所以無被起訴。而陳近年好低調，多數在紅磡一帶出沒，打理骨場生意。而佢同勝和關係最好，早排勝和喺沙田成立體育會，佢都有俾面出席。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|
